《台灣之愛：盧俊義牧會筆記》

| | | 轉寄

施乾──台灣人道主義ê先驅

作者 盧俊義 2006.01.29

一談起人道主義，大眾所siōng津津樂道ê，就是到非洲去ê史懷哲博士（1875∼1965），以及歸化印度籍ê德蕾莎修女（1910∼1997），in兩人lóng先後分別得tio̍h諾貝爾和平獎。In ê故事m̄-nā tī世界各地teh傳頌，也tī台灣各地經常hō͘人提起。

其實，tī台灣也有一位人道主義者，伊就是艋舺「愛愛寮」ê創辦者施乾先生。

一八九九年出tī台北淡水出世ê施乾先生，原本是tī日據時代ê總督府工作，chit份工作tī當時ê人看起來，thang講是待遇相當好而且有榮譽ê身分。但是有一年，伊因為工作上關係，受派去艋舺調查當地乞丐ê生活狀況，chiah發現當時乞丐生活陷入極為貧困ê狀態中，hō͘伊生出憐憫ê惻隱之心，決定獻出家己所有ê力量來幫助艋舺ê乞丐。伊辭掉大家所羨慕ê總督府工作，tī今á日台北大理街購買一塊地，起一間專門收乞丐ê收容所，這就是現今被稱之為「愛愛院」ê前身──「愛愛寮」。

施乾先生最hō͘人感動ê所在，就是伊m̄-nā起「愛愛寮」收容乞丐，而且是一間人kap眾乞丐同齊生活，kap in tòa作伙、照顧in，教導in學習謀生ê技能，像編織草笠á、菜籃á、竹器等等。因為「愛愛寮」愛乞丐ê風聲傳聞真緊，隨時有真chē被家庭遺棄ê痲瘋病人、精神病患，以及食鴉片上癮ê社會邊緣人，陸續上門來求助收容，致到伊拚盡所有家伙了後，iáu是無法度維持落去，只好求助日本殖民政府，以及向一kóa商家kap民間募捐。

有一工，日本一位出名ê作家菊池寬來台灣訪問，發現tī台北市竟然無看tio̍h乞丐ê蹤影，甚為bē了解，認為無可能，因為台灣是日本ê殖民地，tī東京有乞丐，被殖民ê台北怎樣可能無？後來tī接待者ê告知之下，chiah知影原來是施乾先生將chiah-ê人收容到「愛愛寮」去lah。Tùi án-ne，伊也去訪問，並tī回國了後，將伊所看tio̍h ê實況tī日本報紙寫出「愛愛寮」ê故事。日本天皇因為讀tio̍h菊池寬ê報導深受感動，iáu bat捐出三千日圓hō͘ in鼓勵，致使「愛愛寮」有koh-khah充足ê經費ē-tàng收容koh-khah chē ê乞丐、流浪漢。

有人問施乾先生，為甚麼beh做chiah-ê事？伊講如果咱想beh解決社會問題，就必須先tùi解決乞丐ê事著手，因為乞丐乃是社會「最下層ê人民」，也是一個社會最基本ê問題所在。Tī伊ê看法中，最下層ê無解決，上層ê問題就會繼續擴大。

施乾先生ê義行甚至感動了一位日本京都第二高女畢業ê女子，願意來台灣嫁hō͘當時iáu是一個鰥夫身分ê伊，為tio̍h是ē-tàng全心全力協助施乾先生照顧chiah-ê台灣最低階層貧困ê乞丐、流浪漢。Chit位就是二○○一年十二月九日tī台北和平醫院安息ê施照子女士。

最近舉辦一pái全國性本土教育研討會，與會學者專家lóng紛紛指出台灣教育問題之一，就是中小學本土教材嚴重不足。若是將之比對十一月十五日出版ê天下雜誌用真chē篇幅teh討論有關台灣教育問題時，就是獨缺探討教科書內容ê問題，真是可惜至極﹗因為教科書會影響tio̍h老師備課ê意向，也會影響tio̍h學生對生存環境ê認知。台灣社會之所以缺乏對土地有愛、對貧困、弱勢者有情ê原因，主要就是對本土人文素材認知嚴重缺乏，甚至有藐視本土歷史、地理ê內涵，這chiah是真正學生品格教育出問題ê癥結所在。

像施乾先生chit種ê善行，其實是ē-tàng媲美德蕾莎修女ê，伊所做ê事，lóng足堪得編成教材來教育咱chit一代ê gín-á，這m̄-nā ē-tàng hō͘咱ê gín-á看tio̍h先人美好ê腳跡，甚至iáu ē-tàng hō͘ gín-á in　tùi現今尚存ê「愛愛寮」，學習tio̍h　thang投入接續照顧貧困者ê行列，hō͘咱ê社會加一分安靜、和諧ê心。 （原載於自由時報2003年11月30日第15頁）

盧俊義牧師的個人網站。