《主编e5话》

 | | | 转寄

把握好机会来报扬教会罗马字福音

作者 Chuniok 2006.10.22

九月二十九日，教育部国推会通过台湾罗马字拼音方案，争议多年致使台湾母语教育一直无法度进展ê Hō-ló台语拼音问题，有一个完满ê结局。这是值得咱欢喜庆祝ê tāi-chì,但台语文运动m̄是到chia为止，应该是一个契机ê开始。

第2849期(10月2~8)ê台湾教会公报头条新闻：「历经五年教育部台语拼音定案―确定台湾罗马字拼音 教会表欢迎」。可惜到taⁿ iáu未看tio̍h任何呼吁，咱长老教会tio̍h如何把握chit-ê好机会来报扬教会罗马字ê福音。

台罗拼音方案是由教会罗马字(通称白话字)、台湾语言拼音方案(TLPA)kap TLPA改良式整合而成。其实众人lóng知，TLPA有约90%是采用教会罗马字系统，所以台罗拼音方案ē-sái讲是修订教会罗马字，hō͘伊koh-khah接近国际音标(IPA)，ē-tàng kap国际接轨。

通称白话字ê教会罗马字是咱信仰祖先留hō͘咱ê宝贝资产，长老教会无teh致意来保存，颠倒是教会外ê人phah拚teh推广。目前台湾罗马字协会会员约有95% m̄是基督徒，in是为tio̍h读写台语文，去hit当时由郑儿玉牧师开ê白话字班上课。

五年前，我参加台湾罗马字协会主办ê「世界台语文化营」，tú-tio̍h人就展讲我是长老教会ê会友。结果被人责备讲：「Lín长老教会siōng无效，kan-ta一个郑儿玉牧师，其他lóng无效！」我无受气，我家己检讨反省了后，发见hit句话是千真万确ê事实，我就发奋图强来认真学白话字，将白话字文献数位化并上网。Chiah-ê工作需要电脑工具，我就不辞劳苦四界向电脑专家请教，hō͘我ê工作进度神速，尤其是顶年四月kap信望爱网站( http://fhl.net )合作开设台语信望爱( http://taigi.fhl.net )了后，有开发真chē台语文电脑工具tī网路顶面，hō͘人免费使用。

现今是电脑ê时代，有电脑工具ê语言chiah有可能活落去。我有chit-ê理念，就kā开发好势ê电脑工具挂起lih台语信望爱，hō͘人免费下载来使用，并四界去报扬hō͘大家知，kah-ná teh传「台语福音」，我也感觉jú来jú有使命感。

感谢主，经过我详细说明了后，有kóa教会机构马上采取行动来把握chit-ê好机会。台湾神学院有安排我tī 11月初一去kap全校师生分享「台语文ê电脑使用kap资源」；11月初四boeh去总会kap白话字种子教师基础班及台湾母语教师协会办ê台语对外教学师资培训班分享；koh-boeh tī 11月12日去东门教会kap会友及社区民众分享。Ǹg望透过chiah-ê分享，将咱长老教会白话字ê福音传hō͘社会大众。

台湾长老教会总会助理总干事也是教育部国语推行委员会委员ê星．欧拉姆牧师，tī台湾教会公报第2849期发表「教会永续展开罗马拼音之优势」，伊呼吁讲：「教会kap社会之语言发展策略及长远目标，须从长计议。」

咱长老教会tio̍h把握chit-ê好机会，积极向社会宣讲「教会罗马字→台湾罗马字」ê福音，hō͘社会人士明白台湾长老教会tī台语文运动历史上ê角色地位。