《CTT出頭天園地》

 | | | 轉寄

I-sap 寓言 32

作者 TLH 2007.09.23

32. Chng-kha-lâng Kap Chôa

Chi̍t-ê chng-kha-lâng ê kiáⁿ ta̍h-tio̍h chi̍t-bóe chôa ê bóe-liu. Chôa oa̍t-thâu kā kā--lo̍h--khì. In hāu-seⁿ chiū án-ni sí--khì. Chò lāu-pē--ê chi̍t-ē lia̍h-kông--khí--lâi, the̍h i ê pó͘-thâu khì jiok chôa, kā chôa ê bóe-liu tok-tiāu chi̍t-chat. Chū hit-sî khí, chôa khai-sí khì kā chng-kha-lâng chhī ê cheng-seⁿ, chò-sêng chng-kha-lâng chin-tōa ê sńg-sit.

Chit-ê chng-kha-lâng siūⁿ-kóng án-ne m̄-sī-sè, bô kap chôa kóng-hô bē iōng--tit. I chiū chún-pī chi̍t-kóa-á chia̍h--ê kap phang-bi̍t, lâi kàu chôa ê châu-khut, kā chôa kóng, “Lán lâi kā oan-siû pàng hō͘ bē kì--tit, hō͘-siōng goân-liōng. Lí kā góa ê cheng-seⁿ, sī ūi-tio̍h beh pò-siû, in-ūi góa kā lí ê bòe-liu tok-tn̄g. M̄-kú, lí kā sí góa ê hāu-seⁿ, góa pò-siû mā bô siaN2m7-tio̍h! Taⁿ, lán hō͘-siōng bô sio-khiàm-chè, sī án-chóaⁿ lán bē-tàng chò pêng-iú leh?”

Chôa kóng, “Bē-tàng! Bē-tàng! Kā lí ê mi̍h-kiāⁿ the̍h--tńg--khì. Lín hāu-seⁿ hō͘ góa kā sí ê tāi-chì, lí bô khó-lêng kā pàng bē kì--tit, chiū chhin-chhiūⁿ góa bē-tàng pàng bē kì-tit góa ê bóe-liu hō͘ lí tok-tn̄g kāng-khoán.”

Í-keng chō-sêng ê siong-hāi ē-tàng goân-liōng; m̄-kú, bô khó-lêng pàng bē kì--tit.