《當上帝開嘴講台語》

 | | | 轉寄

2.1關於《聖經》譯本ê比較

作者 梁淑慧 2006.04.23

第二章 文獻探討

2.1 關於《聖經》譯本ê比較
《聖經》tī世界上已經有兩千三百gōa種以上ê語言(註12)。根據世界《聖經》翻譯史ê研究，tùi 1500年起，英語《聖經》ê翻譯已經是世界《聖經》翻譯ê領導者（Orlinsky & Bratcher, 1991），m̄-nā有數百個英語譯本(註13)，而且《聖經》ê翻譯也是學術研究中重要ê一環。中文《聖經》翻譯ê歷史雖然khah短，到taⁿ mā有五十幾個譯本(註14)（蔡錦圖，2000）。M̄-koh因為《聖經》是一種神學經典kap翻譯作品，所以大多數ê文獻是khiā-tī神學教義ê比較來看各種譯本；抑是分析原文意義，探討譯文ê準確度；或是就翻譯理論ê發展，將譯本按照伊ê風格歸類……。本研究主要是beh tùi「語言實況化」ê觀點，來看譯本中ê語言現象kap現代人語感ê差異，kap chit-ê主題相關ê文獻有以下幾篇：

黃梅卿（1991）研究1611年出版ê King James Version（簡稱KJV） (註15)，針對新約四福音書中ê英文語法特色做探討，並kap現代ê英文語法比較。研究指出：kap現代英文比起來，KJV中ê英文語法khah自由，話句結構khah鬆散，構詞khah複雜。其代名詞kap動詞是古形，時態iáu未充分發展，時態ê用法也iáu未確立。另外McGrath（2001）藉由KJV譯本形成ê歷史kap翻譯ê背景來探討chit-ê譯本對tī整個英國，甚至英語世界所造成ê巨大影響。伊分析KJV中ê一kóa語法現象，乃是出自「忠於原文」ê翻譯理念，所以大幅保留了原文（希伯來文、希臘文）ê語句順序kap語法結構。講tio̍h代名詞kap動詞ê詞型採用古形，則是出tī當時譯者ê保守態度，chit-ê做法也影響tio̍h後來信徒ê觀念，營造出宗教語言必須使用古老語言ê印象(註16)。

中文譯本方面，劉翼凌（1954）針對1911年出版ê《和合本》(註17)譯文中，有一kóa無合tī當代中文ê部分提出改譯ê建議。伊首先o-ló《和合本》是中國近代白話文ê始祖，並認為《和合本》是華語中上美麗ê經典文學，無任何ê「載道之文」ē-tàng kap伊相比。隨後指出中文tī數十年間ê變化，並tùi語彙、文法、標點符號、流行新字等方面，列舉出《和合本》有待改進ê所在。雖然劉翼凌提出《和合本》改譯ê建議，m̄-koh伊ê態度是肯定並強調《和合本》譯文ê優美，所以伊kan-taⁿ建議做最小幅度ê修改。1979年《現代中文譯本》問世，1981年「聖經公會」彙集發表tī報章雜誌頂面ê評介文章，出版《上帝的愛：綴網集》。1995年《現代中文譯本修訂版》完成，1997年亦彙集評介ê文章，出版《書中之書的新貌》。Chit兩本文集中ê文章雖然lóng是為tio̍h評介《現代中文譯本》，m̄-koh各篇ê作者不約而同將《現代中文譯本》kap《和合本》the̍h來做比較，尤其注重tī語言方面，lóng指出《現代中文譯本》ê譯文比《和合本》koh-khah容易了解而且koh-khah流暢，可見「權威譯本」mā必須承認語言會tòe時間改變ê事實。Tùi另外一個角度來看，無kāng時代ê譯本正是提供語言學者研究語言變遷ê最佳語料。

相較之下，台語譯本因為目前台灣社會所見tio̍h ê版本只有《巴克禮譯本》一種，所以文獻真少，kan-taⁿ有「夏威夷台語教會」tī 1987年發行ê《路加福音傳漢羅試寫》一書。Chit本書tī序言中就點明著書ê目的是beh提供讀者一kóa實際閱讀ê語料，hō͘讀者ē-tàng kap一百gōa年前翻譯ê《巴克禮譯本》做對照。鄭良偉博士mā tī本冊中ê第三篇kap第四篇，分別就「語言差異問題」以及「文字選用問題」提出探討。

Tī「語言差異問題」上，鄭良偉（1987a：153-155）認為現代台語kap《巴克禮譯本》ê語言不一致ê原因在tī：
一、廈門話kap台灣話ê無仝：雖然廈門話kap台灣話lóng是漳、泉混合腔，但是in兩種語言ê發展並無一致。
二、60年來台灣話ê變化快速：語言接觸、工商發展、交通便捷、大眾傳播大量增加等等ê影響，致使台灣話緊速演變，kap《巴克禮譯本》翻譯ê時代，tī語言kap文化上有相當ê差異。
三、翻譯者kap翻譯理論ê差異：《巴克禮譯本》是外籍傳教士學會曉廈門話了後所翻譯ê，免不了受tio̍h母語英語ê影響。而且當時ê翻譯理論講求忠於原文，比較無重視讀者ê文化背景，忽略譯文中有一kóa特殊ê語法kap修辭法會影響讀者對譯文ê了解。
四、受tio̍h文言文聖經ê影響：文言文ê語法kap英文相近，kap廈門話、台灣話khah無仝。

