《宋澤萊新著《天路拾穗》TOJ/台灣字版》

 | | | 轉寄

Chútê 10：Lí mā ētàng kà lâng kóng honggiân（lênggí）！_1

作者 Sòng Te̍klâi 2026.03.08

Tējī pō͘, Sènglêng koànak
Chútê 10：Lí mā ētàng kà lâng kóng honggiân（lênggí）! _1

1, Itpoaⁿ lâng tùi honggiân ê chhògō͘ jīnti
Kin'áji̍t, kóng honggiân（lênggí）chiāmchiām piàn kah bô sînpì à, inūi tio̍hsǹg sī Sìngī Chong kah Tiúⁿlóhōe ê pósiú kàuphài, mā chhaputto lóng khaihòng in ê sìntô͘ chūiû ha̍ksi̍p kóng honggiân ā.

M̄koh, kiámchhái sī kòekhì Kitokkàu kài tùi honggiân ê kihêng chenglūn só͘ tì, kin'áji̍t tī kóng honggiân chit hāng tāichì téngbīn, iûgoân ū chin chē lâng siuⁿkòe kā i iaumô͘ hòa, á sī gia̍hkoân hòa. Chóng kóng chi̍t kù to̍h sī bô hoattō͘ lia̍h pêⁿ lâi tùithāi i, chiah chōsêng honggiân iáu bô hoattō͘ phó͘phiàn ê putliông hiānsiōng.

Iaumô͘ hòa ê lâng jīnûi, kóng honggiân ē tìsú siâmô͘ ê chhimji̍p, ínkhí Mô͘kúi ê hūsin; gia̍hkoân hòa ê lâng jīnûi, honggiân sī siū Sènglêng sé ê chèngkì, bēhiáu kóng honggiân, bô hoattō͘ titkiù.

Tāikhài inūi chenglūn chin kochhim koh hiânò, chin chē Kitokkàu kài chhongbêng ê tìsek hūnchú, to̍h tī kóng honggiân chit hāng insù téngbīn, chi̍tbīn kiaⁿ chi̍tbīn kó͘ kòethâu koân, chiongkîbóe tìsú pa̍kkha bô hoattō͘ hiòng chêng à.

Góa bat tī chi̍tê sînha̍k'īⁿ ê giánkiùsó͘ lāité thiaⁿ khò, giánkiùseng ū 10 lâng chóiū, lâichū kok chióng bôkâng kàuphài. Góa mn̄g in ēhiáu kóng honggiân ê ū kúi ūi? Kantaⁿ ū nn̄gê lâng gia̍h chhiú, hō͘ góa chhoah chi̍t tiô, chiahê teh beh khì chò thoântō á sī bo̍ksu ê lâng, kèngjiân chiahni̍h chē lâng bēhiáu kóng honggiân, ánne chionglâi in beh ánchóaⁿ thoânkàu?!

Tiantò sīhui tìsek hūnchú ê sìntô͘ píkàu khah hó, iûkî sī o͘jihsáng á sī o͘bahsáng, in m̄bat thiaⁿsìn iâugiân, chi̍tē’á to̍h o̍h ēhiáu kóng honggiân, soktō͘ chin kín, jîchhiáⁿ lo̍k chāi kîtiong. Chhiūⁿ goán chitê sèsè ê "Lo̍kkáng Sìngīhōe", suijiân kantaⁿ ū 10 kúiê pêngsìntô͘, khiok chhaputto sī lânglâng lóng ēhiáu kóng honggiân.

Góa to̍h siūⁿ, nāsī chiahê bēhiáu kóng honggiân ê tìsek hūnchú thoântō á sī bo̍ksu lâi goán chia tòaniá kàuhōe, in kám káⁿ tùi goán chiahê pêngsìntô͘ soatkàu? In kám bē kámkak kiaⁿhiâⁿ simhi?

Kîsi̍t, kóng honggiân sī chin kántan ê tāichì, chíiàu 5~10 hun cheng to̍h o̍h ēhiáu, só͘ khai ê sîkan khùila̍t kah chhiùⁿ chi̍t siú sikoa chhaputto. Chísī ū kóa lâng chúnkóng siūⁿ beh o̍h, inūi khì chhōe m̄ tio̍h lâng, chi̍t pái bô o̍h ēhiáu, nn̄g pái bô o̍h ēhiáu, to̍h lia̍hchún kakī bô kóng honggiân ê insù, chiū ánne hòngkhì, che sī gōani̍h'á khósioh ê tāichì!

Tī kóng honggiân chit hāng tāichì téngbīn, lán ittēng tio̍h chaiiáⁿ nn̄gê phó͘thong ê siôngsek：1, Che engkai sī chhaputto só͘ū ê Kitoktô lóng ū ê insù, bē ū khùnlân ha̍ksi̍p; inūi, i sī Sènglêng só͘ū insù tiong "siōng sè ê", ōaⁿ kù ōe lâi kóng ̄to̍h sī siōng iông’ī o̍h ēhiáu ê. 2, Che kah itpoaⁿ ê kîtó kângkhoán, sī siōng chèngsiông ê chi̍t chióng sìngióng piáuhiān, chísī kháuthâu siōng ê tōngchok, bián hùi siuⁿ chē théla̍t, mā bô suiàu siáⁿmi̍h chúnpī, sûisî lóng thang kóng honggiân, ētàng chūiú siu pàng, khiok ētàng hō͘ lâng tòa lâi chin chē ê līek. Só͘í, jīmhô iaumô͘ hòa á sī gia̍hkoân hòa ê giânlūn lóng sī o͘pe̍h kóng, o̍h ēhiáu kóng honggiân só͘ suiàu ê tōngchok kah tòa lâi ê hāukó m̄sī in só͘ kóng ê ánne!

Siōng tiōngiàu ê sī, lán siūⁿ beh o̍h honggiân, ài chhōe tio̍h lâng, chiah biántit chōsêng kakī cháuchhōe lêngmiā ê chhèsiong á sī gō͘kái. Tôngsî kà lâng kóng honggiân ê lâng mā tio̍h chèngkhak páak ūhāu ê honghoat, ittàn lí ê honghoat m̄ tio̍h, bô hoattō͘ chin kín kà ēhiáu tùihong, to̍h sī teh lōnghùi pa̍tlâng ê sîkan; sīmchì hō͘ tùihong gō͘kái i bô Sènglêng ê insù, tùi chiânlâi ha̍ksi̍p ê lâng ê sìnsim sī iúhāi ê.

Tī chia, góa thêkiong chi̍t ia̍h góa ha̍ksi̍p honggiân ê chhògō͘ ha̍ksi̍p kah chèngkhak kà lâng kóng honggiân ê si̍tchè kenggiām, hō͘ tāike ētàng pībián chhògō͘ ê ha̍ksi̍p, jîchhiáⁿ káⁿ ánne lâi kàutō thajîn kóng honggiân.