《當上帝開嘴講台語》

 | | | 轉寄

4.4 信息傳達風格ê比較-2

作者 梁淑慧 2008.03.02

以下咱舉實例來探討三種譯本ê風格特點（註82）：

一、Tī信息傳達方面，《巴克禮譯本》以直譯原文為主，「紅皮聖經」kap《現代台語譯本》是用讀者會tàng理解ê話語來表達原文ê意義。

如原文「dikaiosune」chit字，《巴克禮譯本》tī馬太福音3：15，5：6、10、20，6：33，21：32全部譯做「義」，其他兩種譯本是看頂下文來翻譯做無仝ê用語。

表4.4.1a 「義」ê比較

馬太巴克禮譯本紅皮聖經現代台語譯本
3：15因為咱合宜著án-ni來盡lóng總ê義。咱若án-ne做是當然ê，因為這是符合上主所要求ê。因為án-ni是符合上帝一切ê要求。
5：6枵(iau)嘴乾欣慕義ê人有福氣。熱切渴慕boeh實行上主ê旨意ê人，實在有福氣。枵嘴乾渴慕義ê人實在有福氣。
5：10為著義bat受窘逐ê人有福氣。為著實行上主ê旨意來受迫害ê人，實在有福氣。為著義受迫害ê人實在有福氣。
5：20設使恁ê義無贏過經學士kap法利賽人ê義，決斷bōe得入天國 。恁若無比經學者kap法利賽派ê人khah忠實來遵行上主所要求ê，恁一定bē-tàng進入天國 。 恁若無比經學教師kap法利賽派ê人koh khah虔誠遵行上帝ê旨意，一定bōe-tàng入天國。
6：33獨獨tāi先求伊ê國kap伊ê義，就chiah ê物lóng beh續hō͘恁。恁著tāi先追求上主ê國以及伊ê旨意，伊自然也會將其他一切ê物lóng賞賜hō͘恁。著tāi先追求伊ê國kap伊ê義，按呢chiah ê 一切就續hō͘恁。
21：32約翰tī義ê路就近恁。約翰來指示恁行上主所要求ê路。施洗約翰來恁chia，指示恁行正路。


另外，tī《巴克禮譯本》中有一寡文句讀起來真oh了解，這mā是因為忠於原文ê原則來造成。M̄-koh若查考「紅皮聖經」抑是《現代台語譯本》，意思to̍h加真清楚。

