《台灣之愛：盧俊義牧會筆記》

| | | 轉寄

Tùi兒童營到教育中心

作者 盧俊義 2007.09.02

為期兩個禮拜ê暑期兒童營終其尾也結束loh，真chē同工lóng講：「真thiám」。確實無m̄-tio̍h，福音事工若是真正beh好好á做，真正是真thiám。Ē-sái講是，當有一工，咱聽tio̍h有某一個家庭、某一位青年、toh一家gín-á因為參加咱教會ê兒童營，後來就信耶穌，我深信hit時，咱內心深處lóng會大聲歡呼，直講：「感謝上帝ê救恩」！這ná親像詩人所講ê：「願含目屎掖種ê人，lóng歡呼收割！」（詩篇一二六：5）

有人問我講：「盧牧師，你怎樣會想beh帶教會家己編寫教材neh？這是真食力ê工作耶！」這是一位國小退休ê老師向我提出ê問題。tī學校教冊ê人lóng知影，單單準備課程就真thiám，若講beh家己編寫教材，he真正是一件koh-khah食力ê事。Án-ne我為甚麼beh án-ne做？原因只有一點：咱有chit種ê能力，就應該án-ne做！

我siōng驚ê一件事，就是pîn-tōaⁿ。每一個人lóng有惰性，當惰性養成了後，想beh重新tńg來勤勞，是非常痛苦ê。信仰koh-khah是án-ne，若是咱參加聚會有了pîn-tōaⁿ ê心意，就會開始對聚會冷漠，到最後，連想beh去禮拜mā lán-si，動mā動不起來。

教會ê事工mā是án-ne，若是ē-tàng減少一件事，就會進一步koh減少兩件事，然後，聚會ê次數就會一一遞減，到最後，除了禮拜日ê聚會以外，其他ê聚會lóng免lah。Chit種ê教會，tī信仰ê品質上kan-ta會jú來jú差，bē提升。因此，咱看tio̍h一間有活力ê教會，呈現出來ê，就是真chē無仝ê聚會、活動。

咱教會當然mā ē-tàng m̄免家己編寫教材，直接採用現在一kóa兒童宗教教育單位出版ê教材，包括有咱總會教育委員會ê教材（舊年二○○六ê教材就是咱教會編寫，然後送hō͘總會出版ê）、中國主日學協會、道光、彩虹、哈哈熊等單位出版ê教材，內容mā lóng真有活力。只要購買其中任何一種教材就ē-tàng。為甚麼我無án-ne做？真簡單，因為我知影咱教會ē-tàng家己做，而且mā做得不差。

Án-ne講起來，並m̄是咱台北東門教會人chē、財力厚，我講咱有chit種ê能力，是因為我知影：只要咱肯，就ē-tàng做好chit件事。

Tùi神學院畢業去關山牧會到現在，我lóng是家己做教材。過去ê教材lóng真陽春，無像現在án-ne，hiah-ni̍h齊全。過去tī嘉義，辦寒假一禮拜、暑假兩禮拜，教材lóng是家己編寫，老師家己訓練。因此，即使是tī關山hit種邊遠地區，tī嘉義hit種二級都會區ê教會，除了詩歌是採用別人ê作品以外，聖經ê物件lóng是家己編寫。因為家己編寫教材，所以非常清楚教會ê環境有kóa甚麼材料thang用，mā知影用甚麼款ê喻道故事作題材。這對所有參加ê小朋友來講，是非常有幫助ê。

編寫教材，對傳道者來講，確實是一件真大ê負擔，但卻是真重要。因為án-ne chiah ē-tàng幫助傳道者思考一件事：án-ne聖經題材是m̄是適合教導小朋友？譬如十條誡命，ài教hō͘小朋友ê，是全部mah？á是只要其中ê幾誡？對猶太人ê細漢gín-á來講，自細漢就ài背誦十誡，而且有經學教師teh教導十誡ê內容。In會真清楚kā gín-á講，第七誡「犯姦淫」，就是離棄上帝ê意思。任何一個猶太人若是無專心敬拜上帝，就是犯姦淫ê人。Chit種ê人，是上帝所無歡喜ê對象。

