《耶穌言行錄》

| | | 轉寄

Tē-9-chiuⁿ,Phok-sū

作者 Ko Kim-seng. 2008.06.08

（Má-thài 2：1-12）
Iâ-so͘ chòe Eⁿ-á ê sî，ia̍h ū phok-sū lâi khòaⁿ I .Chiah ê phok-sū sī tùi hn̄g-hn̄g lâi，kiám-chhái sī tùi Pho-su kok，á-sī tùi tang-hng ê só͘-chāi lâi.In chheng-chòe phok-sū，sī chhang-miâ，ia̍h ū siông-siông káng-kiù thian-bûn ê tāi-chì. In ū chi̍t hāng chin hó，chiū-sī kàen-ùi Iâ-hô-hoa.

Siōng-tè thòe in siat chi̍t ê koh-iūⁿ ê hong-hoat，hō͘ in chai Kiù-chú lîm-kàu sè-kan，koh chhōa in khì ho̍k-sāi I；chiū-sī hō͘ in khiàⁿ-kìⁿ thiⁿ- téng ū chi̍t-lia̍p put-chí koh-iūⁿ ê chhiⁿ，sī piáu-hiān Iâ-so͘ chhut-sì，chiong hit lia̍p lâi ín-chhōa in khì kìⁿ-tio̍h Iâ-so͘.Phok-sū bêng-pe̍k chit ê tāi-chì，sim-lāi chin hoaⁿ-hí，liâm-piⁿ khì-sin khì Iâ-lō͘-sat-léng pài Iâ-so͘.Khì ê sî sòa tòa in kok só͘ chhut ê pó-mi̍h，n̂g-kim，jú-hiuⁿ，bu̍t-io̍h lâi hiàn hō͘ Iâ-so͘.

Í-keng kàu Iâ-lō͘-sat-léng，chiū mn̄g kóng，"Chhut-sì chòe Iû-thài lâng ê ông tī tah-lo̍h？goán tī tang-hng khòaⁿ-kìⁿ I ê chhiⁿ，só͘-í beh lâi pài I . "

Lūn Iâ-so͘ chin-chiàⁿ sī Ông，chiū-sī bān ông ê Ông，bān chú ê Chú，sī chiáng-koán lâng ê sim，hō͘ lâng hâng-ho̍k tī I.Hi-lu̍t ông thiaⁿ-lìⁿ phok-sū lâi chhē Iû-thài ông，i kap i ê peh-sìⁿ chin kiaⁿ，in-ūi kiaⁿ-liáu cheng i ê ông-ūi，m̄-chai Iâ-so͘ ê kok m̄-sī sio̍k tī sè-kan，chiū-sī sio̍k thiⁿ-téng.Hi-lu̍t ông kiò chè-si，tha̍k-chheh lâng mn̄g kóng，"Ki-tok eng-kai tī tah-lo̍h chhut-sì？"In chiū kóng，"Pek-lī-hêng，in-ūi Sèng-chheh ū án-ni kì-chài. "Yùi hit-tia̍p Hi-lu̍t àm-chīⁿ tiàu phok-sū siông-sè mn̄g chhiⁿ chhut-hiān ê sî，mn̄g láiu chiū chhe in khì Pek-lī-hêng，kóng，"Lín tio̍h khûn-khûn chhē Eⁿ-á，chhē-tio̍h，tio̍h lâi kā góa kóng，góa ia̍h beh khì pài I. "Hiah ê phok –sū thuaⁿ Hi-lu̍t ê bēng-lēng chiūⁿ kiâⁿ，hut-jiân tang-sì só͘ khòaⁿ-kìⁿ ê chhiⁿ chòe-thâu chhōa in kàu Eⁿ-á só͘ hioh ê só͘-chāi.

Phok-sū khòaⁿ-kìⁿ hit lia̍p chhiⁿ hoaⁿ-hí kàu bōe-kò͘-tit，chiū ji̍p chhù，khòaⁿ-tio̍h Eⁿ-á kap lāu-bú Má-lī-a，phak-the pài Eⁿ-á，khui pó-a̍h，ēng n̂g-kim，jú-hiuⁿ，bu̍t-io̍h lâi hiàn hō͘ I.Lán tha̍k phok-sū ê tāi-chì，ū kúi-nā hāng lán thang o̍h.Chiū-sī tio̍h khûn-khûn chhē Iâ-so͘.M̄-sái kiâⁿ hn̄g lō͘ lâi chhe，in-ūi I sī ta̍k-ūi tī-the ê Siōng-tè.Lán ia̍h m̄-sái chi̍t-lia̍p chhiⁿ lâi chhōa，in-ūi ū chiâu-chn̂g ê sèng-chheh，sī-pí chhiⁿ put-chí khah kng，koh ū Sèng Sîn thang chiò kng lán ê sim，chóng-sī lán ê sim kap seng-khu lóng-chóng hiàn hō͘ Siōng-tè. Sèng-chheh kóng，"Góa ê kiáⁿ tio̍h chiong lí ê sim hiàn hō͘ góa，"koh kóng，"Tio̍h hiàn lí ê seng-khu chòe oa̍h ê chè. "

思羅安台語點字網站