表4.4.1b 三種譯本tī信息傳達方面ê比較（註83）
馬太巴克禮譯本紅皮聖經現代台語譯本
3：8所以恁著結hit號合tī反悔ê果子。 Taⁿ恁著用恁ê行為來證明恁真正有悔改。著用行為來證明恁有悔改。
4：19來tè我，我beh hō͘恁得著人親像討魚ê。來tòe我！我boeh hō͘恁親像漁夫teh掠魚án-ne，去引 chhōa人來信上主。（kap《巴克禮譯本》仝）
5：3心內喪鄉ê人有福氣，因為天國是in ê。知影著倚靠上主ê人，實在有福氣，因為in會成做天國ê子民。 心內散赤ê人實在有福氣，因為in是天國ê子民。
5：38目睭賠目睭，嘴齒賠嘴齒。以眼還眼，以牙還牙。（kap《巴克禮譯本》仝）
5：39莫得kap pháiⁿ抵敵。m̄-thang「以惡報惡」。 m̄-thang報復得罪恁ê人。
5：41有人勉強你行一里， 就kap伊行兩里。若有人強逼你giâ伊ê行李行一里路，著kap伊行兩里路。若有占領軍ê軍人強逼你行一里路，著kap伊行兩里。
6：34莫得為著明仔日掛慮；因為hit個明仔日，伊beh家己掛慮。m̄-thang煩惱明仔載ê tāi-chì。明仔載也有另外ê tāi-chì thang煩惱。m̄-thang為著明仔日掛慮；明仔日ê tāi-chì明仔日才掛慮。
6：34一日ê艱苦tī一日夠額。一日ê困難，hit日來擔當就有夠額。一日ê艱苦一日當。
7：1莫得批評人，才免抵著批評。m̄-thang批評別人，恁才bē受批評。m̄-thang評判人，恁chiah免受上帝審判。
8：22出在死人去埋葬in ê死人。放hō͘ hiah-ê 精神上ê死人，去埋葬in肉體上ê死人。 hō͘死人去埋葬in ê死人。
11：19若是智慧tùi伊ê所行顯明伊是tio̍h。但是上主ê智慧是用hit個智慧ê成果來證實ê。上帝ê智慧tùi作為證實。
12：33恁著掠hit個樹做好，伊ê果子ia̍h做好；或是掠hit個樹做pháiⁿ，伊ê果子ia̍h做pháiⁿ；因為tùi果子來bat樹。好樹結好果子。Pháiⁿ樹結pháiⁿ果子。看果子就會tàng知影樹ê好pháiⁿ。好樹結好果子；pháiⁿ樹結pháiⁿ果子；tùi所結ê果子thang知樹ê好pháiⁿ。
19：12因為有閹(iam) ê，tùi母胎出世就án-ni；也有hō͘人閹ê；也有為著天國家己閹ê。有人因為天生ê缺點bē-tàng結婚；有人因為人為ê因素bē-tàng結婚；有人為著天國家己無愛結婚。有人tùi出世就無適合結婚；有人是人為ê原因bōe-tàng結婚；也有人是為著天國無beh結婚。
23：2經學士kap法利賽人坐摩西ê位。經學者kap法利賽派ê人繼承摩西ê權柄來解釋律法。經學教師kap法利賽派ê人坐摩西ê位解說律法。
24：2 tī chia beh無一塊石留tī石頂，也無chhia落去。將來tī chia ê所在無一塊石會相tha̍h，lóng會倒kah平平去。無kah 一塊石會tha̍h tī別塊頂面，lóng會倒kah平平平。
24：24因為beh有假基督，假先知起來行大ê神蹟kap兆頭；beh是會，連揀ê百姓也迷惑伊。因為假彌賽亞kap假代言人會出現來做大ê神蹟kap奇事，盡量boeh來迷惑上主ê選民。因為有一寡假基督kap假先知會出現，行大神蹟kap奇事來迷惑人，甚至迷惑選民。
25：21好ah ，好koh盡忠ê奴僕，你tī少ê已經盡忠，我beh設立你來管chōe ê；thang入你ê主人ê快樂。真好，你是一個好koh盡忠ê奴僕！你既然對小小ê tāi-chì to顧得住，我boeh hō͘你管理真大ê tāi-chì；你入來分享我ê喜樂！ 真好，好koh盡忠ê奴僕，你既然tī少ê盡忠，我beh委託你管khah chōe ê；入來kap主人做夥歡喜！
25：24主ah，我知你是嚴轄ê人；未撒ê所在，就beh收割；未分散ê所在，就beh khioh做堆。頭家，我知影你是一位真刻薄ê人，無撒種也boeh收成，無種作也boeh收割。主ah，我知你是嚴轄ê人， 無撒種ê所在ia̍h beh收割，無種作ê所在ia̍h beh收成。
26：40按怎樣，恁bōe會kap我警醒半時久ah？ 恁三個 kám真正無法度mài睏kap我做夥一點鐘久？恁真正bōe-tang3kap我警醒一點鐘久是無？
26：41著警醒，著祈禱，免得入tī迷惑；心神甘願，若是肉體軟茈（nńg-chiáⁿ）。恁m̄-thang睏去，著祈禱，才bē陷落誘惑。恁心有餘但是力不足。著警醒，著祈禱，才bōe陷落誘惑；恁心神願意，但是肉體軟弱（loán-jio̍k）。
徒26：14掃羅！掃羅！你啥事窘逐我？你用腳踢莿是艱苦！掃羅！掃羅！你án怎kā我迫害？你án-ne做tú親像牛去踢主人有刺ê棍仔，是家己teh傷害家己。掃羅！掃羅！你是án怎kā我迫害？你實在真戇，你tú親像牛牨beh滾開牛擔，用腳踢刺，家己討皮痛。


