《赤崁樓ê情phoe》

 | | | 轉寄

Lâi Bé Chháikǹg O͘h! ── Chiok ki chânchiòng chiá

作者 Koa Pek'êng 2021.08.15



Thàu tiongtàu ê ji̍tthâu, kā lûn’í ê lián’á hang chhut hûn
Chi̍t sian tòkiu ê sin’iáⁿ, chi̍t siuⁿ gō͘ hoe chháikǹg ê ēkha
Nn̄g chat ta-pô͘ ê liân’ngāu thúi
"Lâi bé chháikǹg o͘h──"

Hō͘ chhiahhóe pû kah chhut iû ê sinmiā
Kā ji̍tthâu khaiⁿ tī khachiahphiaⁿ
Pichhám ê ba̍kchiu siaplāu ko͘chiâⁿ ê kng iáⁿ
Sechngkhò͘, thòkûn ê khajiah, lâihôe sòa cháu
Liân tùnteⁿ chi̍t ē to hiah khokthâu
Âng’âng ê sim pōngtio̍h léngléng ê hânliû
"Lâi bé chháikǹg o͘h──"

Bôgîngō͘ lûikong hiônghiông phah chi̍t siaⁿ khachhiùⁿ
Hûn jú thia̍p jú kāu, hō͘ jú lo̍h jú chho͘
Goânpún êng siansian ê khathúi, cháu kah chhinchhiūⁿ piak kó͘-tī

Lâng kheh lâng ê khangphāng chhun chhut chi̍t ki siáutham ê chhiútê
Chhia tò lûn’í la̍k chi̍t me chháikǹg siám ji̍pkhì hāng’á té
Lûn’í khòngkhakhiàu, chháikǹg móa thiⁿ poe
Hō͘ ba̍ksái sīⁿ kah sausiaⁿ ê ko͘ iáⁿ tī thô͘kha pê
Thâumn̂g sàmsàm bīnsek pe̍h sísat
Chhùi’á khuikhui nââu imchúi hoah bô siaⁿ

Chi̍t ki chi̍t ki ba̍tba̍t ê chhùitûn pho͘ chheⁿthî
Léng kiki ê ba̍kchiu iûgoân léng kiki

Tapô͘ ê liân’ngāu thúi, thoa chhut nn̄g chōa chhiánchhián hoeh lō͘
Lō͘ ê chīnpōng, lánlán tôaⁿ chhut chi̍t siaⁿ kalúnsún
"Lâi bé ──chhái──kǹg──"