《台灣之愛：盧俊義牧會筆記》

| | | 轉寄

小留學生tī美國醫學院

作者 盧俊義 2006.05.21

這是發生tī美國兩間出名大學醫學院ê小故事。

有一個國中畢業了toh hō͘父母chhōa去美國讀書ê台灣學生，大學畢業成績相當優秀，申請tio̍h史丹福大學醫學院，入學委員會ê教授beh對申請入學學生進行口試。這位台灣學生去應試了帶tio̍h鬱卒ê面tng去，一入家門看tio̍h聽候佳音ê父母就隨時háu出來。母親kui面gōng-gia̍h，抱住gín-á一直teh án-tah伊，父親koh-khah是問bē停，想beh知影到底發生了什麼tāi-chí。過了真久，chiah hō͘ gín-á小khóa平靜落來，ûn-ûn-á講口試時ê狀況。

原來chiah-ê醫學院教授是án-ne問ê︰

「你kám知影現在tī NBA球隊中，tó一支球隊siōng hō͘人看好？tó一個球員表現siōng出色？」

「職棒大聯盟中，tó一支隊伍siōng有可能得tio̍h冠軍？phah出siōng chē支全壘打ê明星是chī-chūi？」

「舊年全美國好萊塢影片中，你siōng kah-ì tó一片？tó kui片得tio̍h奧斯卡金像獎？chī-chūi主演ê？」

「舊年得tio̍h諾貝爾醫學獎ê chī-chūi？研究什麼題目？主要內容是tī討論什麼？」等等類似這種題目。

原來這個gín-á tī高中kap大學時代，差不多就是tī厝裡kap學校兩個所在來來去去，父母kā伊講，kā所有ê精神都放tī大學畢業後入醫學院去，生命ê價值就是做醫生。因為父親tī台灣也是一個醫生，初、高中時代就是án-ne行過來ê，伊kā家己ê經驗kap價值觀念「影印」tī gín-á身上。Hiah-ê教授也問伊平時lóng tī做些什麼tāi-chì？問伊厝裡iáu有甚麼人？然後koh問伊ê厝邊叫甚麼名字？gín-á傷心地告訴母親︰「媽，in怎樣lóng會問chiah-ê題目？lín不lóng是kā我講，mài去管chiah-ê電影明星á是球隊比賽ê mah？你看，人家問ê lóng是chiah-ê題目，無人問我學校課業。」

Gín-á ê媽也感覺真奇怪，kám講chiah-ê醫學院教授平時lóng無專注tī研究，kan-ta會看球隊比賽？á是kan-na知影看電影？問chiah-ê lóng kap入醫學院ê tāi-chì無關係，這種ê口試真不公平ah﹗咱tau隔壁住ê是chī-chūi？這kap gín-á beh入學有什麼關係neh？真是奇怪ê老師，美國人真奇怪﹗

我想這若是發生tī咱台灣，包準會遭到民意代表嚴厲抨擊，甚至會抗議口試不公、撤換校長á是主管教育ê部長。

另一件發生tī哈佛大學醫學院。有一個台灣學生ê家長tī第一學年結束後，接tio̍h通知到學生心理輔導室去。輔導室ê負責人對這位學生家長講︰「你gín-á過去一年上課情況真好，學業成績也bē-bái，但學院評鑑結果，認為你ê gín-á lóng kan-ta會家己一個人做研究，bē kap別人做伙討論問題。醫學是需要團隊學習ê，m̄是kan-taⁿ靠家己一個人，即使你ê gín-á有真好ê 才能，也必須會曉知影怎樣kap別個同學做伙做研究。所以，教授評鑑結果決定你ê gín-á必須接受定期輔導，而且lín家長mā ài參加，來幫贊gín-á行出家己「一個人ê世界」，hō͘伊知影怎樣kap別人分享伊ê讀書心得，以及學會和同學同齊討論、做研究。Tī這一年中阮會觀察、評估，án-ne，一年後阮會koh重新討論是m̄是hō͘伊繼續讀下去。」

家長聽了後，無法度理解學校這種ê決定，心內想tio̍h︰怎樣會有這種ê學校？就是因為gín-á上課情況良好，成績也bē-bái，所以根本不需要kap其他同學同齊研究，家己就有辦法，án-chóaⁿ ài kap其他同學同齊做研究？教授thài會講咱ê gín-á無成熟？真奇怪ê美國人ah﹗但為tio̍h beh hō͘ gín-á繼續讀醫學，父母也只好講「是、是」ê，m̄敢將心內ê不滿講出來。

一個kan-ta會曉讀學校教科書，m̄知外面世界kap社會動態ê年輕人，大漢了後，也kan-ta知影家己，bē關心生存社會動態，這種人，雖然有真súi ê學業成績，生存能力iáu是真薄弱，而且一個好ê醫療工作者，應該是對社會現象有敏感度ê人。

人若是只知影家己，m̄知kap別人分享家己ê研究心得，也bē kap別人討論所發現到ê問題，這是真自私ê人，而醫師是良知ê工作，私心不得。學會曉幫贊別人ê第一件事，就是會喜歡kap人分享，若無，不是一個好ê醫療工作者，也bē hō͘病人kap社會大眾尊重。

（原刊tī自由時報2004年7月11日第15頁）

盧俊義牧師的個人網站。