但阮/咱lóng清楚，在台灣咱是bē-sái án-ne教導細漢gín-á ê，特別是咱ê兒童營有真chē細漢gín-á，是來自非基督徒ê家庭，咱顛倒是beh教所有ê小朋友，kā in講：耶穌歡喜所有ê gín-á，即使你m̄-bat耶穌，耶穌iáu是仝款愛你。

Koh講，tùi編寫教材開始，教會就會開始漸漸產生一股凝聚力，chit種力量表面上看bē出伊ê張力，但卻tī暗中teh醞釀。Chit股張力會繼續到兒童營結束chiah停止落來。Chit點ē-tàng tùi兒童營ê詩歌看出來。因為是咱教會家己編寫教材，包括張紀盈長老、潘茂涼長老、荏荏曼傳道等，lóng bat tī詩歌頂面有新ê創作出現。Á咱mā有一陣灌製錄音ê同工，為tio̍h hō͘故事tī CD片頂面講得koh-khah聽了感動，「假聲、虛音」等，chiah-ê lóng由咱chit群同工家己想辦法「製造」出來ê。

Á教材tī編寫ê過程中，一定會tú-tio̍h真chē聖經難題，mā會發現過去所無想過ê信仰問題，卻tī編寫教材ê時chūn出現，chiah-ê lóng是非常重要ê事，因為編寫ê同工已經發現有問題，若是無編寫，非常少會注意tio̍h家己對經文ê認知、了解出現了狀況。

今年ê教材tio̍h感謝張仁和牧師，伊是tùi頭看到尾，並且提供了真chē參考意見hō͘編撰者，這對張牧師來講，mā是一項真好ê考驗，hō͘伊知影無仝ê同工寫出來ê經文信息，差異真大，卻beh將in編撰作伙，就需要一kóa時間去整理。江淑文執事ē-sái講是非常難得，伊siōng辛苦，因為所有教材內容lóng OK了後，koh來就是伊ê工作；伊必須將chiah-ê聖經故事ê教材，以及包括其他同工寫出來ê喻道故事、活動、手工藝等等，全部lóng彙(lūi)整出來，莫怪伊有kúi-nā-pái kā我講，已經熬夜幾á工lah。Ná親像蔡尚穎長老向我吐苦水，講為tio̍h編輯咱教會《六十週年回顧》，伊ê寶貝bó͘林淑芬姊妹已經熬夜真長一段時間lah仝款。

就是因為咱家己編寫教材，真chē其他教會ê主日學老師、兒童營老師等，lóng會來問in採用ê可能性，咱lóng持守tio̍h一個主要觀念—分享。咱bat教導過gín-á tio̍h「kā愛傳出去」，mā kā gín-á講：「分享就是chiah-ni̍h EASY」。因此，當有人beh向咱索取chiah-ê教材ê時，我lóng是講「無問題」。頂個月底就有一間教會ê長老來kā我講：「盧牧師，阮今年是採用lín前年用過ê教材『kā愛傳出去』，確實真chán！」其實，in m̄-nā是採用咱教彙編寫ê教材，in mā來kap我討論所寫ê內容，以及問一kóa主題編寫ê方式。

Tùi兒童營直到現在ê團隊編寫教材，我開始積極teh思考怎樣將「教育中心」kā伊落實出來？這是一件真重要ê事工，m̄是辦公室ê問題，卻是kui-ê教材發展方向、師資ê培訓、資料室ê建立等等，chiah-ê lóng需要一kóa時日。當chit種ê構想漸漸teh接近ê時，我卻發現咱教會ê硬體koh無夠用loh。原因是有台灣神學院beh使用禮拜堂大樓ê五、六兩樓當作辦公室、研究室。不過，我想無關係，等有一工，chit項教育中心漸漸成熟ê時，我想就ē-tàng期待頭前ê舊樓房，會成做咱教會ê新資產（看，我lóng是teh做chit種「白日夢」）。我真是希望咱教會koh過無gōa久，就ē-tàng成立基督教兒童主日學教材研發中心。若是chit-ê tāi-chì ē-tàng成真，he會是一件真值得紀念ê事。

盧俊義牧師的個人網站。