《宋澤萊新著《天路拾穗》TOJ/台灣字版》 |
 |
 |
|
 轉寄 |
Tē it pō͘ Chútê 1: Góa ūisiáⁿmi̍h beh sélé? _5 Kóaⁿ cháu siâlêng
作者 Sòng Te̍klâi 2025.12.28
Tē it pō͘ Chhenggī titkiù
Chútê 1: Góa ūisiáⁿmi̍h beh sélé? _5
5. Kóaⁿ cháu siâlêng
Góa chiongkîbóe tiòngsiâ! Kóng khí lâi lí m̄ sìn, m̄koh khiok sī chhianchin-bānkhak ê.
Kóng tio̍h Lo̍kkáng chitê ū miâ ê siótìn, i goânlâi ê siâⁿtìn iôngmāu chá to̍h teh khoàisok káipiàn. 29 nî chêng, tng góa lâi kàu chitê lāu tìn, chin chē ê kó͘ chhù to̍h sòachiap hông lu pêⁿ, chin chē ê tēhêng puttoān teh piànōaⁿ, chitmá piàn kah liân góa lóng bô siáⁿ ē jīntit. Cha̍p kúi nî chêng, góa kah góa ê khanchhiú tī kaugōa ê sin siākhu bé chhù, keh bô gōa hn̄g ê só͘chāi, ū chi̍t phiàn tōa kah hō͘ lâng m̄ káⁿ siongsìn ê bōng'ápo͘, huisiông khoah; kinkì góa só͘ khòaⁿ, i khímá chûnchāi íkeng ū chi̍t, nn̄g pah nî ísiōng, bōngpâi kah bōng’á tui jû-chhángchháng bē khamtit, sinkū bô ittì, m̄chai miâ ê cha̍pchháu kah iáhoe seⁿ kah chi̍t sìkè. Hit sî, tìn kongsó͘ koatgī beh lu pêⁿ chit phiàn bōng'ápo͘, kā i sokchō chiâⁿchò sin ê sengoa̍h khongkan, tôngsî ó͘ chi̍t tiâu siōng tōa ê kelō͘, tùi tìn lâm kàu tìn pak, ti̍tthong kàu háipiⁿ ê Tâi cha̍pchhit sòaⁿ.
Chitê tōa kangtêng khaikang liáuāu, tìn bîn khaisí tī bōng'ápo͘ sìkho͘ûi choh chè, ēng lâi tìnap pângtōa sò͘ba̍k ê bônglêng. M̄koh tī sikang ê kîkan, tìntiúⁿ hiônghiông phòa tāng pēⁿ, sí khì; tìntiúⁿ ê kiáⁿ pòaⁿmê sáichhia, hutjiân lòng tio̍h kelō͘piⁿ ê bo̍kmôan̂g, tāng siong; ūi tio̍h che bú kah tìn siōng iâugiân móathiⁿpoe. Tongjiân, kangtêng iáu sī chiàu kî oânkang, hûnbōng phahm̄kiàn khì, chi̍t tōa phiàn ê pêⁿtē chhuthiān, chi̍t tiâu tōa tiám’áka lō͘ chin khìphài koànthong lâmpak.
Tongsî, góa poaⁿ khì tìn kau bô gōa kú, tōa chabó͘kiáⁿOántêng kantaⁿ chi̍t hòe gōa, lengbú tòa tī hn̄ghn̄g ê Thianhō͘ Kiong piⁿ'á ê Koehchhù lí ittài. Ta̍k kang chákhísî, góa ittēng tio̍h chhōa Oántêng khì lengbú ê chhù, liáuāu chiah khì siōngpan. Ūi tio̍h kóaⁿ sîkan, góa bô siūⁿ tio̍h kîtha; thàuchá, góa to̍h kā Oántêng khǹg tī otobái ê nâ'á ni̍h, ēng piochhia ê soktō͘, phuncháu kengkòe tú tùi bōng'ápo͘ khaihoat chhut lâi ê hit tiâu tōa tiám’áka lō͘, chi̍tlō͘ kàu lengbú ê chhù. Tú khaisí ê chi̍t tōaⁿ ji̍tchí, iáubōe hoatkiàn ū siáⁿmi̍h bô tùitâng, m̄koh bānbān'á kòe chi̍t tōaⁿ ji̍tchí liáuāu, Oántêng khaisí kámmō͘, jîchhiáⁿ hoatsio bē thè. Tôngsî góa hoatkiàn chíiàu siūⁿ tio̍h hit tiâu tiám’áka lō͘, góa ê ìsek ni̍h to̍h ē kámkak lō͘ ê nn̄g pêng ū chin koân ê nn̄g phìⁿ ûichhiûⁿ, kā tiám’áka lō͘ kuiê gia̍p tiâu leh, hit nn̄g phìⁿ ûichhiûⁿ tī góa ê ìsek tiong ē sengtióng; kahná jú lâi jú