《CTT出頭天園地》

 | | | 轉寄

I-sap 寓言 16

作者 TLH 2007.06.03

16. Lông kap Ho̍h

Chi̍t-chiah lông teh hiáng-siū i ê la̍h-mi̍h. Bô tiuⁿ-tî, chi̍t-ki kut-thâu khê tī nâ-âu-kńg--ni̍h, thun bē lo̍h--khì, mā kha̍k bē chhut--lâi. I kám-kak nâ-âu chin thiàⁿ, chin thòng-khó͘. Tī hia chông-lâi chông-khì, ná chông ná ai. I sì-kòe khì thó kiù-peng. I kóng nā ū lâng ē-tit-thang kā hit-ki kut-thâu the̍h--chhut--lâi, m̄-koán sím-mi̍h tiâu-kiāⁿ, i lóng goān-ì tap-èng.

Chi̍t-chiah ho̍h kóng beh chhì khòaⁿ māi. I kiò lông tó--lo̍h--khì, kā chhùi khui hō͘ tōa-tōa-ê. Ho̍h kā tn̂g-tn̂g ê chiam-chhùi-kóng kap ām-kún chhun-ji̍p-khì lông ê nâ-âu-kńg--ni̍h, kā hit ki kut-thâu ngeh--chhut--lâi. Ho̍h tùi lông kóng, “Kiám ū-iáⁿ kóng góa beh ài-ti̍h sím-mi̍h mi̍h-kiāⁿ lóng ē-sái--tit?”

Lông gê-á giàng-giàng, iōng im-tîm ê siaⁿ kóng, “Lí ài ti-chiok ah lah! Lí kā lí ê thâu khǹg ji̍p-khì lông ê chhùi lāi, ē-tàng pêng-an kiu--chhut--lâi, án-ni kiám bô kàu hó-ūn? Chit-khoán pò-tap kiám bô-kàu gia̍h?”

Ah-pà ê lâng sī bô khó-lêng ē kám-un--ê.