《台語荒漠甘泉（全羅版）》

 | | | 轉寄

"Kap Chú tâng-kiâⁿ"

作者 陳清俊 翻譯 2013.01.27

listen

Chiaⁿ ge̍h jī-chhit (It ge̍h jī-cha̍p-chhit ji̍t)

"ka-kī beh hō͘ lín chiâu-chn̂g, kian-kò͘, ióng-kiāⁿ." (I Pí-tek 5:10)

Lán kap Ki-tok beh kiàn-li̍p sin koh chhim-ji̍p koan-hē ê tāi-seng, ài chhiong-hun liáu-kái, bêng-pe̍k che sin koan-hē tùi lán só͘ tit ê koân-lī. Nā ū chi̍t-si-si-á ê hoâi-gî, lóng beh phò-húi lán ê sìn-sim. Tng lán tit-tio̍h liōng-kng, tit chheng-chhó, lán chiū thang hó-táⁿ hiòng chêng kiâⁿ. Lán koat-tēng lán ê soán-te̍k, chiū koat-ì hiòng chèng-khak ê hong-hiòng khì chòe, ū chhiong-chiok ê sìn-sim kap ióng-khì khì chòe, ná chhin-chhiūⁿ tōa chhiū tèng-kun tī tē chi̍t-poaⁿ. Lán ê hiàn-sin ài chhin-chhiūⁿ sin-niû tī kiat-hun tián-lé sèng-tôaⁿ chêng, chiong ka-kī kau-thok hō͘ sin-lông chi̍t-iūⁿ, chiong-seng chun-siú, bô pó-liû, bô hō͘-hóe.

Jiân-āu sī kiàn-li̍p kap khó-giām ê sî-kî. Lán tio̍h khiā ún lán ê kha-pō͘, kian-tēng put-î, ti̍t-kàu sin ê koan-hē khak-li̍p tiâu-tiâu, chiâⁿ-chòe sìⁿ-miā ê chū-jiân hoán-èng. Ná chhin-chhiūⁿ gōa-kho i-seng chiap-kut āu, ài ēng nn̄g-tè pang kā gia̍p-tiâu-tiâu, á-sī ēng chio̍h-ko khōng hō͘ i ân, chiām-sî hō͘ i bōe tín-tāng. Siōng-tè iā ōe ūi I ê kiáⁿ-jî chng lêng-sèng ê pang, á-sī chio̍h-ko, kiò in ha̍k-si̍p an-chēng, tō͘-kè tē it kai-tōaⁿ sìn-sim ê khó-giām. Ū-sî chhì-giām sī kan-lân, chóng-sī, "Koh bān hāng un-tián ê Siōng-tè, chiū-sī bat tī Ki-tok tiàu lín tit-tio̍h I éng-oán ê êng-kng ê, tī lín chiām-sî siū khó͘ ê liáu-āu, ka-kī beh hō͘ lín chiâu-chn̂g, kian-kò͘, ióng-kiāⁿ." (I Pí-tek 5:10) --- A.B. Simpson

Tī chōe kap pīⁿ-thàng che nn̄g hāng sū, ū siāng-khoán ê chū-jiân-lu̍t, nā-sī sûi khoân-kéng chhut-chāi in kè-sio̍k khì, chiū ōe tîm-lo̍h tī tōa chhì-thàm-chiá, mô͘-kúi ê koân-sè ē. Tān-sī Ki-tok Iâ-so͘ iā ū chi̍t-tiâu lêng-sèng kap jio̍k-sin seng-oa̍h-lu̍t, chiū-sī khò-tio̍h Ki-tok, lán ōe-thang khiā khí-lâi, tí-khòng pēng thâi-iâⁿ hit ê kā lán beh khiú lo̍h khì ê chū-jiân-lu̍t.

Beh án-ni chòe, lán su-iàu chin-chiàⁿ sio̍k-lêng ê le̍k-liōng, bo̍k-piau kian-tēng, li̍p-tiûⁿ khiā chāi, sìn-sim ê si̍p-koàn hoán-èng. Chhin-chhiūⁿ kang-tiûⁿ ê tiān-la̍t kiòng-èng goân-lí chi̍t-iūⁿ. Ài ki-khì tín-tāng, su-iàu seng khui khai-koan, khui liáu-āu, khai-koan iā ài it-ti̍t khǹg tī khui ê ūi, án-ni, tiān-la̍t chiū beh kiòng-èng put-toān. Koh tiōng-iàu ê sī ki-khì ài kap tiān-goân liân chòe-hé, nā-sī ki-khì kap tiān-goân ê chiap-chhiok oân-choân, tiān-la̍t beh î-chhî it-chhè ki-khì chèng-siông ê ūn-chok.

Ti lán kap Siōng-tè tâng-kiâⁿ ê sū, ū chi̍t-tiâu sio̍k-lêng-lu̍t ài khì kéng-soán, siong-sìn, chun-siú kap kian-chhî lo̍h-khì. Lán án-ni chun-thàn, chiū lán ê chiâⁿ-sèng, i-tī ê sū, lóng beh chèng-siông ūn-chok. --- tùi "Tī tē ná tī thiⁿ"


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.org