koântōa koh bênghián, tùi góa hoatchhut uihia̍p, ū beh apkài kòe lâi ê khoán. Góa ithiòng "m̄ sìn siâ", inūi sìn Iésu chìnchêng, góa mā ū chi̍tkóa sînpì ê thégiām, m̄koh tōa pō͘hūn lóng sī huisiông chiàⁿphài bíbiāu ê kengle̍k, chiônglâi lóng bô tú kòe chiahni̍h siâkhì ê tāichì. Chiū ánne, góa thiaukò͘ì cháu kàu tōa kelō͘ lâi, kiâⁿ khì lō͘piⁿ ka kiámcha khòaⁿ māi, chhiûⁿ kiùkèng tī tóūi? Kiatkó ánchóaⁿ to chhâ bē chhut chia ū chhiûⁿ ê hûnjiah, chit tiâu kelō͘ kinpún to̍h sī chi̍t phiàn khuikhoah pêⁿtháⁿ! M̄koh tán kàu góa oa̍t thâu m̄ khòaⁿ kelō͘, hit nn̄g tó͘ chhiûⁿ koh tī tōanáu ni̍h chhuthiān, huisiông kiankò͘ koântōa ê nn̄g phìⁿ chhiûⁿ! Chitmá góa chaiiáⁿ góa tiòngsiâ ā. Góa seng ūi chabó͘ kiáⁿ kîtó, khúnkiû Iésu lâi tīliâu i ê kámmō͘, chin kín i ê kámmō͘ tī bô chia̍h io̍h chi hā tit tio̍h i hó à; m̄koh, góa ê chengsîn ni̍h ê hoànsiōng pēng bô káisiān!
Góa biánkióng simsîn lia̍h ho͘ chāi, siūⁿ beh kā tōanáu ni̍h ê hoànsiōng kóaⁿ cháu, m̄koh bô hoattō͘ jûgoān, chōnghóng soah jú lâi jú giâmtiōng ê khoán. Kàu siōng bóe, góa chihchài bē tiâu, ū chi̍t kang beh khùn chìnchêng, góa kîtó, tùi Iésu kóng góa ê chōnghóng put biāu, góa tiòngsiâ ā, ū chi̍t tiám'á kiaⁿ chōnghóng bô hoattō͘ khoán khí lâi, khúnkiû I lâi kā siâlêng kóaⁿ cháu. Liáuāu, góa khùn khì; tī bînbāng tiong, góa khòaⁿ tio̍h hit tiâu tōa kelō͘ ê lâm pêng chhuthiān nn̄g ki kúi chàn lâu koân ê kng thiāu tōa kha, thiàutōng ê kng ná chhinchhiūⁿ chúiian, gîn kng siámsih, m̄koh hō͘ lâng ê kámkak khiok khòaⁿ khí lâi sī unhô bôpí. Góa siūⁿ beh gia̍h thâu khòaⁿ chitê lâng sī siáⁿlâng, m̄koh inūi I siuⁿkòe pângtōa, góa kantaⁿ ētàng khòaⁿ tio̍h I ê nn̄g ki kha, kîtha lóng khòaⁿ bē tio̍h. I tùi lâm pêng khaisí kiâⁿ khí, I ê khachiúⁿ ta̍h tī tēbīn, siāchhut chi̍t chūn chi̍t chūn ê kngbâng. Kantaⁿ suiàu nn̄g pō͘, to̍h kiâⁿ oân kui tiâu lō͘, chin iông’ī to̍h hoa̍h kòe hit phìⁿ khoahkhoah ê bōng'ápo͘, góa kámkak kuiê bōng'ápo͘ hòasin chiâⁿchò chi̍t lia̍p chin sèlia̍p ê tînai, hō͘ I ta̍h tī khachiúⁿ ēté, siausit khì. Góa sûisî chhéⁿ khí lâi, chē tī bînchhn̂g téng, bē bêngpe̍k chitê bāng ê ìsù, kámkak ū chi̍t tiám'á bo̍kbêng-kîbiāu. Góa koh khùn khì, tējī pái, chitê bāng kohchài chhuthiān, chōnghóng kah chêngchiat oânchoân itbô͘-itiūⁿ, góa koh chhéⁿ khí lâi, chē tī bînchhn̂g, iûgoân kámkak bo̍kbêng-kîbiāu; góa koh khùn, tēsaⁿ pái, kângkhoán ê bāng, kângkhoán ê chōnghóng kah chêngchiat kohchài chhuthiān, m̄koh chit pái ê bāng tī teh beh siausit chìnchêng, tōa kha ê chi̍t pō͘hūn kngbâng hutjiân tòa ji̍plâi góa ê hengkhám, hō͘ kuiê lâng lóng kámkak unloán khí lâi. Chit pái chhéⁿ khí lâi, góa kámkak tōanáu ni̍h ê chhiûⁿ phahm̄kiàn khì à, hutjiân to̍h liáukái kuiê bāng ê ìgī. Tùi chitê bāng ni̍h ê tōa kha, góa ū chi̍t tōaⁿ sîkan bô hoattō͘ khaktēng sī Samūi-Ιtthé ni̍h ê tó chi̍t ūi, m̄koh, góa phianhiòng jīnûi I sī Iésu, inūi chitê hêngsiōng chin chhinchhiūⁿ "Khésīlio̍k" ni̍h só͘ biâusu̍t ê Chú Iésu ê kha. "Khésīlio̍k" it chiuⁿ 13 chat ánne kóng,"Tengtâi tiongkan ū chi̍t ūi chhinchhiūⁿ Jînchú ê, khiā tī hia, sengkhu chhēng sôe kàu khaāuteⁿ ê tn̂gphàu, io ni̍h hâ kim tòa. I ê thâumn̂g chhinchhiūⁿ seh, mā chhinchhiūⁿ iûⁿmn̂g pe̍h siaksiak; I ê ba̍kchiu chhinchhiūⁿ hóeiām ánne siámsih; I ê kha chhinchhiūⁿ kengkòe toànliān koh chhat kng ê tâng kng iàⁿiàⁿ ……." Ánne, chitê ībāng ê chinchiàⁿ ìgī iū koh sī siáⁿmi̍h leh? Chitê ībāng to̍h sī SiōngChú siūⁿ beh tùi góa kóng, "Lí piáubīn kéchò bô teh sìntáu, m̄koh góa chaiiáⁿ lí ê simlāi gōani̍h kiaⁿ síbông, chi̍tē kìⁿ tio̍h síbông to̍h kiaⁿ kah puttekliáu, iûkî sī khòaⁿ tio̍h chiahni̍h tōa ê bōng'ápo͘, chá to̍h m̄chai jûhô sī hó! Inūi lí lia̍hchún lí ittēng ē sí, só͘í lí to̍h bô hoattō͘ siámpī síbông ê koko-tîⁿ. Mā inūi ánne, lí to̍h hō͘ siâlêng ū thang pekhāi lí ê kihōe, siâlêng to̍h ēng síbông lâi khiónghat lí. Chóngkiat lâi kóng, kiaⁿ síbông chiah sī kinpún ê būntê. M̄koh, nāsī lí chaiiáⁿ lí sī bē sí ê, ánne siâlêng to̍h koh khah ánchóaⁿ to bô hoattō͘ koánchè lí. Lí khòaⁿ, síbông kám kóng ū chiahni̍h tōa ê le̍kliōng? Síbông kám ū chiahni̍h tōa ê koânsè? Lí chitmá m̄ sī khòaⁿ tio̍h, síbông tī góa ê khaē chí putkò sī chi̍t lia̍p tînai, bô tapsap kám m̄ sī? Tī góa ê koktō͘ ni̍h bô síbông chit khoán tāichì!" Kámsiā SiōngChú, I to̍h sī ánne kóaⁿ cháu góa simlāi ê siâlêng, i hó góa náu ni̍h ê hoànsiōng; bānbān'á, góa píkàu khah ētàng bô kiaⁿhiâⁿ lâi bīntùi síbông, mā kámkak kakī ê hòesiū ē pí chìnchêng góa kakī àmtiong só͘ kó͘kè ê ke 10 nî, góa tekkhak ū chitê chūsìn!
Tôngsî, che sī góa kîtó sûisî ū hôeèng ê sūlē chi it, i hiánsī SiōngChú te̍kpia̍t ētàng hôeèng ū kínkip khùnlân ê lâng, iûkî sī hāmlo̍h tī sèⁿmiā kaukoan ê sî, chíiàu lí kîtó, SiōngChú sûisî to̍h ē hôeèng. Kàu taⁿ, chit chióng hiānsiōng iáu tī góa ê sengkhu téng múipái chhì lóng bô chhachhò. Kin'áji̍t ū lâng kîtó chóng sī bôhāu, goânin to̍h sī chhut tī o͘pe̍h kîtó, bô iàukín koh bô kèta̍t ê tāichì mā the̍h lâi kîtó, sīmchì sī bōngsióng kîkiû, kiatkó SiōngChú chi̍t nn̄g pái bô hôeèng, lí to̍h koài SiōngChú, lia̍hchún SiōngChú m̄ chiàukò͘ lí. Kîsi̍t, kîtó chísī chi̍tê "sim" ê būntê, tng lí ê sim inūi pekchhiat koh piàn kah huisiông chhimkhek ê sî, chíiàu lí kîtó, SiōngChú lóng ē sûisî hôeèng!
