《《原鄉．夜合》 客語詩集》

 | | | 轉寄

阿儀同福佬妹 Â ngì thùng ho ló moi

作者 曾貴海 白話字：邱淑華 2008.04.06

24歲過身的日仔
Ngi sṳ̍p si se ko sṳ̂n ke ngit lé
咚咚鈸接著笛聲一路行到牛埔
Tung tung khiang chiap tén tha̍k é sâng yit lu hàng to ngiù phû
出喪ke人群當中
Chhut song ke ngìn khiùng tông chûng
哀愁的家人同朋友頭盡盡
Ôi seù ke kâ ngìn tùng phèn yû theù chhín chhín

這邊那邊一聲半聲道嘆
Yá phién ke phién yit sâng pan sâng tho than
人群中一個披著麻布＜後ke生＞細妹仔
Ngìn khiùn chûng yit ke kà tén mà pu ＜ke heu sâng> se moi é
噭泣到要人扶著正行得動
Kieu chṳ̂ to oi ngìn fù tén chang hàng tet thûng
那就係阿儀ke福佬妹仔
Ke chhiu he â ngì ke ho ló moi é

還小就有心臟病
Vàn se chhiu yû sîm chhong phiang
醫生講伊食毋久
Yî sên kóng kì sṳ̍t m̀ kiú

常常指著心臟同ngài講kì會短命
Sòng sòng chṳ́ tén sîm chhong thùng ngài kóng kì voi tón miang
小學共下佇田坵圳溝搞到大
Seú ho̍k khiung ha thê thièn khiû chun kiêu káu to thai
書包帶便當同鐵棍
Sû pâu tai phien tông thùng thiet kung
初中也共下做不良少年
Chhû chûng yâ khiung ha cho put liòng seu ngiàn
有一擺過莊打人
Yû yit pái ko chông tá ngìn
分人打到爬歸來
Pûn ngìn tá to phà kûi lòi

初中畢業後走去一間工廠做事
chhû chûng pit ngia̍p heu cheú hi yit kiân kûng chhóng cho sṳ
沒幾年老闆ke老妹
Mò kí ngiàn ló pán ke ló moi
半夜就會來整理伊ke眠床
Pan ya chhiu voi lòi chṳ́n lî kì ke mìng chhòng

有一擺過年，伊贏淨大家ke錢
Yû yit pái ko ngiàn,kì yàng chhiang thai kâ ke chhièn
忽然間剝忒手錶仔
Fut yàn kiân pok het sú peû é

放佇桌上
Piong thê chok hong
同ngài講，你拿去
Thùng ngài kóng ,ǹg nâ hi
你比ngài還更需要用得到
Ǹg pí ngài vàn ko sṳ̂ yeu yung é tó

過身後有人常常看到
Ko sṳ̂n heu yû ngìn sòng sòng khon tó
臨暗ke墓地頭
Lìm am ke mu thi theù
該隻福佬妹
Ke chak ho ló moi
坐佇墓地唇
Chhô thê mu thi sùn
目汁流入夜色中
Mu̍k chṳp liù ngi̍p ya set chûng
跈著星仔恬恬離開
Thèn tén sên né tiâm tiâm lì khôi