《BONG報bong2選》

 | | | 轉寄

Sió Hioh-khùn--chi̍t-ē

作者 Tân Siù-gio̍k 2007.09.23

Chá-sî bô-êng, àm-sî bô-êng! Chi̍t-ji̍t jī-cha̍p-sì tiám-cheng, lóng teh bô-êng! Sī ūi siáⁿ-mi̍h? Sèng-keng téng-bīn kóng, “Iâⁿ tio̍h choân sè-kài, soah sit-khì ka-kī ê sìⁿ-miā.” Án-ni kám ū kè-ta̍t?

Pêng-iú, sió hioh-khùn--chi̍t-ē, tī an-chēng tiong, chù-ì thiaⁿ sim-lāi bî-sió ê siaⁿ-im, hō͘ thâu-khak chheng-chhíⁿ, thang hó-hó-á su-khó, tī jîn-seng ê si̍p-jī-lō͘-kháu, lán sī beh kiâⁿ tùi tó-ūi khì?

Kui-ji̍t o͘-pe̍h chông, bô-êng chhih-chhih, taⁿ khòaⁿ-kìⁿ hn̄g-hn̄g sêng-kong ê soaⁿ-niá, bô khòaⁿ-kìⁿ kē-kē sit-pāi ê soaⁿ-kok, tùi nn̄g-pêng bí-lē ê sè-kài, koh-khah khòaⁿ bē tio̍h.

Tán kàu ū chi̍t-kang, lí bô tiuⁿ-tî, hoat-hiān sui-jiân tit-tio̍h choân sè-kài, tān-sī sit-khì sim-lāi ê pêng-an kap hí-lo̍k, ia̍h-sī jîn-lūi siōng pó-kùi, thian-seng lóng ū ê ” ài ” ê lêng-le̍k. M̄-chai beh án-chóaⁿ ài--lâng, iā m̄-chai beh án-chóaⁿ hō͘ lâng ài. Pêng-iú, kàu hit-sî, lí sī tit--tio̍h, iah-sī sit--khì? Hō͘ lí ka-kī khì soán-te̍k.

Sìⁿ-miā sī chin té, siáⁿ-mi̍h lâng to bô hoat-tō͘ khì pá-ak ka-kī ê bîn-á-chài, tī múi-ji̍t chiok bô-êng ê sî-chūn, sió hioh-khùn--chi̍t-ē, khì chhiau-chhōe sìⁿ-miā ê ì-gī kap kè-ta̍t, chiah ū khùi-la̍t thang kè-sio̍k phah-piàⁿ--lo̍h-khì.