《台語荒漠甘泉（全羅版）》

 | | | 轉寄

"Góa ê un-tián kàu-gia̍h lí ēng"

作者 陳清俊 翻譯 2012.08.05

listen


Poeh ge̍h chhoe-gō͘ (Poeh ge̍h gō͘ ji̍t)

"Ū góa ê un, lí chiū kàu-gia̍h." (Ṳ Ko-lîm-to 12:9)

Siōng-tè “hoaⁿ-hí” (I Ko-lîm-to 1:21) chiong góa ê siōng sòe-hàn ê kiáⁿ-jî tòa lī-khui chit ê sè-kài. Chit ê giâm-tiōng ê khó-giām hō͘ góa chin thòng-khó͘. Góa chiong sòe-sòe ê si-thé hē ji̍p tī bōng ni̍h í-āu, tùi kàu-tn̂g ê bōng-tē tńg-lâi ê sî, ū chi̍t ê le̍k-liōng ài góa ǹg hōe-chiòng soan-kóng siū khó͘-lān ê ì-gī.

Góa hoat-kiàn āu ê lé-pài-ji̍t chú-ji̍t-o̍h ê khò-tê sī “Góa ê un, kàu-gia̍h lí ēng” Góa chiū ēng i chòe tê-ba̍k, sī Chú tùi hōe-chiòng tùi góa ê sìn-sit. Chóng-sī góa chún-pī káng-chiuⁿ ê sî, hoat-kiàn góa pēng bô chin-chiàⁿ chit-chióng ê seng-oa̍h thé-giām. Góa kūi-lo̍h, kiû Chú hō͘ I ê un-tián tùi góa ū kàu-gia̍h ēng. Góa teh kiû ê sî, ba̍k-chiu phah-khui chi̍t-ē khòaⁿ, chit kù keng-bûn í-keng chng-kheng kòa tī piah-téng. Sī góa ê lāu-bú nn̄g-saⁿ kang chêng hō͘ góa ê. Hit-sî góa iáu sī tī sit-khì kiáⁿ tō͘-kà ê só͘-chāi, lâng bô tī chhù ni̍h. Góa chhiáⁿ lâng kā i kòa khí-lâi, tān-sī bô chù-ì tio̍h téng-bīn ê jī. Chit-sî góa giâ thâu chi̍t-ē khòaⁿ, hiah ê jī chiū tī gán-chêng. “Góa ê un-tián sī kàu-gia̍h lí ēng.”

“Sī” sī ēng bêng-hián ê le̍k-sek siá, “góa ê” kap “lí” koh ēng lēng-gōa chi̍t sek piau chhut-lâi. Ū chi̍t ê sìn-sit má-siōng ji̍p góa ê sim-lêng lāi. Ná chhin-chhiūⁿ chek-pī góa ūi-sím-mi̍h iau-kiû Chú “hō͘ lí ê un-tián kàu-gia̍h góa ēng”, góa chha-put-to thang thiaⁿ-kìⁿ I ê tap-hok: “Lí thài ōe iau-kiû í-keng “sī” ê mi̍h-kiāⁿ neh?” Góa bōe hō͘ góa ê un-tián pí góa í-keng hō͘ lí ê khah chhiong-chiok. Khí-lâi, sìn i. Lí ōe hoat-hiān che sī chin-chin si̍t-si̍t ê seng-oa̍h keng-giām.

Chú ê ōe kóng tit chin kán-tan. “Góa ê un-tián sī, (“m̄-sī chiong-lâi, á-sī khó-lêng”), kàu-gia̍h lí ēng” Hit-sî khí, “góa ê” “lí” kap “sī” chit saⁿ jī chiū éng-oán khek tī góa ê sim-lāi, bōe bô khì. Kám-siā Chú, tùi hit kang khí, góa it-ti̍t ló͘-le̍k seng-oa̍h tī hit ê chin-lí ê si̍t-chāi ni̍h.

Chit ê keng-giām hō͘ góa kap góa só͘ siūⁿ beh thoân-ta̍t hō͘ lâng ê kà-sī sī: Bo̍h-tit chiong Siōng-tè í-keng si̍t-hêng ê sū iáu teh hi-bōng, iáu teh kiû. Eng-kai sóng-sóng khoài-khoài chiap-siū chit ê hiān-si̍t. Lí chiū ōe hoat-hiān chí-iàu lí siong-sìn, Siōng-tè ê un-tián kàu-gia̍h lí ēng. --- H.W. Webb Peploe

Tàⁿ ná tāng, un-tián ná tit the̍h,
Kang lú chòe, le̍k-liōng lú ke,
Thòng-khó͘ cheng-ka, lîn-bín khah chōe,
Chhì-liān ka-pē, pêng-an iā ka-pē.

Tng jím-nāi kàu hān-tō͘, bōe tòng,
Tng le̍k-liōng pòaⁿ-kang chiū bô lō͘-iōng,
Tng só͘-ū chu-goân ēng kàu chīn-pōng.
Thiⁿ-pē hong-hù ê siúⁿ-sù chiah khai-sí hêng-tōng.

I ê thiàⁿ bô hān-liōng, koh ū bōe chhek-to̍k ê un,
I sù lâng bû-hān le̍k-liōng tn̂g-tn̂g kú-kú,
Tī Iâ-so͘ lāi, bû-kiông ê hong-hù,
I siúⁿ-sù, koh siúⁿ-sù, chài siúⁿ-sù.


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.org