《田岡良食筆尾》

 | | | 轉寄

低地國筆記

作者 田岡良 2011.08.07

這站仔來佇Ho-lan做交換學生，「Ho-lan」，就是華語ê『荷蘭』，佇1931～1932年出版ê《台日大辭典》記錄彼當陣台灣人ê呼音，是講做「O-lân」（來源是日語ê講法，日語閣對法語吸收，自按呢‘h’無發音），毋管是這內底ê佗一個名，正式來講攏干焦講著in國ê「北Holland省」佮「南Holland省」兩省，事實上，in家己叫家己號做「Nederlands」，就是英語所講ê「Netherlands」。

拄到Leiden ê時，受著台灣留學生鬥相共真濟，替我揣蹛ê所在，報我路去學校、超級市場，予我緊緊就有法度安搭好勢，Leiden是一個小小ê埠頭，用行--ê就踅會透，遮大部份ê厝攏有歷史--矣，親像我這馬暫徛ê厝宅，佇1649年ê市區地圖頂懸就揣會著。

到位了後，印象上深--ê,是遮ê環境，犯勢是緯度較懸ê因端，遮ê徛家無啥蟲thōa,罕罕仔會看著一隻胡蠅按呢爾爾，攏毋捌看著狗蟻，閣較無虼蠽(ka-choa̍h)，糖仔餅仔烏白hē,嘛無--打-緊，糞埽嘛免驚會生蟲厚thái-ko,講--起-來，in這點實在真好命。

毋過，嘛因為仝這個地理環境，遮加較寒，就準是熱人，嘛假若咱ê春天按呢爾爾，九--月，氣溫就降來甲十外度，有時陣天時bái,風真透，吹著會起交懍恂，聽講今年寒了有較緊，若有落雨ê透早或者是暗時，氣溫就賰較無十度。

佇台灣，我定定感覺西國人真奇怪，熱--人ê時，咱攏愛覕踮冷氣房吹予涼，in是不管時攏足愛坐佇外口曝日頭，taⁿ我知--矣，日頭對in來講，實在是寶貝，in ê日頭袂咬--人，見若日頭--出-來，予曝落去到地，彼種溫暖，有影一等好，in ê頭殼內，凡勢一直有這款日頭ê記持，莫怪in會有彼種愛曝日ê習慣。

Ho-lan人無啥愛gia̍h雨傘、幔雨幔，透風落雨，in就chhî風淋雨，攏無咧驚，若共算，路--裡十個人揣較無一個有咧閘雨--ê,連阿媽chhōa孫出來數街路石，嘛是做伙淋雨，這款情形，是佇台灣無法度想像--ê,聽人講，法國人嘛按呢--neh,講--來，in有一寡想法，確實佮咱蓋無仝。

相信有濟濟人聽講in鐵馬窒倒街，這有影，行路ê時愛真細膩，因為自家用仔、貨車會讓--人，毋過孔明車是無咧讓--ê。In ê囡仔自細漢就騎車，所以攏騎甲真慣勢。

Ho-lan有濟濟運河，聽講in自細漢就學泅水佮駛船，所以，真罕得有人予水注--死，台灣ê市內，政府不時愛張持圳溝邊仔欄杆有做好勢--無，驚囡仔跋--落，遮無這款代誌，運河邊無咧圍--ê,嘛無聽講有囡仔去跋--落-ê。

斟酌共想，Ho-lan是一個真少年ê國家，伊獨立kah taⁿ猶無四百冬，伊無咧佮國際強權相爭做頭，嘛袂興學人舞大都市，和台灣私偏城市發展ê做法蓋無仝（比較咱ê五都...），Ho-lan人無愛過頭都市化佮集中化，透過利便交通建設、建置新市鎮，in予人民毋免蹛甲cha̍t-chiⁿ-chiⁿ,嘛毋免直直佇市區拆舊厝起大樓，in ê市區內底，幾若百冬ê建築物滿四界，閣國土ê中心地帶，in保留無做開發，號做groene hart(青心），做國家ê肺，看著in ê想法、做法，有值得面積、人口和in差不多差不多ê台灣，佇發展策略、生活環境ê方面做參考。