《宋澤萊新著《天路拾穗》台譯版》

 | | | 轉寄

第一部：稱義得救_2.記好朋友王世勛信「耶穌死去koh活」ê故事

作者 宋澤萊 2026.01.11

第一部 稱義得救

主題2：記好朋友王世勛信「耶穌死去koh活」ê故事

王世勛兄比我大1歲，差不多tī 1975年左右阮to̍h彼此認bat à。

Hit時，我iáu tī台北國立師範大學teh讀冊，因為長年破病ê關係，我開始寫小說來消tháu身心ê痛苦。Hit時我大學四年，寫長篇小說《廢園》，而且kā小說投hō͘主編《台灣文藝》ê鍾肇政先生。

Hit當時，《台灣文藝》是一本非常細ê刊物，差不多50頁而已，當然無法度刊登長篇小說tī頂面。鍾肇政先生to̍h拜託洪醒夫兄kah王世勛兄kā稿件帶tńg來師大還我。He是阮siōng早ê認bat，當時，阮lóng iáu是二十歲出頭ê青年人，對文學充滿熱情。

此後，伊一直tī報界做記者，阮mā一直是真有深交ê朋友。Tī 1979年美麗島事件了後，伊意外踏入政治界，做台中市議員，尤其是tī 1986年左右，伊kah阮幾个朋友開始辦《台灣新文化雜誌》，koh khah是仝船仝條命。當時是「美麗島事件」爆發了後ê第七年，國內反國民黨ê菁英差不多lóng hông關入去監牢，本土政治運動進入非常「肅殺」ê階段，反對力量受tio̍h空前ê挫折。《台灣新文化雜誌》想beh phah破禁忌，延續反抗運動言論，thang講是步步危機，差不多to̍h是行tī牢獄ê邊緣，因為當時蔣經國iáu活leh，白色恐怖iáu無所不在。王世勛放膽出任阮雜誌ê社長，假使chiâⁿ實惹禍，第一个hông關入去監牢ê to̍h是伊！

這暫且mài提。Iáu是來談kóa阮ê宗教信仰：

王世勛是tī 2000年ê年初開始思考「耶穌死去koh活」ê問題，就ánne變成基督徒ê人！

當時，王世勛tú tùi立法委員卸任，準備繼續koh再奮戰2004年ê立法委員選舉。Hit時，阿扁總統做國家文化總會ê會長，聘請王世勛擔任副秘書長。

因為從事政治是非常辛苦ê tāichì，特別oh得避免tio̍h交陪lim酒。當時，我看出伊ê身心狀況kah以前有kóa無仝款，已經陷落去一个非常慘淡ê狀況裡。人看起來是瘦ê，面色因為長年lim酒，看起來黃蠟蠟無氣力。

Chìn前，伊是一个非常虔誠ê老佛教徒。

伊細漢ê時to̍h tiāⁿtiāⁿ kah伊ê老母出入台中ê「佛教蓮社」禮佛聽經，後來由李柄南居士為伊舉行歸依ê儀式，成做正式ê佛教徒，法號「慧勤」，成做大乘佛教ê信徒。

伊歸依大乘佛教ê原因，是自細漢親目看tio̍h人世生老病死ê無邊痛苦，ǹg望藉tio̍h崇拜釋迦牟尼，來解除伊對死亡ê驚惶。

王世勛對大乘佛教ê信仰非常熱心，tī伊ê雙手腕頂面，留落來hō͘火印燒出來ê一串戒疤；除了這以外，伊tī kakī ê厝裡，to̍h是議員服務處ê壁堵頂有掛一幅真大ê阿彌陀佛像，來表示無盡ê恭敬。

1989年左右，我kah真chē ê朋友組成「根本（小乘）佛教團體」，身體力行原始佛教ê「五陰觀察修行法」，阮每人kā kakī淡薄á久所觀察ê心得用日記寫落來，一屑á都無chhìnchhái，王世勛隨時加入阮ê團體。有一pái，王世勛tī餐桌食飯挾菜ê時，忽然發見伊ê「我」phah m̄見去，也to̍h是身心kah萬物雖然kah過去仝款照常存在，thang講to̍h是tī kakī ê身心kah外在宇宙中chhōe bē tio̍h過去所感受ê hitê 「我」；就ánne，伊短暫證入「無我」中有幾工久，「無明」隨時短暫hông掃kah光光光，得tio̍h原始佛教所講ê「須陀洹果」。Hit時，伊iáu真活動tī政壇頂面，m̄koh，無人ētàng看出chitê政治人物是一位佛教須陀洹果ê聖者。

