《宋澤萊新著《天路拾穗》台譯版》

 | | | 轉寄

第一部：稱義得救_主題4：是án怎「信耶穌koh活」to̍h ētàng hō͘咱得tio̍h上主ê「義」？

作者 宋澤萊 2026.01.25




第一部 稱義得救

主題4：是án怎「信耶穌koh活」to̍h ētàng hō͘咱得tio̍h上主ê「義」？

所謂ê「義」tī契約á是法律上ê定義to̍h是「公平」，也to̍h是咱一般所講ê「行為公正」；á所謂「義人」to̍h是teh指行為公正koh無罪ê人。Chitê定義真適合the̍h來解說「因信稱義」ê「義」chitê字。

上主宣判咱是「義人」是真重要，除非是ánne，基督徒to̍h無人ētàng得救。

Ánne，有原罪ê咱應該án怎chiah ētàng得tio̍h上主宣判咱已經是無罪ê「義人」leh？咱無妨thang the̍h《聖經》裡ê〈路得記〉來kā它考察。

〈路得記〉是一篇非常短ê故事，內面有三个主要ê人物：一个是「路得」chitê少年chabó͘ gín’á，她to̍h是將來Tabi̍t王ê太媽；另外一个是「波阿斯」，伊是將來Tabi̍t王êchapo͘祖；另外一个是路得tī未改嫁hō͘波阿斯chìn前ê hitê take拿俄米。Chit三个人彼此以「義」相待，換句koh khah淺白ê話來講to̍h是：in彼此lóng無條件koh公平照顧對方，mā to̍h是彼此施恩hō͘對方，因為ánne帶來故事美好ê結局，終其尾成做千古美談。

故事是ánne ê：

Tī以色列士師ê時代，有一pái，偤大地區ê伯利恆發生大飢荒，人民只好遷去他鄉tòa。拿俄米to̍h kah她ê翁婿、兩个kiáⁿ兒lóng遷徙去摩押地方tòa。後來，拿俄米ê翁婿死去，拿俄米to̍h爲兩个kiáⁿ兒娶摩押地區ê chabó͘ gín’á做bó͘，拿俄米就ánne有兩个摩押人ê新婦；中間ê一个新婦to̍h是路得。後來，chit兩个kiáⁿ兒mā死去，厝裡to̍h只chhun三个chabó͘人à。

無gōa久，拿俄米聽講偤大地區狀況tńg好，已經ētàng得tio̍h米糧ê供應，to̍h決定tńg來伯利恆tòa。M̄koh，chitê take認真考慮兩个新婦ê未來前途，tī起身啟程ê時，極力苦勸chit兩个新婦tńg來後頭厝tio̍h koh改嫁，因為拿俄米老ā，koh來mā bē有kiáⁿ兒，無可能hō͘ in koh有翁婿，若是tòe她去，to̍h等於耽誤in ê前途，恐驚耶和華to̍h ē責備她。拿俄米ánne一講，中間ê一个新婦隨時tńg來摩押人異教地區ê後頭厝à。M̄koh路得卻m̄甘離開chitê可憐ê take，她講：「M̄thang催我tńg去後頭厝，妳往tó位去，我to̍h往tó位去；妳tòa tó位，我to̍h tòa tó位；妳ê國to̍h是我ê國；妳ê上主to̍h是我ê上主。」摩押人路得竟然選擇m̄虧待她ê take，決定跟tòe她一生。

Tńg來伯利恆了後，路得徵求take同意，以拾穗維持生活。有一pái，tī 拿俄米親chiâⁿ ê一位大財主波阿斯ê田裡拾穗，她跟tòe teh收割ê人ê後面。波阿斯早知影摩押chabó͘ gín’á路得是一个堅強跟tòe take，真有賢德ê chabó͘人。伊to̍h決定無beh虧待chitê來自異邦ê chabó͘ gín’á，吩咐收割ê工人bētàng侮辱她，甚至容允她khioh koh khah chē ê麥穗。後來，路得to̍h tòe tī波阿斯ê女僕身後，tàu陣khioh麥穗。