Tùi以上ê例咱真明顯會tàng看tio̍h「紅皮聖經」kap《現代台語譯本》行文khah自然、流暢，符合現代人ê語感。一寡oh理解ê經文用淺白好了解ê文句抑是大家熟sāi ê成語、俗語呈現，而且將字面背後隱藏ê涵義也說明ah。M̄-koh chit點mā招致一寡反對ê聲音，有人認為：

「翻譯者ê任務kap傳教者、牧師、神學家、註解者等有所無仝，m̄-thang用家己ê現代意識、思想、抑是解釋等代入tī翻譯，mā m̄-thang用家己ê Style遮蔽聖經著作者各自tùi聖神ê引chhōa來表現tī原文中ê個性。」（ø，1975）（註84）

m̄-koh遵照「功能對等（functional equivalence）」ê翻譯卻認為：

「為著hō͘現今ê讀者tùi譯文所得tio̍h ê信息kap原讀者tùi原文所得tio̍h ê kāng款，翻譯者必須tī翻譯ê過程中做某一寡文法kap用詞上ê調整，kā原文所隱含ê意思明示出來。」（駱維仁，2001）

以馬太5：41做例，在當時猶太人受羅馬政府統治，人民必須為政府做種種ê義務工作，包括強迫運送包裹抑是貨物。M̄-koh當時法律規定兵丁kan-taⁿ會-tàng要求平民代替giâ貨物行一里路。因為所生活ê時代不同，歷史kap文化背景mā無仝，現代ê讀者若無了解以上ê背景，讀《巴克禮譯本》to̍h無法度感受tio̍h當時ê讀者所感受tio̍h ê衝擊kap反感，「紅皮聖經」kap《現代台語譯本》雖然加添原文所無ê成分，卻hō͘信息ê傳達更加清楚、完整。

使徒行傳26：14敘述掃羅信主ê經歷，耶穌藉當時ê人使用ê物件kap用途來警戒掃羅，叫伊停止迫害基督徒ê舉動，chiah會tàng避免傷害家己（翁修恭，2002）。原文中並無「牛」一詞，因為這是當時當地ê生活經驗，無須要講siuⁿ明白眾人to̍h聽有，m̄-koh tī異時異地ê讀者聽起來，若無小khóa補充說明一定是真oh理解ê。

Koh譬如馬太7：1，若照《巴克禮譯本》kap「紅皮聖經」ê翻譯tiāⁿ-tiāⁿ hō͘人理解做：「m̄-thang批評別人，免得受tio̍h別人ê批評。」m̄-koh事實上原文「krino」（判斷、批評、審判、定罪）chit個動詞被動式ê施事者是上帝。原來，猶太人遵守十誡，m̄敢隨便直呼上帝ê名字，因此當必須稱呼上帝ê名字時，通常是以被動語態來表達。對原來ê讀者來講，chit種表達法一點仔to bē生疏；m̄-koh對現代ê讀者來講，除非譯文明白表示主詞是上帝，若無大多數ê人恐驚會誤解，無明白tī原文中耶穌ê教導是koh-khah嚴格ê。《現代台語譯本》ê翻譯照顧tio̍h信息傳達ê正確性。


註82：「信望愛信仰與聖經資源中心」網站http://bible.fhl.net/ 會tàng tī線上對照原文。以下為著方便比較，三種譯本ê經文lóng用漢羅合用文呈現，《巴克禮譯本》ê標點符號以原有ê形式呈現，無採用《台語漢字本》修改過ê形式。所舉ê經文以馬太福音為主，其他經卷若有適當ê例亦做夥提出來。

註83：以下所引例句「太5：3」、「太8：22」由林俊育先生所提供，特別tī chia感謝。

註84：Chit篇文章〈新譯台語聖經之我見〉刊登tī 1975年ê《教會公報》，分三期連載，分別是：1月12日、1月19日、1月26日。作者匿名，以「ø」發表。內容針對「紅皮聖經」ê翻譯做探討kap批判。