「無我」ê體悟，快速帶來伊對「三法印」ê認知，解除伊對阿彌陀佛ê絕對信仰，對大乘佛教ê弊端忽然有深刻ê明白，隨時了解「大乘佛教ê佛」並m̄是「釋迦牟尼佛」。伊跳脫大乘佛教ê迷霧，行入去kah釋迦牟尼本人仝款ê境界中。

M̄koh，釋迦牟尼ê「無我」境界kám就ánne解除伊所有ê痛苦kah驚惶？答案是：無！Hit時，伊時常kā我講：「無我」ê境界是暫時ê，有tang時á chiah ē出現，hit時to̍h是精神非常清醒ê時；m̄koh無出現ê時，「我」koh清楚產生出來，狀況iáu是真害。

王世勛ê chitê困境，我mā經歷過；m̄koh，因為1990年左右我慢慢轉變信仰ê方向，tī信「耶穌死去koh活」了後，無好ê狀況改善bē少。我ê狀況事實上比伊khah好真chē。

我iáu ē記得，2000年阮bat tī建築家王定國闊闊ê國姓鄉ê厝裡見面。Hit時，我tùi伊黃蠟蠟ê面色看出伊ê困難。伊講伊lim酒仝款無斷，kantaⁿ iáu非常虔誠拜阿彌陀佛，甚至是走遍全台灣ê廟寺去拜各種偶像，甚至iáu想beh kā宜蘭ê一尊「金媽祖」請tńg來厝裡供養，m̄koh伊iáu是lim酒無斷，無法度禁絕對kakī ê pháiⁿ習慣，jú拜偶像酒to̍h lim jú hiông，身心ê狀況jú來jú bē堪得！

我知影，伊非常煩惱lim酒ē hō͘伊失去性命！

當時，我to̍h對伊講：「Ánne lah！不如讀《聖經》看māi，改信耶穌看māi，無一定狀況to̍h ē改變。」

伊講：「我無《聖經》。」

我講：「我寄hō͘你！」

就ánne，2000年正月，我kā一本《聖經》寄去伊ê厝裡。

伊讀《聖經》了後，bētàng明白內面ê意思。

就ánne問我講：「Án怎信耶穌？」

我講：「真簡單，tio̍h看你kám ētàng相信『耶穌死去koh活』。根據《聖經》記載：耶穌先被釘死tī十字架頂，門徒kā伊收落來，葬tī墳墓裡，m̄koh三工了後，伊koh活起來。你先讀《聖經》ê〈四福音書〉看māi，一看koh再看，試看kám ētàng chhōe tio̍h相信祂死去koh活ê理由，而且kā理由kā我講，he to̍h ēsái得à！」

我koh kā葉光明牧師ê一套「基要真理」ê冊mā寄hō͘伊。

一個gōa月了後，伊kā我講：「我完全ētàng信耶穌死去koh活！」

我to̍h問：「是án怎？」

伊講：「我看tio̍h〈使徒行傳〉第一章，耶穌teh beh升天ê時，bat吩咐門徒講：『Mài離開耶路撒冷……過無幾日，lín ài tī聖靈裡受浸……聖靈降臨tī lín ê身軀頂，lín to̍h一定ē得tio̍h能力，而且ài tī耶路撒冷、偤太全地、撒瑪利亞，直到地極，做我ê見證人。』你想看māi leh，若是耶穌m̄是上主，祂án怎ētàng知影基督教未來ê傳到世界各地？Tio̍h算chitmá ê南北極，只要有人，lóng有人信祂。既然祂是上主，án怎無法度叫kakī死去koh活？！」

王世勛就ánne信「耶穌死去koh活」chit項tāichì，理由堂皇！

我本來掠準王世勛ê信仰只是口頭ê，大概bē親像我ánne收tio̍h效果。啥人知影，一段時間以後，伊開始有異夢，聖靈引chhōa夢中ê伊se̍h kho͘’á tī空中飛，身心感受tio̍h無比ê快樂輕鬆。Siōng厲害ê是：聖靈開始kā伊管教，kā火燒地獄ê門phah開，hō͘伊看tio̍h身陷火燒地獄ê人ê痛苦，而且嚴厲kā伊警告，若是繼續lim酒，將來定tio̍h ē陷落去火燒地獄中去hō͘火燒。王世勛受tio̍h警告，雖然iáu是oh得戒除酒癮，m̄koh lim酒ê行為隨收斂bē少。

