《台語荒漠甘泉（全羅版）》

 | | | 轉寄

"Siong-sìn bô giâu-gî"

作者 陳清俊 翻譯 2012.04.01

listen


Sì ge̍h chhoe-it (Sì ge̍h it ji̍t)

"I beh thâi-sí góa, góa bô thang ǹg-bāng." (Iok-pek-kì 13:15)
"In-ūi góa bat góa só͘ sìn ê." (Ṳ Thê-mô͘-thài 1:12)

Góa bōe giâu-gî,
Só͘ ū tńg-lâi ê chûn lóng pháiⁿ-khì,
Góa siong-sìn Sèng-chhiú, éng bōe sit-chhò, teh kà-sī,
Pháiⁿ-sū iā beh piàn chòe iú-lī,
Sui-jiân chûn phòa, lâu ba̍k-sái, hi-bōng sit-khì,
Góa iáu beh kóng, “Góa siong-sìn Lí.”

Góa bōe giâu-gî,
Sui-jiân góa ê kî-tó bô tit-tio̍h thiaⁿ-kìⁿ,
Góa siong-sìn che lóng sī hó-ì,
Sui-jiân chin siong-pi,
Góa iáu kian-sìn chèng-gī,
Kè-sio̍k hoat kng chiò bô chí.

Góa bōe giâu-gî,
Iu-siong ná hō͘ chha̍p-chha̍p-tih,
Mâ-hoân sū ná phang kóaⁿ bōe lī,
Góa siong-sìn ló͘-le̍k hiòng koâiⁿ peh-khí,
Chí-ū thong-kè thòng-khó͘, ai-thiàⁿ chiah ōe sèng-lī,
Tī si̍p-jī-kè ē, ai-kiû, sù chû-pi
Siōng tōa ê sún-sit piàn chòe khah tōa ê ek-lī.

Góa bōe giâu-gî,
Sìn-sim ê tiàⁿ khak-tēng put-î,
Ná kian-kò͘ ê chûn, hiòng tōa hong-éng sái khì,
M̄-kiaⁿ sit-pāi, ióng-kám hiòng sí-bông ê hái-ni̍h,
Sui-jiân jio̍k-thé kap lêng-hûn pun-lī,
Ēng chòe-āu chi̍t khùi, hō͘ sè-kan-lâng thiaⁿ-kìⁿ,
Góa tōa-siaⁿ âu-kiò. “Góa bô giâu-gî.”

Chi̍t ūi chin-ū keng-giām ê chúi-siú án-ni kóng, "Tī kiông-lia̍t ê po̍k-hong tiong, lán só͘ tio̍h chòe ê sū, chí-ū chi̍t tiâu pó sìⁿ-miā ê lō͘: chiū-sī chhē bó͘ chi̍t ê ūi-tì thêng tī hia bô sòa ūi." Chhin-ài ê ki-tok-tô͘, che chiū-sī lán só͘ pit-su chòe ê sū.

Ū sî, chhin-chhiūⁿ sù-tô͘ Pó-lô, tú-tio̍h kiông-lia̍t po̍k-hong, bô thài-iông á-sī thiⁿ-chhiⁿ thang lâi pang-chān kiâⁿ-chûn. Chit sî, lí chí-ū su-iàu chòe chi̍t hāng sū, iā sī in-ūi chí-ū chi̍t tiâu lō͘. Lí-tì bōe pang-chān lí, kè-khì ê keng-giām iā bōe chí-tiám lí, liân kî-tó to bōe an-ùi lí. Chí chhun chi̍t tiâu lō͘, chiū-sī chiong lí ê sim-lêng tēng chi̍t ê ūi-tì, lâu tī hia.

Lí pit-su chiong ka-kī pang tiàⁿ tī Chú ê sin chiūⁿ, jiân-āu put-koán sī hong, lōng, tōa-tô, sih-ná, lûi tân, àm-chio̍h, tōa-éng, hōaⁿ-tiâu-tiâu lí ê chûn-tōa. Kian-koat siong-sìn Siōng-tè ê sìn-si̍t, I ê li̍p-iok èng-ún kap I tī Iâ-so͘ Ki-tok éng-oán ê thiàⁿ. --- Richard Fuller


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.org