Pí-sài ê kui-chek: 比賽ê規則： Lō͘-têng jī-cha̍p-la̍k mai chi̍t-tiâu lō͘-sòaⁿ. 路程二十六mai一條路線。 Khang sin-khu bē-sái chah hō͘-sòaⁿ. 空身軀bē-sái chah雨傘。 Ēng kha cháu bē-sái chē tiān-chhia thih-lō͘-sòaⁿ. 用腳走bē-sái坐電車鐵路線。 Seng kàu chiong-tiám-sòaⁿ tio̍h sǹg iâⁿ chióng-pôaⁿ. 先到終點線tio̍h算贏獎盤。 Pí-sài ê iàu-léng: 比賽ê要領： Lō͘-sòaⁿ jōa hn̄g siōng-hó pàng hō͘ bē--kì-tit; 路程jōa遠上好放hō͘ bē--記得； Lō͘-sòaⁿ chi̍t-tiâu siōng-hó mài cháu oai--chhoa̍h-khì 路線一條上好mài走歪chhoa̍h去。 Sin-khu pàng hō͘ khang-khang; 身軀放hō͘空空； Thâu-náu pàng hō͘ khang-khang. 頭腦放hō͘空空。 Cháu kah bô kám-kak siang-kha tī thô͘-kha teh cháu; 走kah無感覺雙腳 tī土腳teh走； Cháu kah phû-phû kán-ná tī khong-tiong teh phû. 走kah浮浮kán-ná tī空中teh浮。 Bô it-tēng ài cháu kàu chiong-tiám-sòaⁿ; 無一定ài走到終點線； Bô it-tēng ài iâⁿ-tio̍h chióng-pôaⁿ; 無一定ài贏tio̍h獎盤； Cháu liáu lâng nā ū sóng tio̍h sǹg cháu iâⁿ ma-la-sóng. 走了人若有爽 tio̍h算走贏馬拉爽。 --2003/5/14 Harvard
|
|
|
轉寄