Take知影波阿斯對路得寬大，to̍h想beh kā chitê少年ê新婦路得嫁hō͘波阿斯。Take to̍h吩咐路得，利用簸大麥ê一个暗時，偷偷á潛入去波阿斯ê睏房，倒tī伊ê身邊，而且表示願意嫁hō͘ chit位已經m̄是少年人ê波阿斯。

當然，khiā tī以色列ê風俗，波阿斯是拿俄米家ê近親，本來to̍h有理由mā有義務娶chitê親人中ê寡婦（註：這是以色列人古早時代照顧寡婦ê措施，mā hō͘死去ê翁婿bē致使無名ê方法），何況波阿斯koh是hiahni̍h看重路得。M̄koh，波阿斯坦白kā路得講，tī親族中，iáu有一位親chiâⁿ mā是財主，比伊koh khah是拿俄米ê至親。若是chitê人m̄娶，伊chiah beh娶她。

波阿斯to̍h邀請真chē親人來做證，tī城門口等待hit位koh khah有資格娶路得ê親人來到。波阿斯表示，拿俄米想beh賣掉路得前夫ê所有ê土地，對方ētàng chitmá to̍h買田園，m̄koh有附一个條件to̍h是：買土地ê時， tio̍h順續娶路得。對方一聽，恐驚用現有ê金錢買田園，to̍h拒絕chitê提議。所以tī真chē 人kah長老ê見證下，波阿斯to̍h贖回拿俄米所有ê田園，mā娶路得。

In結婚了後，生俄備得，拿俄米to̍h成做chitê gín'á ê養母，厝邊ê人lóng講：「拿俄米得tio̍h gín'á à！」

後來，大漢ê俄備得生耶西，耶西生Tabi̍t。

Chitê故事teh說明啥物？

Lóng是用來說明拿俄米、路得、波阿斯之間ê以「義」相待，tī為人處事中彼此m̄ bat虧待對方，行為lóng真適當，終其尾成就了美好ê tāichì！

Chit三个人先天上kahná to̍h是真注重「義」ê人，而且kahná teh比賽啥人比啥人koh khah有「義」。

Chitê take對新婦充滿「義」，一心一意bē giàn hō͘ in落入無翁婿ê孤獨个處境，一屑á都無考慮kakī，想空想縫ài新婦改嫁。她對波阿斯chitê親chiâⁿ mā用「義」相待，知影伊對in真好，to̍h決定beh kā kakī ê新婦嫁hō͘伊。

同時波阿斯mā是義人，伊看tio̍h chitê願意跟tòe take，信仰耶和華ê外邦chabó͘ gín’á，to̍h真感動，無條件hō͘她真大ê幫忙。伊甚至一屑á都無考慮kakī，無認為kakī to̍h是娶路得ê siōng好人選，想beh叫一个koh khah適合ê親chiâⁿ來娶她。

路得mā真講求「義」，她m̄肯放棄孤獨ê take，極力奉養她，hō͘她免除孤苦；當她知影波阿思對她好，mā無計較波阿斯是有年紀ê chapo͘人，聽從take ê意見，願意嫁hō͘波阿斯。

「義」構成in之間ê正確對待，而且是當kakī付出「義」ê時，無gōa久to̍h ē得tio̍h別人對伊ê「義」ê回報。Chit種人kah人之間以「義」相待ê故事，tī《舊約》內底並m̄是真chē；所以〈路得記〉成做人人kah意閱讀ê文章，感覺故事極好，真有價值。

咱已經講過：所謂ê「義」，to̍h是「公平」ê意思；所謂ê義人，也to̍h是ētàng四kè考慮tio̍h公平做tāichì ê人。Chitê公平，tī消極方面，to̍h ē引起「bē虧待別人」ê行為；tī積極方面to̍h ē引起對方「投之以桃李；報之於瓊瑤」（食人一口，報人一斗）ê報恩回饋。路得chitê故事ê價值to̍h是tī chia。

