《台語荒漠甘泉（全羅版）》

 | | | 轉寄

"Kàu-gia̍h ê un-tián"

作者 陳清俊 翻譯 2012.02.26

listen


Jī ge̍h jī-la̍k (Jī ge̍h jī-cha̍p-la̍k ji̍t)

"Ū góa ê un, lí chiū kàu-gia̍h;” (Ṳ Ko-lîm-tó:9)

Ū chi̍t ji̍t, keng-kè chi̍t-ji̍t ê sin-khó͘ kang-chok, góa teh sái chhia tńg khì chhù ê sî, cha̍p-hun ê ià-siān, sim-chêng ut-chut, chin bái. Hut-jiân thâu-nó͘ lāi chhut-hiān “Ū góa ê un, lí chiū kàu-gia̍h.” Kàu chhù, chiū hian khui sèng-keng chhē chhut chit kù ōe, chhē tio̍h, góa hôe-èng kóng, “Chú ah! khak-si̍t, góa ài lí-só͘-tong-jiân án-ni siūⁿ.” Góa chek-sî soah chhiò chhut siaⁿ lâi.

Kàu chit sî, góa chiah liáu-kái A-pek-la̍h-hán hit ê “phak teh chhiò” ê ì-sù. (chham-khó Chhòng-sè-kì 17:17) Chit chat sèng-keng hō͘ it-chhè m̄-sìn ê, piàn-chòe chin hó chhiò. Chhì siūⁿ, chi̍t bé chhùi-ta ê hî, tam-sim lim siuⁿ chōe chúi soah ōe hō͘ hô ta khì. Hô beh tùi hî kóng, “chīn-liōng, hòng-sim lim, góa ê chúi kàu gia̍h lí lim.” Góa iā hóng-hut kìⁿ-tio̍h chi̍t chiah niáu-chhí, tī tōa-tē keng-kè chhit nî ê hong-siu, iáu tam-sim bô kàu chia̍h, ōe gō sí. Chit sî, Iok-sek tùi sòe-chiah niáu-chhí kóng, “Bián hoân-ló, niáu-chhí ah, góa ê chhng-khò͘ niû-si̍t ū kàu gia̍h lí chia̍h.” Góa iā koh siūⁿ tio̍h chi̍t ê lâng khiā tī soaⁿ-téng, chū-giân chū-gú, tùi ka-kī kóng, “Múi nî góa ho͘-khip hiah chōe ê ióng-khì, góa tam-sim ōe kā khong-khì tiong ê ióng-khì suh liáu-liáu.” Tōa-tē beh tùi i kóng, “Chīn-liōng ho͘-khip ah, góa ê khong-khì ū kàu lí ēng.”

Thiⁿ-pē ê kiáⁿ-jî ah, chòe chi̍t ê úi-tāi ū sìn-sim ê lâng! Sió-sió ê sìn ōe chhōa lí ê lêng-hûn kàu thian-tông, úi-tāi ê sìn ōe chiong thian-tông tòa kàu lí lêng-hûn piⁿ. --- Charles H. Spurgeon

Chú ê un-tián ū kàu tōa thang tùi-hù jīm-hô tōa chōng-hóng, chhin-chhiūⁿ:
Ōe hō͘ sim-lêng kiaⁿ-hiâⁿ ê tōa pho-lōng,
Ōe hō͘ lán gông-ngia̍h ê tōa-hong,
Lâng só͘ bōe thang khòng-chè, thu̍t-jiân khí ê po̍k-hong.

Chú ê un-tián ū kàu thang èng-hù jīm-hô sió-sió sū-kiāⁿ, chhin-chhiūⁿ:
Khùn-jiáu lán chiam, chhì chha̍k tio̍h ê im-iáⁿ,
Báng-á-thâng ho͘ⁿ-ho͘ⁿ-kiò ê siaⁿ,
Chhia-lián koāiⁿ-koāiⁿ-háu lóng bōe tiāⁿ. --- Annie Johnson Flint

Tī thian-kok ê gûn-hâng ū tōa phit ê chûn-khoán, thèng-hāu lán ê sìn-sim khì niá. Thiⁿ-pē ê châi-hù ōe thang hō͘ lí hòng-sim, bû-hān-liōng khì niá, khì the̍h.


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.org