《台灣之愛：盧俊義牧會筆記》

| | | 轉寄

無教導就無進步

作者 盧俊義 2006.05.28

1980年4月，我受邀請去瑞士訪問，因為知影我對幼兒教育事工有趣味，所以朋友就chhōa我去看腳球場外ê一個托兒中心。

歐洲人對腳球真熱衷，只要有名ê球隊出賽，球場差不多lóng是人。雖然有電視轉播，但臨場感iáu是真無仝款。為tio̍h滿足人民看比賽ê需要，瑞士政府tī腳球場邊á也起一個小小ê「汽車教練場」。所謂「小小ê」，就是hō͘ gín-á學習交通秩序ê地方，m̄是學開車ê場所。車是腳踏ê四輪車，主要目的是hō͘ gín-á學習認bat交通信號，以及應該遵守ê交通規則。瑞士ê法律規定︰若有iau-bē滿12歲ê gín-á tī厝，必須有滿16歲以上ê人tī家陪伴，歐美國家差不多lóng是án-ne。Án-ne，若有學齡gín-á tī厝，koh想看腳球賽，是beh怎樣處理？In ē-tàng將gín-á chhōa到球場邊á ê「汽車教練場」交hō͘交通警察，chiah-ê交通警察這時就擔任起褓母ê工作。In hō͘父母一個號碼牌，然後gín-á穿同號碼衫褲，並繳褓母費用（比較正確ê講法，應該是「上課費」），準備去教練場上課。

In ê方式是︰先到教室去上課，警察褓母會教in認bat一kóa交通信號，這是第一節課。續落來第二節課是hō͘ gín-á看影片，明白警察指揮交通ê手勢，kap看tio̍h救護車、消防車時，應該怎樣讓路等等交通實況ê影片。這兩節課上了後，歇睏20分鐘，有簡單ê茶點thang吃。續落來第三節課就是實際去腳踏「汽車」。只要違規，就扣分、記點，並且iáu有「罰款」（象徵性ê一元、兩元），若是「車禍」發生，應該怎樣聯絡警察處理等等實況操演。教練場也有平交道、單行道，siōng重要ê，有kóa十字路口iáu有交通警察teh指揮，因為可能信號壞去，á是發生車禍處理中等等，án-ne落來，前後差不多需要三點鍾ê時間。就án-ne，父母ē-tàng安心看球賽，gín-á會sńg kah真歡喜。

類似這種ê球場kap小小「汽車教練場」之設施，tī各大城市lóng有。莫怪in每年因車禍死亡ê人數相當少，除了in守法觀念真強外，siōng重要ê，就是in tùi細漢就知影怎樣遵守規則，因為in將chiah-ê學習ê知識應用tī生活中。這就莫怪tī 1993年發生全國因車禍死亡23人，in就感覺受不了了，聚集成千萬ê人民tī北部大城蘇黎世遊行抗議，講政府無好好管理交通秩序。比起咱tī過去兩年，kan-taⁿ學生因車禍死亡ê就有614人（受傷ê無算在內），但是並無引起任何政黨、人民注意，koh-khah免講主管交通單位，以及教育機構會重視。

這hō͘我想起此遍全民公投ê事，蔡同榮先生自美國tńg來就一再講beh推動全民公投，也辦了幾pái大型全民公投遊行活動，但lóng m̄-bat聽過有任何教育ê工作釘根tī民眾ê中間，莫怪這遍全民公投一hoah出，並無jōa-chē民眾了解到底是beh做什麼，甚至連高層知識份子lóng公開反對全民公投，真是hō͘人笑也m̄是，哭也m̄是，實在是真可惜ê一件事。這遍民進黨輔選陳水扁連任總統，差一點點á就hō͘國親兩黨翻盤過來，會án-ne，就是過去4年時間，民進黨真少tī各地教導民眾知影，到底in執政了後做甚麼事？改革了gōa chē國民黨留落來ê弊病？就連接管農會信用部是正確ê政策，但是有jōa-chē農民知影neh？

民進黨今後koh有4年執政ê時間，若無好好利用這4年進行民眾釘根ê教育工作，萬一國民黨新生代幹部行得快，跑得勤，課開chē，恐驚4年後再繼續選，也是仝款會真艱辛。因為無教育，就bē有進步。而要進步，就需要繼續不斷地教育，án-ne chiah ē-tàng hō͘民眾kap政府ê施政連作伙。

（原刊tī自由時報2004年3月28日第15頁）

盧俊義牧師的個人網站。