《台灣之愛：盧俊義牧會筆記》

 | | | 轉寄

浣熊母kiáⁿ過馬路

作者 盧俊義...台語翻譯: chuniok 2005.10.09

八月初到加拿大溫哥華台灣人教會去演講，車開到大馬路十字路口，前面ê車輛突然停落來，心中當感覺gông-gia̍h，因為既然聽bē-tio̍h救護車、消防車、警備車種ê尖銳笛聲，也看bē-tio̍h有chiah-ê車輛快速開車ê影跡，明明是綠燈，但怎樣十字路口ê車輛lóng停落來neh？真奇怪ah，為甚麼lóng無人開動車neh？kám講是有人出了車禍to̍h bē-sái得？Tú-teh giâu疑ê時，有人行落車往前行去看bāi究竟，oh，原來是一隻母浣熊teh帶三隻小浣熊tú beh行過馬路。In看m̄-bat路燈信號，但卻真有秩序teh順人行斑馬線行。就tī伊帶三隻小浣熊tú行上斑馬線時，第一台車看tio̍h，隨時緊急踏車擋，續落來接續tòe後面ê車輛也一台接一台停落來，無任何一台車chhih喇叭，也無任何一台車開到斑馬線邊緣，十字路口ê車lóng停tī等距離ê停車線內，就是為tio̍h要hō͘ chit隻母浣熊帶伊ê三個gín-á tī無驚險ê威脅之下ûn-ûn-á行過，等到in一家四口lóng行上行人道上安全島邊了後，所有ê車輛chiah ûn-ûn-á開動。無人開嘴罵，也無任何一位駕駛有急躁、厭惡ê表情出現，kah-ná大家lóng知影任何小動物beh經過馬路，看tio̍h ê車輛就tio̍h先停落來讓路。其實，tī歐美ê社會，大家lóng清楚知影︰只要有人ê腳一踏上斑馬線，任何車輛lóng tio̍h停落來，連靠近行人ê身邊也m̄敢，只ē-tàng以相當尊敬ê態度，hō͘行人先行通過，等到斑馬線頂lóng無人了後，車輛chiah ē-tàng繼續向前行過去。

有一pái tùi台北市仁愛路搭計程車beh去館前路，車開到公園路kap襄陽路ê交叉路口附近，有kóa行人並無按照紅綠燈信號以及tī行人專用白線道上過馬路，有kúi-nā-pái lóng差一點á lòng-tio̍h突然tùi路邊插入ê機車或強行穿過馬路ê行人，若m̄是駕駛先生反應靈敏，必定會對對相lòng，因此，駕駛先生真感慨表示講︰「台北市民kah-ná lóng是色盲，看m̄-bat紅綠色燈號標誌，明明是紅燈，mā硬beh行過來；明明有行人專用白線通道，偏偏m̄行。難道真正差he一、兩分鐘to̍h bē-sái得？萬一lòng-tio̍h，我seng-lí做無成無關係，人殘廢了，恐驚一世人ê日子lóng會真oh過。」Teh講、teh講，又koh接一句講︰「koh-khah hō͘人受氣ê是，明明是對方錯誤，lòng-tio̍h iáu-tio̍h為in賠上甚麼『道義責任』ê醫療費、甚麼精神損失費，真hō͘人氣結﹗先生，你知影mah？講來可能你m̄相信，我tī台北市開車已經beh三十年lah，我發現台北市ê流浪狗比人khah bat得紅綠燈kap行人道oh，in比人khah有水準，知影遵守交通規矩eh。M̄信ê話，你注意一下就會看tio̍h。」

我聽了隨嘴應講︰「先生，bē pah？你這是氣話pah，我知影確實有人是真正會將紅綠燈當做參考用，這是經常聽tio̍h ê一句話。但台北市民應該真有水準chiah-tio̍h。我看大家lóng iáu真尊重燈號ê，而且警察也掠了真ân，m̄是mah？」

駕駛先生聽我án-ne講，真無同感講︰「比起外縣市可能有khah好，但無水準ê iáu是一大堆。Mài認為穿西裝ê就真紳士，也mài看tio̍h穿真入時ê女士就認為真高貴，無，行路m̄看紅綠燈ê iáu是bē少，kah-ná馬路lóng是in tau ê。愛怎樣行，就怎樣行neh﹗」

大概是因為過去有無好ê車禍經驗，chiah會hō͘ chit位駕駛先生對行人、機車ê印象非常無好pah，若無怎樣會一看tio̍h有人無遵守交通信號就chiah-nih受氣。Teh想、teh著，就tī hit時車tī館前路ê一個十字路口等綠燈to̍h，tú好前面有一群行人行過去，其中有兩隻無人牽ê狗也跟tòe tī人群中行過。駕駛先生看tio̍h隨時tùi後照鏡中對我講︰「先生，你看tio̍h無，我講ê無錯pah，狗也會遵守交通規矩，不但(m̄-nā)綠燈chiah行，也知影行行人專用ê白線道eh。」我kap阮bó͘望眼看過去，果然真正是án-ne，禁bē-tiâu感慨kā駕駛先生講︰「先生，你講的確實是真正。以後阮thang以此事作見證。」

一個國家是m̄是進步，m̄是看宏偉建築有jōa-chē；生活水準是m̄是kap國民所得相配，也m̄是tùi人民消費能力ê jōa-chē來看。一個國家、社會是m̄是進步，就是beh看hit國人民遵守交通信號ê能力有jōa-chē？如果連遵守chiah-nih簡單ê燈號規矩to有困難，而且一再有酒後駛車ê事件發生，chit-ê國家、社會離進步、現代化就iáu有一段距離。 （原載於自由時報2004年8月29日第15頁，台語翻譯：Chuniok ）

盧俊義牧師的個人網站。