《當上帝開嘴講台語》

 | | | 轉寄

4.1.2 「紅皮聖經」

作者 梁淑慧 2006.09.03

4.1.2 「紅皮聖經」

1960年，天主教因應宣教ê需要，由兩位留日主修英文ê學者高積煥先生kap陳邦鎮先生著手翻譯《四福音書》，到1966年7月完成。1966年底，chit個譯本交由聖經公會邀請幾若位基督教ê聖經學者進行校譯ê工作，了後tī 1967年先出版台灣話羅馬字版ê《四福音書》，後來又根據chit個版本增譯做全本《新約》，tī 1972年底完成。《四福音書》kap《新約》lóng是由天主教kap基督教學者共同定稿，這tī譯經歷史上thang講意義重大。完成了後由天主教設tī台中ê瑪利諾會（Maryknoll）（註43）安排出版（註44）。Tī《新約》序言中特別指出，有真chē聖經學者為tio̍h chit個譯本付出辛勞，其中出力siōng chē --ê是高、陳兩位先生，tùi án-ne決定將chit個譯本號做「高陳台灣白話聖經譯本」（The Ko-Tân Colloquial Taiwanese Version），簡稱做KTV（註45）。Chit個簡稱有兩個意義，除了紀念兩位主譯者之外iáu會tàng表明這是“The Kerymatic Taiwanese Version”，其中“Kerygma”是希臘文「宣揚」ê意思（註46），所以thang 講是一本「用台語傳播好消息的聖經譯本」。因為chit本《新約》的冊皮是紅色--ê，所以一般人慣勢叫伊「紅皮聖經」。

「紅皮聖經」是tī台灣siōng早應用Nida博士翻譯原則ê譯本（註47），特別強調用ê是「現代口語ê台灣話」。翻譯者認為：只有使用大多數台灣人所使用ê現代口語chiah 會tàng正確傳達信息，並且對讀者產生影響（註48）。所以其中ê語詞、文句非常淺白。Tī語音方面是採用漳州腔，原因是：「tī台灣大多數ê台灣人lóng講漳州腔，而且差不多所有tī chia（指：瑪利諾語言學校）學台語ê外籍傳教士mā lóng講漳州腔。」（註49）序文中並附一張根據Thomas D.Carroll S. J. tī 於1956年ê調查研究所繪製的「台灣語言分布地圖」，用紅、黑兩色真清楚標示出漳州腔與泉州腔分布的地區（註50）。

鄭良偉（1987a）指出chit個譯本有以下五點特色：（一）翻譯者ê母語是台語，這kap永過先由外籍傳教士學會曉漢語了後chiah進行翻譯ê情形有真大ê無仝。（二）是天主教kap新教（基督教）共同合譯--ê。Khah早兩個教派所用ê宗教譯語無仝，為tio̍h chit個合譯本彼此做bē少ê調整。（三）語音是根據台灣ê台中腔來翻譯，kap過去使用廈門音無仝。（四）受政府禁止、沒收，所以真chē人m̄-bat見過chit個譯本，對台灣教會界無造成影響。（五）採用新ê翻譯原則（指「Dynamic Equivalence」）。翻譯ê時要求譯文會tàng忠實，有效率來表達原文ê意義，特別重視一般讀者對tī信息ê理解。語言方面mā努力擺脫原文用語kap語法ê束縛，儘量自然通俗。