咱ê信仰mā是ánne；我私底下認為，若beh講咱kah上主之間是用「疼」相待，不如講應該以「義」相待。咱lóng知影，一个基督信徒信上主siōng大ê目的，to̍h是求上主判定咱是「義人」，也to̍h是「無罪ê人」，就ánne無koh虧欠上主啥物。Kantaⁿ有得tio̍h chitê「義」，人chiah ētàng得救，人to̍h hông chhōa往新天新地、新耶路撒冷城去à。M̄koh，tī得tio̍h上主ê「義」chìn前，咱一定tio̍h先對上主有「義」，也to̍h是對耶穌有「義」，也to̍h是hō͘耶穌siōng大ê「義」。因為你先對耶穌有「義」，耶穌to̍h「報人一斗」，用伊siōng大ê「義」來回報妳，kā祂ê「義」歸hō͘你，也to̍h是講hō͘你「無罪」來得救à。

Ánne，平凡ê咱chit輩kám ētàng hō͘耶穌啥物siōng大ê「義」leh？你án怎ētàng hō͘耶穌siōng大ê「公平」leh？

He to̍h是「承認耶穌死去koh活」！

是án怎講「承認耶穌死去koh活」是siōng大ê「義」leh？這是因為耶穌ê死是宇宙siōng大ê「不義」。上主是無應該死ê，m̄koh祂卻tī人類ê手裡死去。亞當siōng大ê罪是背叛上主ê吩咐，m̄koh chitmá亞當ê後代koh khah膽大妄為，竟然敢kā耶穌mā thâi死，chit種不義（罪）是無比ê大，耶穌ê委屈mā是無比ê大。所以當你「承認耶穌死去koh活」ê時，to̍h等於還耶穌一个公道，kā「公平正義」還 hō͘耶穌，等於責備人類殺害上主ê大不義，mā責備宇宙siōng大ê無公平。Chit時，耶穌to̍h ē回報你，kā祂ê「義」mā lóng總歸hō͘你，你to̍h成做「義人」，終其尾得救à。

「耶穌koh活」chitê事實，tī耶穌拯救人類ê事工內底佔有極重要ê地位。一旦耶穌無koh活，關係基督徒末日ê koh活就ánne to̍h ē歸tī虛無，連帶末日審判、新天新地ê來臨mā lóng ē歸tī虛無。所以「耶穌koh活」ê教義事實上是基本教義ê核心，咱bēsái無kā它把握。

Tī信仰ê中間，「承認耶穌死去koh活」對基督徒ê「稱義」，mā因為ánne有一定重要ê地位。保羅至少兩pái提起耶穌koh活kah稱義ê關係bētàng分割（注1）。伊認為只要心內相信耶穌死去koh活，基督徒to̍h ētànḡ稱義。 M̄koh，保羅並無進一步說明中間ê原理，實在是一个遺憾。我想保羅是kā它看做是實踐內底ê一个奧秘，換句話來講̄，是ài咱去履行，卻m̄是用來談因論果ê。Chitmá，我用「義」chitê觀念來解說，大概是大違背保羅ê意思。M̄koh，倒páiⁿ來講，假使有人聽bat我講啥物，而且同意我所講ê論點，mā tòe leh去履行，ánne chitê人ēsái講是有福ê人à。

簡單來講，beh求得上主ê義bē oh，只有你一定tio̍h先對耶穌有義！ 註1：保羅講：「你若嘴裡認耶穌為主，心內信上主叫祂tùi死裡koh活，to̍h一定ē得救。因為人心內相信，to̍h ētànḡ稱義；嘴裡承認，to̍h ētànḡ得救。」〈羅10：8-10〉「koh活，是爲tio̍h beh叫咱稱義。」〈羅4：25〉。 ──2010、07、22貼tī《基督教通訊》