《當上帝開嘴講台語》

 | | | 轉寄

4.3.7 古漢語ê殘留-2

作者 梁淑慧 2007.12.09

4.3.7.3 雙重否定

《巴克禮譯本》內底tiāⁿ-tiāⁿ出現「無m̄…」chit種雙重否定ê講法，相當於文言文ê「莫不…」、「無不…」，兩個否定詞連用，m̄-nā是表達「肯定」，而且koh有「lóng…」ê意思。現代台語tī兩個否定詞中間一定ài加上「一＋量詞（＋名詞）」，或者是直接改做肯定句，無to̍h無合語法。

52. 文言文：先知者除其本地本家之外莫不榮也。（太13：57）
巴克禮譯本：先知人tī本鄉本家以外，無m̄尊貴。
現代台語：（a）先知tī家己ê故鄉家己ê家族以外，無一位所在無受人尊敬。
（b）代言人tī家己ê故鄉本家以外，去到叨位to受人尊敬。[AP]
先知tī家己ê故鄉家己ê家族以外一定lóng受尊敬。[HT]

53. 文言文：為伊等所拿之多魚無不驚。（路5：9）
巴克禮譯本：為著in一下拋落去所掠tio̍h ê魚無m̄卬愕 (gông-ngia̍h) 。
現代台語：（a）因為in一下拋網就掠tio̍h hiah chē魚，無一個（人）無著驚。
（因為in一下拋落所掠tio̍h ê魚，無一個無卬愕。[LKHL]）
（b）因為in一下拋網就掠tio̍h hiah chē魚，逐個人lóng真著驚。
（因為in一下拋網就掠tio̍h hiah-chē魚，就大著驚。[AP]）

另外，tī《巴克禮譯本》中ê「無m̄是…」是kap華語白話文ê『無非、無不是…』kāng意思，有「只有是」、「kan-taⁿ是」、「不過是」ê意思，kap咱頭前所講ê語義無仝。

54. 文言文：此人不逐鬼，乃以比勒西布鬼之君也。（太12：24）
巴克禮譯本：Chit人趕鬼無m̄是靠鬼王別西卜。
現代台語：Chit個人不過是靠別西卜ê勢力來teh趕鬼。 [AP]
（Chit個人是靠鬼王別西卜趕鬼。[HT]）

55. 文言文：除以色耳以勒失羊之外，我非遣於何也。 （太15：24）
巴克禮譯本：我奉差無m̄是就近以色列家失落ê羊nā-tiāⁿ) 。
現代台語：我不過是為著以色列族失迷ê羊chiah受差派來ê。[AP]
我受差派只有是beh chhē以色列家失落ê羊。[HT]

4.3.7.4 數量語

漢語自從發展量詞以後，「數詞＋量詞」成做「數量語」ê規律結構，tī現代漢語裡beh表達人抑是事物ê數量時，bē-tàng直接kā數詞khǹg tī名詞頭前，in中間一定ài有量詞。

56. 文言文：一人無婚衣也。 （太22：11）
巴克禮譯本：一人無穿禮服。
現代台語：有一個人無穿禮服。[AP]
有一個人無穿婚宴ê禮服。[HT]

57. 文言文：耶穌同伊等來到一處名厄得西馬尼。（太26：36）
巴克禮譯本：耶穌kap in到一所在，名客西馬尼。
現代台語：耶穌kap門徒來到一個所在，名叫做客西馬尼園。[AP]
耶穌kap門徒來到一個所在，名叫做客西馬尼。[HT]

若是有「指定」ê意思，會tàng tī數量語頭前加上指稱詞（chit、hit、別、逐、toh……），當數目是「一」ê時，有時會tàng省略，省略ê規律相當複雜，鄭良偉（1997a:348）kā伊看做是人類運用「特列結構模組」ê心理現象。Tī現代台語裡，指稱詞一般無直接kap名詞結合，除了少數真有限ê語詞（譬如：別人、別物、chit-tah、hit-tah…）以外，lóng必須ài kap量詞組合成「定量複合詞」，chit個「指稱詞＊＋名詞＊」ê形式應該是古早語法所留落來ê，有地方差kap個人差（鄭良偉，1997a:350）。

58. 文言文：此人妄稱神也。 （太9：3）
巴克禮譯本：Chit 人僭權濫糝講 。
現代台語：Chit個人講褻瀆ê話！[AP]
Chit個人褻瀆上帝！[HT]

59. 文言文：我以何可比此世代也。（太11：16）
巴克禮譯本：Chit世代我beh用甚麼來比並伊？
現代台語：Chit個世代ê人我到底著用甚麼來比並？[AP]
我著用甚麼來比並Chit世代ê人？[HT]

60. 文言文：必報各人依厥行為也。（太16：27）
巴克禮譯本：Hit時，beh照逐人ê所行來報應。
現代台語：Hit個時伊會照每一個人ê行為來報答。[AP]
Hit時 ， 伊會照逐人ê所做來報答每一個人。[HT]