Tī「文字選用問題」上，作者提出以「漢羅合用字」書寫台文ê新選擇。作者觀察《巴克禮譯本》tī教會中ê使用現況，指出只有老一輩ê信徒kap受過白話字訓練ê牧師看有白話字《聖經》。普遍面臨ê困境是：一般人欠缺羅馬字ê訓練，社會上也無夠額ê羅馬字讀物來培養羅馬字ê閱讀能力kap閱讀速度。加上漢字教育ê普及，多數人ê漢字閱讀速度比羅馬字khah緊，khah慣勢使用漢字。但另外一方面，若完全用漢字來書寫台文，讀者對某一kóa罕見ê漢字，會產生讀音無一致抑是誤讀ê情況。「漢羅合用字」ē-tàng講是因應以上ê困難來產生ê台語書面語形式，具備好寫、好發音、好理解、好學習、容易標準化、容易利用現代化資訊處理工具、容易促進文化交流……等優點。

《路加福音傳漢羅試寫》書後附錄「現代台語語感測驗」kap「三種文字閱讀能力測驗」，ǹg望讀者kā in回應來做成統計分析。M̄-koh chit本書tī 1987年出版了後，並無看tio̍h有關統計結果ê分析報告。本研究將參考鄭良偉博士ê理論，進一步以實際ê譯本語料來佐證，並透過問卷調查ê結果，探討讀者背景對譯本接受度kap無仝文字之閱讀能力ê影響。

註12：根據「聯合聖經公會」（The United Bible Societies, UBS）ê報告，到公元2002年為止，聖經已經有2,303種語文ê翻譯，而且各種語文翻譯ê工作iáu teh繼續進行。。
註13：參見 http://www.tyndale.cam.ac.uk/Scriptures kap http://www.growthingod.org.uk/WHICHBIB.HTM 。另外，許牧世（1997）指出King James Version（1611）（簡稱KJV）出版以前ê英譯本已經有45種hiah-chē，KJV出版到1881年間出現ê修訂版本約有百種以上。最近100年所出現ê英文譯本mā超過100 種。
註14：本文所講ê「中文譯本」純粹就「語言」來講，是指一般人所認知ê「以漢字所寫成ê華語譯本」，並無包括其他以漢字抑是羅馬字所寫ê中國各地方言譯本。「華語」是指現在大多數華人所講ê語言，是以「北京話」為標準ê「北方官話」，當初因為使用人口占中國各方言人口ê大多數，所以訂為「國語」，現在中國改稱做「普通話」。
註15：King James Version（1611）是英王詹姆斯一世為tio̍h beh統合面臨teh-beh分裂ê英國教會，聚集約五十位聖經專家，經過七年ê努力chiah完成ê英語譯本。一向被看做是英語ê權威譯本，影響ê層面廣大。
註16：Tī現代ê英語禮拜儀式中，稱呼「上帝」ê時iáu保留傳統，採用古形之代名詞。
註17：1807年頭一位新教傳教士馬禮遜（Robert Morrison, 1782~1834）來到廣州，基督教ê傳佈kap譯經ê工作便tòe teh tī中國熱烈展開。傳教早期ê中文譯本大多是由各宣教差會各自翻譯，一直到1890年ê宣教大會決議由各差會共同合作，出版標準ê中文譯本，稱做《和合本》（Union Version）。初期成立三組譯委會，分別負責翻譯「深文理（文言文）」、「淺文理（淺近ê文言文）」kap「官話（白話文）」三種譯本，當時ê口號是：「聖經唯一，譯本則三」（One Bible in three versions）。當「淺文理」ê新約部分完成了後（1900年完稿，1904年出版），中國社會ê書面語系統已經趨向淺白，所以譯委會決議將兩種文理譯本合併，合併了後ê《文理譯本全書》tī 1919年出版。另外ê《官話和合本》是tī 1906年完成新約並先行出版，1919年完成舊約並出版全書。《官話和合本》出版了後無到十年to̍h流行南北各省，銷售量遠遠超過其他譯本。1939年經過修訂了後，改名《華語和合本》（今簡稱《和合本》），成做華人教會中ê權威譯本，取代chìn前所有ê中文譯本（許牧世，1983；莊柔玉，2000）。《和合本》了後雖然iáu有其他譯本陸續出版，但是到taⁿ iáu未有比《和合本》流通koh-khah闊ê中文譯本（蔡錦圖，2000）。