2004年五月，伊kah伊ê牽手、兩个kiáⁿ兒、侄á、侄新婦，做伙tī台中市大里信義教會受洗，成做正式ê基督徒。

Tī hit年ê年尾，台中市立法委員ê競選非常激烈，王世勛參加競選，因為派系ê問題，王世勛陷落去苦戰，估計若是ētàng當選，可能是倒頭算ê一、兩名，狀況hō͘人真艱苦心。M̄koh聖靈hō͘王世勛一个異夢，講伊ē以第二名當選，大家lóng認為無可能。M̄koh票開出來了後，伊果然以第二名當選，所有ê人lóng料想bē到。

王世勛所領受ê ê聖靈恩賜是hiahni̍h明顯，就ánne身軀狀況改善真chē。伊tī國會立法委員ê辦公室壁頂khǹg一个大十字架，來表示對耶穌ê尊敬kah感謝。

就ánne，真chē人lóng來請教伊ê信仰經驗，伊mā引chhōa真chē ê人去受洗。

M̄koh，伊ê酒狂ê罪行kám有完全解除？答案是：iáu未！

Chitê原因是：聖靈iáu未完全tòa tī伊ê身軀裡一時刻都bē離開。

為tio̍h 無ài hō͘ kakī ê酒狂ê罪行繼續，伊後來chhōe tio̍h ētàng改善伊ê行為ê黃金田牧師，tòe teh黃牧師學習《聖經》ê道理。黃牧師出身tī聖潔教會，對信徒ê行為要求非常嚴，伊ētàng hō͘ tī王世勛koh khah大ê勸戒，特別交帶伊tio̍h注意《聖經》裡〈雅各書〉ê內容，tī行為上禁止行惡，來挽救kakī ê靈命。王世勛跟tòe老牧師ê教導，真有成就；特別是幾nā pái去耶路撒冷朝聖，後來出版《Tùi西港到耶路撒冷》chit本重要ê冊。

2017年chit年，我kā伊講聖靈ētàng穩定永住tī一个人ê身軀裡，hō͘人得tio̍h徹底chám除罪行ê大力量。伊「心心相印」照ánne做，果然發見聖靈內住tī伊ê胸腹裡，無koh離開。伊一再觀察，忽然發見hitê bih tī伊內在ê「愛lim酒ê我」消失去à，改酒變kah真容易，就ánne to̍h無koh受tio̍h酒癮ê控制。Chit時，聖靈已經tī伊ê內在做主人，人已經變成「聖靈ê殿」，伊beh koh再隨便lim酒已經無gōa可能à；甚至伊beh得tio̍h耶穌ê「我是alfa，我是omega，我是初，我是終」ê性命，已經是kahná是桌頂ni柑à。

以上to̍h是王世勛ê信「耶穌死去koh活」ê故事。

王世勛thang講是我一生ê好朋友，彼此非常熟sāi，尤其是tī信仰上，彼此提攜，互相學習，受益真大。

伊ê宗教天份kah恩賜lóng比我khah koân，siōng大ê特點是伊行動斬截koh有力。早年伊用四十五工ê時間to̍h ētàng進入「無我」中，無親像我tio̍h靠靜坐參禪真chē年chiah ētàng對「無我」有kóa理解。後來伊mā是用功四十五工，to̍h ētàng改宗信「耶穌死去koh活」，所得tio̍h ê屬靈恩賜mā比我khah大，尤其是聖靈降臨tī伊身軀頂，隨時動手改善伊ê酒狂ê pháiⁿ習慣；無親像我足足費時23年，聖靈chiah開始內住tī我ê身軀，hō͘我了解kakī是罪惡kui身軀ê人。種種chiahê lóng hō͘我自嘆不如。

M̄koh，m̄管án怎講，阮lóng各自有一套信「耶穌死去koh活」ê夠額理由，阮to̍h一定ētàng行tī神ê祝福中，這是永遠無變ê。

Ánne講起來，你ná ē無beh信「耶穌死去koh活」ê一套裡由leh？ ──2017、08 、11 貼tī《基督教通訊》