《台語荒漠甘泉（全羅版）》

 | | | 轉寄

"Kiû Chú ín-chhōa, tài-niá"

作者 陳清俊 翻譯 2008.07.06

listen



Chhit ge̍h chhoe-la̍k (Chhit ge̍h la̍k ji̍t)

"Goán iā m̄-chai tio̍h cháiⁿ-iūⁿ kiâⁿ, goán ê ba̍k-chiu choan-choan ǹg Lí." (Ṳ Le̍k-tāi-chì-lio̍k 20:12)

Ū chi̍t lâng kiò, O͘-sat, “chhun-chhiú hû Siōng-tè ê iok-kūi,” chiū sit-khì sìⁿ-miā. I chhun-chhiú hû, oân-choân sī chi̍t-phìⁿ hó-ì, “in-ūi gû tio̍h-tak.” (Ṳ Sat-bó͘-jíⁿ 6:6) chóng-sī in-ūi i chhiok-hoān tio̍h Siōng-tè ê sū-kang lâi chòe chhò-gō͘ ê sū, Siōng-tè chiū phah-sí i. (Ṳ Sat-bó͘-jíⁿ 6:7) Kè sìn-sim ê seng-oa̍h, siông-siông ài lán m̄-thang sûi-piān chhap-chhiú.

Lán nā chiong chi̍t-kiāⁿ tāi-chì kau-thok Chú, chiū bô tit koh kè-mn̄g, I ê chiàu-kò͘ pí lán khah hó, iā bô su-iàu lán ê pang-chān. “Tio̍h chēng-chēng tī Iâ-hô-hoa ê bīn-chêng, khoan-sim thèng-hāu I; M̄-thang in-ūi hit-hō sū-sū heng-thong-ê, kap hit-hō pháiⁿ kè-bô͘ tit-tio̍h chiâⁿ ê, lâi put-pêng.” (Si-phian 37:7)

Lán tī seng-oa̍h siōng ū ê sū khòaⁿ khí-lâi oân-choân m̄-tio̍h, chóng-sī Siōng-tè tùi lán ê chêng-hêng liáu-kái chai-iáⁿ pí lán khah chheng-chhó. Lán chí-iàu oân-choân sìn-jīm I, chiàu I ka-kī ê hong-sek, I ê sî-kan chòe kang, I beh tī siōng sek-tòng ê sî-khek oân-sêng. Lán bô hêng-tōng siông-siông pí hêng-tōng khah ha̍h Siōng-tè ê chí-ì. Bô-thêng ê kang-chok á tōng-chok chí-ū sī siong-hāi, in-ūi Siōng-tè í-keng tap-èng I ê chí-ì beh sêng-chiū. --- A. B. Simpson

Góa bông-bông biáu-biáu bōe-bêng, tùi Chú kóng,
Chú ah, kā góa chhòng hō͘ i hó koh bêng!
Tùi Lí, àm-sî ná ji̍t-tàu,
O͘-àm ná kng-bêng,
Góa kiaⁿ tú-tio̍h khùn-lân ho̍k-cha̍p ê sū-chêng,
Góa siang-chhiú iô bōe thêng,
Kâu-kha kâu-chhiú lâi phòa-húi,
Lí ê chhiú éng bô chhò-gō͘ ê chêng-hêng.

Góa giâu-gî put-tēng, tùi Chú kóng,
Chú ah, chhiáⁿ soat-bêng,
Tó-chi̍t-tiâu lō͘ sī chin-chiàⁿ pêng-chēng?
Tó-chi̍t-tiâu lō͘ ū lī-ek ê chêng-kéng?
Góa ê tì-hūi khòaⁿ bōe bêng,
Iā m̄-chai án-chóaⁿ chìn hêng;
Tùi Lí sī chheng-chhó,
Chú ah, hō͘ góa khòaⁿ ōe chheng!

Chiong jîn-seng ê kau-tîⁿ, khùn-jiáu ê sū kau-thok tī Chú ê chhiú, iû I khì chhù-lí, sī jōa-chiâⁿ sóng-khoài, hoaⁿ-hí ê sū.

附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com