《台灣之愛：盧俊義牧會筆記》

| | | 轉寄

保「一桿進洞」ê險

作者 盧俊義...台語翻譯: Chuniok 2005.09.11

Tī加拿大溫哥華地區有幾間學校，來了真chē台灣、香港、中國移民ê子女teh就讀。因為chiah-ê學生ê面型、膚色看起來lóng真相siâng，但詳細聽in講起母語ê語調、口音kah-ná差別真大。tùi án-ne學校老師出一個作業，ài學生介紹伊ê家庭，thang好認識in ê背景。記落來兩則台灣移民家庭gín-á tī介紹家己父母時所寫ê︰

有一個學生講︰「阮老父tī台灣是醫生，tī溫哥華ê厝裡只有媽媽kap妹妹，平時爸爸都真少tī溫哥華ê厝，lóng是tī台灣ê厝。爸爸到溫哥華來ê時，最重要ê工作就是睏，因為早起阮beh去學校ê時，爸爸iáu teh睏。á當我kap妹妹tùi學校tńg到厝時，爸爸若m̄是teh修整庭園ê花草，就是tī客廳看電視、lim飲料。因此，妹妹講爸爸khah sêng修剪花園ê工人，koh-khah sêng一個pîn-tōaⁿ ê大男人，kan-ta會曉睏、看電視kap lim飲料。Á我發覺每pái爸爸來ê時chūn，就會phah亂媽媽作息ê時間，原本ê活動lóng tio̍h停止，為tio̍h beh陪爸爸，媽媽kā我講爸爸真辛苦，ài無閒thàn錢hō͘阮tī外國讀書。可能是時差ê關係pah，爸爸睏ê時間經常日夜顛倒。但我發現媽媽kah-ná並無啥喜歡爸爸來ê款，但是每pái爸爸beh tńg去台灣，媽媽又koh是哭kui工，真矛盾。」

另外有一個學生án-ne寫講︰「阮老父是一個真『高竿』ê高爾夫球玩家，伊每工ê工作就是開車去phah高爾夫球。伊ē-tàng講是專門teh phah高爾夫球ê，而且經常贏球，所以常常請伊打球ê朋友同齊食飯。每pái阮去食飯ê時chūn，就會聽tio̍h爸爸ê hiah-ê球友過來kā媽媽o-ló爸爸ê球技真棒，講是『一桿進洞』。媽媽kā我kap弟弟講，爸爸ê球技一級棒，我kap弟弟mā lóng感覺真光榮，有án-ne『一桿進洞』ê爸爸。真厲害。」

起先老師認為in父親是高爾夫球名將，tùi án-ne真想beh問一個á詳細，á學生koh kah-ná講bē出一個所以然來。為tio̍h beh清楚chit-ê學生ê家庭，老師tùi án-ne利用有一pái學生母親開車送伊來學校ê時chūn，特別請學生ê母親留落來談一下，chiah知影事情原來是chit種ê︰

因為有真chē台灣去ê移民，大多數m̄是真正移民，卻是beh帶gín-á去讀書ê。因此，in往往m̄是全家lóng移民而去，卻是留下丈夫tī台灣照顧事業，hō͘ bó͘照顧gín-á、陪in讀書，並無想beh久長tòa tī加拿大，總是等待幾年了後，當gín-á去讀大學ê時，就會tńg來台灣。有ê雖然也是全家移民過去，卻也因為in語言上有困難，koh加上加拿大ê就業機會無chē，因此，大多數移民去ê人lóng是閒閒tī厝。所以，差不多每工lóng會約三、五好友同齊去phah高爾夫球。因為chit種ê球類運動tī加拿大真便宜，無像台灣hiah-nih貴。橫直便宜，而且ē-tàng趁機會運動、運動。就án-ne，日子久了，球技進步真緊。

Tú開始ê時chūn，是一下無小心phah出「一桿進洞」，家己感覺真gōng-gia̍h，á球友in則是一再o-ló球技媲美職業高手，陶醉之餘koh加上一句「請客」，tùi án-ne就tī一陣人歡喜氣氛非常厚ê情況下，就真正請大家同齊去食飯，也順續chhōa bó͘-kiáⁿ去，利用機會誇口一下。Án-ne就形成一種特有ê慣例，只要phah出「一桿進洞」ê人，就ài請客。無想tio̍h後來jú打jú順，球技也jú進步，「一桿進洞」ê頻率也jú高。久了後，請客就無koh是一種快樂ê事，反tńg成做一種財力上極大ê負擔。因此，就去保險公司投保「一桿進洞」ê險，只要有phah出「一桿進洞」，就由保險公司理賠。但是，保險公司也lóng是精打細算ê高手，每年只理賠一定ê次數，若是超過chit-ê次數，隔年ê保險費就beh提高。宴客ê壓力也tùi án-ne jú沉重，滿足kap成就感ê興致反tńg相對減低落來。

台灣人kah-ná是有種基因上ê問題pah，就是對讀書kah-ná並無感興趣，無論tī火車頂、飛機頂、捷運頂非常少看tio̍h有人閱讀書報雜誌，甚至tī hit種美好ê環境中，也非常少會想tio̍h beh利用機會加看幾本書。其實，tī hit種ê環境中，若能加讀幾本書，加行幾間圖書館、美術館、博物館、科學館等chit種相當有內涵ê文化遺產之地，應該是ē-tàng hō͘人tī擁有財富之餘，也會加一點á書香品味pah。（華語原載於自由時報2004年11月7日第15頁）

盧俊義牧師的個人網站。