《當上帝開嘴講台語》

 | | | 轉寄

5.3.1.5 語感測驗ê小結

作者 梁淑慧 2009.04.19

就語感測驗chit一部分來講，「年齡」、「聽台語講道時間ê長短」以及「kám有捷看《巴克禮譯本》抑是《台語漢字本》」chit三項變數對於《巴克禮譯本》ê「語詞」、「語法」、「語音」、「信息傳達」接受度lóng有顯著ê影響。整體來講，年齡愈年長、聽台語講道愈chē年、愈捷使用《巴克禮譯本》者，對於《巴克禮譯本》ê接受度就khah koân。相對ê，愈少年ê非教徒對於《巴克禮譯本》ê接受度就khah kē。

這除了顯示年長者所使用ê台語內底，語詞kap語法ê豐富度lóng比少年人khah koân以外；另外一方面mā hō͘咱覺察tio̍h語言變遷ê事實。而且因為教會講道所使用ê台語《聖經》一向是《巴克禮譯本》，長久落來to̍h影響了教徒ê台語語感，所以khah會tàng接受《巴克禮譯本》ê用法；非教徒ê語感是tòe社會、時間不斷teh變動kap調整--ê，語詞ê汰舊更新、語法因為語言接觸來造成ê改變、語音上「優勢腔」ê成型……等，語言ê活力看會tio̍h，所以tī現代社會裡，《巴克禮譯本》內ê種種語詞kap語法hō͘人感覺tòe時代bē tio̍h，易讀性khah kē。

M̄-koh後期翻譯ê「紅皮聖經」kap《現代台語譯本》，in有跟tòe語言ê變遷來調整語詞kap語法，翻譯原則mā因為khah注重tī「功能對等」所以khah容易理解，而且khah有本土味，對現代讀者來講易讀性khah koân。