《BONG報bong2選》

 | | | 轉寄

Chi̍t-lúi Mûi-kùi-hoe Ê Khé-sī

作者 Ko Eng-lâm 2007.10.07

Ū chi̍t-ūi sin-sū-hiaⁿ khì kàu chi̍t-keng hoe-tiàm, i àn-sǹg beh kā hoe-tiàm tēng chi̍t-sok hoe, sūn-sòa chhiáⁿ hoe-tiàm ê sin-lô kā hoe sàng khì hō͘ i ê Ma-ma.

Tng i beh kiâⁿ ji̍p-khì hoe-tiàm ê sî, khòaⁿ-tio̍h chi̍t-ê cha-bó͘ gín-á chē tī mn̂g-kha-kháu, chi̍t-ê lâng àm-àm-á tī hia chhngh. Sin-sū-hiaⁿ kiâⁿ óa kòe-khì, mn̄g hit ê cha-bó͘ gín-á. “Me-me, lí nah ē chi̍t-ê lâng chē tī chia teh háu leh?” Cha-bó͘ gín-á ìn kóng, “Góa siūⁿ beh bé chi̍t-lúi mûi-kùi-hoe sàng hō͘ góa ê Ma-ma. M̄-kú, góa bô-kàu chîⁿ.” Sin-sū-hiaⁿ thiaⁿ liáu chhiò-chhiò-á kóng. “Án-ni o͘h! Bô iàu-kín. Lâi!” Chiū khan chit ê cha-bó͘ gín-á ê chhiú tâng-chê kiâⁿ ji̍p-khì hoe-tiàm.

Tēng hó beh sàng hō͘ a-bú ê hoe-sok liáu-āu, koh-chài lēng-gōa bé chi̍t-lúi mûi-kùi-hoe hō͘ chit ê kó͘-chui ê cha-bó͘ gín-á. “Me-me, lí tòa tī toh? Góa sái-chhia chài lí tńg-khì, hó bô?” “Chin ê? Bô phiàn góa ho͘ⁿh?” “Tong-jiân mā-sī chin ê!” “Bô, án-ni lah! Mâ-hoân lí sàng góa khì góa ê Ma-ma hia chiū hó. M̄-kú, góa ê Ma-ma tòa ê só͘-chāi, lī chia chin hn̄g neh!” “Chá nā chai chiū m̄ kā lí chài ah!” Sin-sū-hiaⁿ kún-sńg-chhiò án-ni kóng.

Chi̍t-chōa lō͘ lò-lò-tn̂g, sin-sū-hiaⁿ hū-chek sái-chhia, cha-bó͘ gín-á jīn-chin chhōa-lō͘. Chhia chhut chhī-khu liáu-āu, peh chiūⁿ oan-oan khiau-khiau ê soaⁿ-lō͘, chòe-āu lâi kàu chi̍t-ê bōng-hn̂g. Cha-bó͘ gín-á kā hit lúi mûi-kùi-hoe khǹg tī chi̍t-ê tú tâi bô jōa-kú ê sin-bōng thâu-chêng. “Góa ê Ma-ma chāi-siⁿ ê sî, siōng ài mûi-kùi-hoe ah!” Cha-bó͘ gín-á ná hôe-ek ná kóng, hit ê thian-chin ê bô͘-iūⁿ, hō͘ lâng bô hoat-tō͘ kā pàng hō͘ bōe-kì-tit.

Ūi-tio̍h beh kā tú-á chiah kòe-sin khì ê Ma-ma hiàn chiūⁿ chi̍t-lúi mûi-kùi-hoe, chhian-lí-tiâu-tiâu, bô-ū pòaⁿ-kù ê oàn-giân, sim-lāi kan-taⁿ ū kám-siā, siàu-liām, siūⁿ Ma-ma ê sim-chêng. Sin-sū-hiaⁿ kā cha-bó͘ gín-á sàng tńg-khì kàu chhù, sûi-sî kho͘ hoan-thâu oa̍t tò-tńg-khì hoe-tiàm.

I khì chhú-siau chìn-chêng beh kiò lâng sàng hō͘ Ma-ma ê hoe-sok, lēng-gōa koh-chài bé chi̍t-tōa-pé chhiⁿ koh súi ê hoe. Sui-bóng ài sái 5 tiám-cheng ê chhia, mā beh chhin-chhiú kā hoe sàng hō͘ i ê Ma-ma.

Sin-sū-hiaⁿ tùi chit ê cha-bó͘ gín-á tit-tio̍h hiáu-ngō͘. Pêng-iú, lí ū jōa-kú bô kap Ma-ma kìⁿ-bīn ah? Pôe I chia̍h chi̍t-tǹg-á pn̄g, á-sī kap I khai-káng kóng kúi-kù-á ōe leh. Chit-chūn iáu ē-hù, siūⁿ tio̍h, ài kóaⁿ-kín khì chò o͘h! Goān Siōng-tè só͘ siúⁿ-sù ê pêng-an siông-siông kap lí, góa, tāi-ke saⁿ-kap tī teh, Eng-lâm tī chia chiok-hok lín.