《赤崁樓ê情phoe》

 | | | 轉寄

Tan Lôan

作者 Koa Pek'êng 2021.05.30



Chi̍t châng lian‧ khì ê mûikùi
Oá tī bān chí chhian hông lûnhôe ê
Chhiûⁿ’á kak
Tiāmtiām ê hoe iáⁿ
Pa̍ktio̍h góa
Bô sînhûn ê ba̍kkng

Iu’iu’á mn̄g i,
O͘ n̂g ta‧ khì ê hoephìⁿ
Bat hō͘ jōa chē tochêng ê chhiú chim‧ kòe?
Kisin ui‧ khì ê chiamchhì
Bat chha̍k siong jōa chē bô chêng ê chhiútê?

Thêngthêng ê hoeki thèⁿ kôan
Kiukiu ê hoesim i
Bô ōe bô kù

Góa bûnbûn’á sio ê ba̍kchiu
Bô sèjī bong tio̍h i
Kaukau ê tèthâu khek bóan
Pitpit ê chhiû hûn
Chi̍t sûn chi̍t sûn
Sī hn̄g‧ khì ê bi̍tphang
Sī n̂g‧ khì ê iām âng
Sī lāu‧ khì ê chhunbāng

Lāu‧ khì ê chhunbāng
Chǹgji̍p góa lāu‧ khì ê simpâng
Phû chhut chi̍t si âng gê ê kng'iáⁿ
Phah thong tn̄gchat ê kámchêng sòaⁿ

Góa khiā tī
Chi̍t ê gánsîn ê kīlî

Hô͘ chi̍t sia̍h chinsim sūnsūn’á ak
Kek chi̍t àng chêng si jiûjiû’á èng
Kiaⁿ ji̍t siuⁿ iām
Kiaⁿ sng siuⁿ tàng
Kiaⁿ hō͘ siuⁿ kāu
Kiaⁿ hong siuⁿ thàu

Ah! Sî kàu
Hoa piān khai

Kiaⁿkiaⁿ ê sim
Tiⁿtiⁿ tánthāi
Chi̍t châng lian‧ khì ê mûikùi
Tèthâu chài khai