《宋澤萊新著《天路拾穗》台譯版》

 | | | 轉寄

第三部：聖靈內住篇_33【題目】聖靈內住是án怎ētàng戰贏邪情私慾？

作者 宋澤萊 2026.10.18






33【題目】聖靈內住是án怎ētàng戰贏邪情私慾？


當聖靈ētàng久長tiāⁿtiāⁿ內住tī咱ê胸腹了後，咱chiah ētàng koh khah清楚體會tio̍h咱ê內在的確是一个bē細ê抽象空間。

你thang kā chitê內在ê空間譬喻做一个空心ê容器。根據《聖經》ê講法，chitê容器tī人tú生落來ê時，to̍h m̄是完全空空ê。因為，它hông放落去「人悖逆上主」ê chitê邪情私慾，根據《聖經》講，這是來自亞當ê遺傳，he是一切罪惡ê由來。所以講，基督教並m̄是主張人kah一張白紙仝款來到世界，tī未出母胎ê時，咱實在已經有罪ā！

以後，咱為tio̍h肉體情慾ê需要，為tio̍h生存爭鬥ê需要，koh khah chē ê邪情私慾進入chitê內在ê容器，因此，姦淫、lâsâm、邪惡、拜偶像、邪術、仇恨、爭競、忌恨、激心、結黨、紛爭、異端、嫉妒、兇殺、罪酒、沉淪ê宴席……chiahê算bē盡ê邪情私慾lóng紛紛進入chitê容器來à。當chiahê邪情私慾tú進入內在空間了後，ē tī人ê內在夯起波紋，甚至變成大水湧。Khah無辦法ê人，to̍h hō͘ in變成一種行為，tī行為中得tio̍h邪情私慾ê出口，就ánne hō͘內在空間ētàng平靜落來，吐一口氣，致使tī相phah kah殺人了後，竟然講：「我終其尾得tio̍h解脫à！」所以無辦法ê人一生to̍h充滿犯罪ê舉動，行tī坎坷、罪惡ê路裡。比較khah有辦法ê人，kiámchhái to̍h ētàng用撙節、轉移、升華ê種種辦法，kā in壓制、疏通、消除，hō͘ in tī身chiūⁿ無產生破壞性ê行為，避免產生身軀á是性命ê危害，chiahê人通常ē hông稱做聖人、賢者、大丈夫，意思是講，伊m̄是普通人。

基督徒比較上kah chit兩種人無仝：tāi先，伊知影靠伊kakī是永遠無法度避開chiahê邪情私慾。因為咱ê內在永遠是一个容器，它無hông khǹg入去chitê邪情私慾，就khǹg入去hitê；咱ē oh得逃閃千萬个邪情私慾ê進住。其次，tī邪情私慾進住了後，憑軟chiáⁿ ê kakī，永遠oh得撙節邪情私慾ê鼓動kah引誘，in終其尾ē帶領我進入hitê死亡ê世界！M̄koh好佳哉，上主為基督徒留一个方法， ētàng閃避邪情私慾ê攻擊；he to̍h是hō͘聖靈ētàng永住身軀ê方法，hō͘基督徒逃避chitê永遠ê刑罰！

當聖靈進住內在空間以後，tāi先to̍h kahná hôngphah一針永遠ê輕鬆劑，ē隨時降kē你hitê固執ná親像石頭ê本性，kui个人lóng放鬆落來，就ánne ētàng接受別人ê批評kah指教；而且ētàng感激chiahê批評kah指教。你ētàng看破別人ê好意，而且開始ētàng理性看待kakī。本來ê石心to̍h轉成肉心，性情ē有大轉變。

續接ê是：你隨時ētàng知影罪是啥物，以及它ê範圍大概有gōa大，這是咱ê lâsâm本性tī聖靈ê聖潔本性對照之下，隨時to̍h ē顯露出來ê。你m̄免食力，隨時to̍h ētàng心內知知，了解kakī to̍h是罪人。Ná親像一張烏紙，本來m̄知kakī有gōa烏；chitmá來一張白紙，而且排做伙，烏色ê紙ê烏色to̍h hông強烈創景出來，koh khah án怎都無法度推辭，無法度掩蓋。除了恬恬á認以外，無啥物好掰會！

Koh再續接，聖靈ē用平安kah喜樂填滿你心胸ê抽象空間，為咱ê內在起造一个純粹平安kah喜樂ê家園，hō͘你平安tòa tī hia。Hit種平安kah喜樂ētàng趕走真chē你一向習慣想beh ê刺激、hò͘ⁿ慾、狂歡，koh khah án怎都無需要任何ê邪情私慾；mā無任何ê空間thang hō͘邪情私慾進入siuⁿ久，tio̍h算邪情私慾勉強beh入來tòa koh khah久，mā真緊hông消滅。Tī《約翰福音》14：17，耶穌bat講：「我留落來平安hō͘ lín，我kā我ê平安賜hō͘ lín，我所賜ê，無親像世間人所賜ê。」耶穌ê意思是講，上主ê平安m̄是一般世間人ētàng hō͘你ê hit種平安，he是聖靈chiah ētàng hō͘你非凡ê平安。平安既然是ánne，喜樂mā仝款。

我知影，he m̄是我ētàng做到ê，卻是聖靈做ê，完全是聖靈ê功勞，我m̄敢講hit內面有我phah拚ê結果，he純粹是上主所賜ê恩典！

一而再再而三，當咱teh beh犯極大ê錯誤，tú tī無知ê狀態ê中間，tio̍h算koh再大ê良心mā無法度趕走咱ê邪情私慾ê時，內住ê聖靈to̍h ē隨時插手來管理咱。祂用一種威脅á是處罰，來強迫你改正，hō͘咱避免產生不幸ê後果，這koh khah是聖靈ê功勞，絕對m̄是咱ê能力ētàng做到ê。舉例來講，咱kah父母、兄弟、朋友、牽手、kiáⁿ兒lóng有恩怨；不幸ê人，ē因為ánne soah領受極大ê損失。有tang時á，咱to̍h ē失去理性，á是想beh報復對方，甚至加害對方。Chiahê極端ê行為，ē為咱帶來無法度彌補ê傷害。Tī要緊ê關頭，內住ê聖靈bē khiā koân山看馬相踢，祂ē向你施加壓力，á是警告，á是恐嚇，hō͘你看tio̍h kakī ê無知kah不義，siōng尾逼kah咱放棄邪情私慾，回復正常。凡是chiahê，lóng m̄是咱ê功勞，乃是聖靈ê成就。

咱是憑靠聖靈入來身軀tòa了後，hō͘邪情私慾無koh tī咱ê身軀內底發生破壞性ê功用，咱就ánne被更新，重新塑造。所以基督徒mā ētàng kah無信仰ê人á是異教徒仝款，oló kakī ētàng變成是聖人、賢者、大丈夫；只是基督徒通常koh khah ētàng明白內在ê實情，知影chitê聖人、賢者、大丈夫m̄是咱kakī ētàng做出來ê，卻是聖靈替咱做出來ê，了後成就tī咱chiahê不配得tio̍h ê罪人ê身軀頂！

──2014、07、06貼tī《基督教通訊》

──2017、09、22略修改tī鹿港