《耶穌言行錄》

| | | 轉寄

Tē-11-chiuⁿ,Iâ-so͘ tùi Ai-ki̍p tò-lâi，Kàu saⁿ-cha̍p hè ê tāi-chì

作者 Ko Kim-seng. 2008.06.22

（Má-thài 2：19-23；Lō͘-ka 2：40-52）
Hi-lu̍t sí liáu-āu，Chú ê thiⁿ-sài tī Ai-ki̍p thok-bang7chhut-hiān kā Iok-sek kóng，"Khí-lâi chhōa Eⁿ-á kap lāu-bú khì Í-sek-lia̍t ê tōe-hng，in-ūi ài hāi-sí Eⁿ-á ê lâng í-keng sí lah. "Iok-sek liâm-piⁿ khí-lâi，chhōa Eⁿ-á kap lāu-bú kàu Í-sek-lia̍t ê tōe-hng.Thiaⁿ-kìⁿ Hi-lu̍t ê kiáⁿ sòa-chiap chòe ông chiū kiaⁿ，m̄-káⁿ khì khiā-khí tī Pek-lī-hêng；nā-sī tī bāng nih tit-tio̍h be̍k-sī，chiah khì Ka-lī-li Ná-sat-le̍k.Iâ-so͘ tiàm hia kàu tōa-hàn.Sèng-chheh ū kóng，"Eⁿ-á chiām-chiām tōa，cheng-sîn ióng-kiāⁿ，tì-hūi chhiong-móa，Siōng-tè ê un-tián pì-iū I. "

Iû-thài lâng ū chi̍t ê *Pôaⁿ-kè-choeh，sī chá chhut Ai-ki̍p ê sî，Siōng-tè siat-li̍p ê .Iok-sek kap Má-lī-a ta̍k nî chiūⁿ Iâ-lō͘-sat-léng lâi siú chit ê choeh，kau3Ia5-so͘ cha̍p-jī hè ê sî，I ê pē-bú chhōa I saⁿ-kap khì，tâng-kiâⁿ ê lâng ia̍h chin-chōe.Choeh-kî bêng-pe̍k，tāi-ke tò-lâi，Iâ-so͘ iáu-kú tī Iâ-lou7sat-léng，pē-bú m̄-chāi，lia̍h-chún kiò sī chhap tī tâng-kiâⁿ ê lâng ê tiong-kan.Kiâⁿ kàu chi̍t ji̍t lō͘，chiah chhē bô，chiū tò-tńg khì Iâ-lō͘-sat-léng chhē.Chhē kàu saⁿ ji̍t āu，tī tiān-nih chiah tú-tio̍h，khòaⁿ-kìⁿ I chē tī sian-siⁿ ê tiong-kan the tâm-lūn.Lâng thiaⁿ-kìⁿ I ê ōe lóng-chóng kî-koài I ê chhang-miâ，gau5in3-tap.Pē-bú khòaⁿ-kìⁿ ia̍h kî-koài；I ê lāu-bú kóng，Kiáⁿ，siáⁿ-sū hō͘ goán kàu án-ni？lí ê pē kap góa iu-būn chhē lí.Iâ-so͘ ìn kóng，"Mi̍h-sái chhē góa？
kiam2m7-chai góa eng-kai tī góa ê Pē ê só͘-chāi？
"Pē-bú thiaⁿ bōe hiáu-tit，chóng-sī lāu-bú chiong chiah ê ōe khǹg tī sim-lāi.Iâ-so͘ chiū kap in tò-khì Ná-sat-le̍k，hàu-sūn pē-bú.Án-ni thang hō͘ lán chai Iâ-so͘ tī sè-kan lóng chīn lu̍t-hoat lâi kiâⁿ.Tē gō͘ tiâu kóng，"Tio̍h hàu-kèng lí ê pē-bú. "Iâ-so͘ án-ni kiâⁿ sī ài lâng o̍h I ê bô͘-iūⁿ.Gín-ná sui-jiân bōe kàu chhin-chhiūⁿ Iâ-so͘ án-ni，iáu-kú tio̍h kiû Sèng Sîn pang-chan lâi o̍h，chiū Siōng-tè tek-khak hoaⁿ-hí thiaⁿ，hō͘-in ná kú ná o̍h hó ê khoán-sit.

Tùi Iâ-so͘ cha̍p-jī hè kàu saⁿ-cha̍p hè，hit ê tiong-kan Sèng-chheh bô lóng kì-chài，iáu-kú chai Iok-sek sī chòe ba̍k ê sai-hū，phah-sǹg Iâ-so͘ ia̍h sī án-ni，in-ūi Sèng-chheh kì-chài，ū lâng kiò I chòe ba̍k sai-hū.Án-ni hō͘ lán chai I káⁿ ū pang-chān Iok-sek chòe kang thàn chia̍h.I si̍t-chāi sī Siōng-tè，iáu-kú"Khut-hā chòe lâng，chiâⁿ lô͘-po̍k ê khoán-sit. "Án-ni lán tio̍h o̍h Iâ-so͘ khiam-pi ê khoán-sit.Sèng-chheh kóng，"Lín eng-kai tio̍h ū Ki-tok Iâ-so͘ hit hō͘ ê sim. "（Hui-li̍p-pí 2：5）

思羅安台語點字網站