既然tī語言kap翻譯風格上lóng符合大多數台灣人ê需求，咱thang預期「紅皮聖經」應該會tàng接續《巴克禮譯本》成做信徒間廣為流通ê譯本chiah tio̍h；但實際上知影抑是看過chit本「紅皮聖經」ê人並無chē，理由便是頂面鄭氏所提出ê第四項特色：「受政府禁止、沒收。」早tī 1945年台灣tú脫離日本統治ê時，國民黨政府為tio̍h加速中國化，soah來展開「推行國語」ê工作，當時主要ê目的是beh「去日本化」；後來發現「方言」chiah是推行國語siōng大ê阻力，to̍h開始tī政策上獨尊華語，打壓本土語言。甚至認為教會使用本土語言kap白話字《聖經》傳教，是妨礙國語推行kap國家統一ê行為來kā禁止，並嚴加取締（黃宣範1995；陳美如，1998；張裕宏，2001）。Koh tī 1975年沒收《巴克禮譯本》kap新譯ê台語《聖經》（註51）（也就是本文所講ê「紅皮聖經」），雖然長老教會總會tī 1975年11月18日發表「阮ê呼籲」（註52），其中ê第一項to̍h是促請政府維護憲法所賦予人民宗教信仰ê自由，歸還所沒收ê《聖經》。但政府到taⁿ iáu未歸還「紅皮聖經」，亦無任何賠償ê行動。Chit段歷史紀錄mā tòe時間ê經過被淡忘、無koh提起。所以除了老一輩ê牧師知影有chit本「紅皮聖經」以外，一般ê信徒差不多lóng m̄知有chit個譯本ê存在，所以「紅皮聖經」對台灣教會界thang講無什麼影響，只有成做後來《現代台語譯本》翻譯時ê參考niā-niā，這實在是真可惜ê一件代誌。


註43：「瑪利諾會」1911年tī美國創立，是一間專門向國外傳教所設立ê天主教修院。1951年起開始有瑪利諾會ê神父來台中傳教，本tio̍h「使用本地ê語言kap本地人親近，同齊生活，是瑪利諾會ê神恩。」chit種精神設立「瑪利諾語言中心」，是外籍神父學習台語ê語言學校，並出版有台語字典、台語教材等。

註44：後來《新約》（「紅皮聖經」）亦有由聖經公會出版ê版本，但出版年不詳。根據當時參與校譯工作ê王成章牧師ê回憶，應該是tī 1974年左右。但是「紅皮聖經」tī 1975年to̍h hō͘政府沒收去，換一句話講，「紅皮聖經」tī北部市面上ê時間無到一冬。

註45：因為「紅皮聖經」是參考Today’s English Version做藍本，所以當時參與校譯ê基督教牧者稱「紅皮聖經」做Today’s Taiwanese Version，簡稱TTV（王成章，私人通信）。

註46：原文說明如下：“The Greek word KERYGMA means to proclaim。 In the primitive Church it meant the proclamation of the Gospel as the good news of salvation。”參見《新約》（1972）序言。

註47：Tī-leh kap hit當時參與校譯工作ê王成章牧師、郭得列牧師ê私人通信中知影：1966年tī日本東京召開為期三禮拜ê「聖經翻譯研討會」，與會者由Dr. Nida及其他聖經學者指導，研讀Nida ê著作“ Toward a Science of Translating。”（1964），以「Dynamic Equivalence」做新譯《聖經》ê原則，chit個原則tī台灣siōng最早應用--ê譯本就是「紅皮聖經」，中文譯本則是《現代中文譯本》（1979）。

註48：詳見《四福音書》（1967）序言。

註49：原文如下：“The decision to use the Chiang-Chiu dialect in the Romanized spelling in this translation was made on the ground that this dialect is spoken by a greater mumber of people in Taiwan， and that almost all the foreign missioners who have learned to speak Taiwanese here， have used the Chiang-Chiu dialect。 ” 見《四福音書》（1967）序言。

註50：事實上，根據學者ê調查顯示：先人移民到台灣已經有三百gōa年ê歷史，方言間彼此移借、滲透，早就無純粹ê漳州音抑是泉州音，kan-taⁿ會tàng講是「偏漳州腔」抑是「偏泉州腔」。

註51：國民黨政府迫害白話字ê記事年表thang參考張裕宏（2001：18）。

註52：「阮ê呼籲」（1975）內容第一項：
「一．維護憲法所賦予人民宗教信仰ê自由。
　　Tī自由世界各國ê人民lóng享有充份ê信仰自由。尤其每一個人應享有自由使用家己ê言語去敬拜上帝，來表達個人ê宗教信仰。 　　
不幸，聖經公會所印行ê地方語言聖經竟然受查扣取締，chit個事件發生了後震驚海內外。有關當局以方言聖經構成違反推行國語政策為理由來取締。M̄-koh，一國ê政策絕對bē使抵觸憲法ê基本精神。如今，雖然經過幾若擺ê交涉了後已經發還舊版ê白話字聖經，但是阮陳情政府為tio̍h維護憲法上ê信仰自由，發還新譯ê白話字聖經，並允准繼續出版任何語言ê聖經。」