《當上帝開嘴講台語》

 | | | 轉寄

5.3.2.2 唸讀實驗-2

作者 梁淑慧 2009.09.13

因為實驗ê人數無chē，亦m̄是常態，無法度用統計ê方式計算，阮kan-taⁿ用簡單ê描述來歸納出所觀察ê結果。

（一） 閱讀速度方面：教徒組讀「漢羅合用字」siōng緊；讀「白話字」第二；讀「漢字」siōng慢；非教徒組則是讀「漢羅合用字」siōng緊；讀「漢字」第二；讀「白話字」siōng慢。

（二） 理解能力方面：教徒組對《聖經》經文khah熟，三篇文章ê內容lóng會tàng完全理解；非教徒組對「白話字」ê經文感覺khah困難。

（三）口音方面：Tī唸讀「漢字」kap「漢羅合用字」經文ê時，逐個人lóng會tàng照家己平時講話ê口音（偏漳腔抑是偏泉腔）來唸。M̄-koh tī-leh唸讀「白話字」經文（偏泉腔）ê時，教徒組有時按照文章標示ê語音唸，有時koh按照家己講話ê口音唸；非教徒組to̍h無chit款情形，lóng是按照「白話字」經文ê語音唸。這是一個趣味ê現象，表示雖然教徒對《巴克禮譯本》ê內容真熟，m̄-koh tī語音方面ê習慣猶原維持家己慣sì ê口音，甚至tī看tio̍h kap家己口音無仝ê白話字時，會隨時將伊轉變做kap家己口音kāng款ê音唸--出來。非教徒因為對經文內容khah無熟，所以會完全遵照經文ê羅馬拼音來唸，自然bē去改變經文ê口音來遷就家己ê語言習慣。

（四）代名詞ê發音：台語ê代名詞接tī動詞後壁做受詞ê時，一般lóng需要讀輕聲，除非是強調ê語氣chiah讀本調。唸讀ê時，非教徒lóng真自然遵照口語習慣將伊讀做輕聲；m̄-koh教徒卻習慣將伊讀做本調。這有可能是因為《聖經》中ê第三人稱「伊」時常用來指稱「上帝」，為tio̍h beh強調所以無讀輕聲。其他ê代名詞mā連帶受tio̍h影響，這是書面語影響唸讀語音習慣ê一個例。

（五）「漢字」ê讀音方面：教徒組對《聖經》經文khah熟，kan-taⁿ少數字、詞唸bē出來；非教徒組to̍h出現大量唸bē出來ê字、詞，抑是勉強臆出來卻kap原來所注ê音無仝。探討原因，應該是社會上台語「漢字」ê用字混亂，oh得規範所造成，可見台語漢字ê社會化kap標準化是相當必要ê工作。

（六）以唸讀讀音ê正確度來講：「漢羅合用字」ê經文因為將本字無明確ê詞以羅馬字拼出，所以會tàng避免誤讀，tī朗讀ê正確度比「漢字」khah好。Koh因為將已經有標準化漢字ê詞以常用漢字寫出，會tàng照顧tio̍h無kāng口音ê需要，所以唸讀ê正確度mā比「羅馬字」khah好。