《台灣之愛：盧俊義牧會筆記》

| | | 轉寄

原來她就是井上魯鈍

作者 盧俊義 2006.01.22

一九八七年十一月中旬，tī日本ê台灣獨立運動組織所發行之刊物「台灣青年」，突然接tio̍h一筆一百萬元日幣ê捐款，內面附上兩chōa字寫講︰「井上魯鈍突然死亡，為tio̍h尊重故人ê願望──台灣獨立，今á日寄上香奠ê一部分。井上魯鈍之夫啟上。」

Chit時，台灣青年ê編輯同工chiah明白原來「井上魯鈍」是一位女性，而且是六個子女ê母親。一九八七年十月廿六日去世，享年kan-taⁿ五十歲（1937∼1987）。

Chit位名叫「井上魯鈍」ê婦女原名黃聰美，台南市惠生醫院院長黃履鰲醫師kap夫人楊金枝醫師ê女兒，也是一位婦產科醫師，兄弟姊妹全lóng是醫師，thang講是醫生世家，一家人lóng是基督徒。

因為雙方父母lóng深受日本「無教會主義」創設者內村鑑三先生ê影響非常深，黃聰美醫師kap伊ê日籍夫婿伊藤邦幸醫師，婚後兩人lóng加入了日本基督徒醫療傳道協會，並志願到尼泊爾山區去服務。後來因為子女長大中學教育ê需要，全家六口tńg來到日本受聘tī醫院工作。Tùi hit時chūn起，黃聰美醫師就固定每個月捐出五萬元日幣hō͘「台灣青年」刊物，表示支持該刊物ê發行，伊用ê名字就是「井上魯鈍」。

黃聰美醫師之所以會每個月寄錢去支持「台灣青年」刊物，起因是伊有一個小弟名叫黃聲義，tī中學ê週記頂面評論日據時代kap國民黨統治之下ê台灣，二者之間tī教育上ê差異，結果被學校以「思想有問題」勒令退學。後來轉學到台北大同中學就讀，課業相當亮麗，hit間學校從來無收過hiah-nih優秀ê學生。果然bē-bái，黃聲義後來就是以優異成績考tiâu台大醫學院醫科，但無想tio̍h畢業了後，卻tī金門服預官役時「意外去世」，chit件事深深影響tio̍h伊對台灣前途ê看法。

伊bat tī日記上án-ne寫講︰「tī他鄉求學離家鄉遠遠ê孤獨一人，tú-tio̍h一位男性，了後相愛，進一步koh結婚。婚後因為beh kap夫婿共同負起對六個子女ê重擔，家己bē-sái自由自在來祖國台灣做一點á事而煩悶。三不五時想tioh8beh為台灣獨立奔走，有時也會想起hiah-ê受害，或被關tī牢獄裡ê政治犯，實在坐立不安。為tio̍h補償，最起碼用家己ē-tàng自由安排ê金錢來參與台灣獨立，chiah會hō͘心情寬裕一點á。」（摘自一九九二年七月廿六日台灣教會公報。）就án-ne，tī日本台獨運動發行之「台灣青年」刊物就成做伊全力支持ê對象。

伊ê翁婿伊藤邦幸博士講，有一pái in夫妻兩人去參加朋友ê宴會，tī宴席上大家輪流分享生活裡有趣味ê點滴而談及生命中ê大願時，多數ê人lóng下了類似「完美人生」、「子女考tiâu名校」、「成做事業家」等等之類ê未來願景，唯獨黃聰美醫師講「願台灣獨立早日實現」，當時眾同學lóng gōng-gia̍h伊是chit種ê願望，一個已經嫁hō͘日本人，而且也已經入籍日本ê女醫，竟然iáu án-ne執著ài終其一生ê職志，teh等看見台灣獨立chiah肯受安慰。

一九九二年九月十四日，我kap鄭仰恩牧師去波士頓訪問台灣圖書館學先驅，也是台灣教會歷史學家賴永祥教授，伊特別邀請當時tú-teh哈佛大學醫學院進修，準備再次去尼泊爾醫療服務ê伊藤邦幸博士來跟阮認識。我問伊藤邦幸博士，為甚麼伊ê bó͘黃聰美醫師會用「井上魯鈍」chit-ê名字？伊講這是為tio̍h beh學習kap紀念一位bat到台灣、投入山地原住民部落醫療傳道工作ê名叫「井上伊之助」之日籍醫師，伊心中最感念ê就是chit位日本人chiah-nih愛台灣，因此，伊就取了「井上」chit-ê前段名字，後段ê「魯鈍」，tùi án-ne是取名自俄羅斯作家托爾斯泰所寫ê「呆子伊凡」hit篇小說，表示家己真「蠢」、「遲鈍」到只ē-tàng為故鄉台灣做chiah-nih一點點á ê小事，卻tī期待「獨立」chit-ê大願望ê實現。

Tī談及對台灣獨立ê看法時，我被伊藤博士ê話感動，伊講︰「所有ê獨立是tùi個人內心真誠ê決斷開始，m̄是求黨派ê利益，卻是必須重視正義。除了上帝以外，bē-sái驚惶任何存在。除了罪以外，無推辭對任何弱者ê關愛。有koh-khah chē chit種人ê時，真正ê獨立、自主chiah有可能達成。」伊ê chiah-ê話對今á日tī台灣所有投入政治、教育改造、社會運動者來講，應該是真受用chiah-tio̍h。

一九九二年十二月四日，伊藤邦幸博士因為腦中風入院，無久就別世。但伊夫妻兩人對台灣ê愛kap期待，永遠留tī我心中。 （原載於自由時報2004年7月4日第15頁）

盧俊義牧師的個人網站。