《台語荒漠甘泉（全羅版）》

 | | | 轉寄

"Hi-bōng"

作者 陳清俊 翻譯 2011.09.25

listen

Káu ge̍h jī-gō͘ (Káu ge̍h jī-cha̍p-gō͘ ji̍t)

“Góa beh tùi Siōng-tè, góa ê chio̍h-pôaⁿ, kóng, Lí siáⁿ-sū bōe-kì-tit góa? Góa siáⁿ-sū in-ūi tùi-te̍k ê ap-pek, iu-būn lâi kiaⁿ ah?” (Si-phian 42:9)

Chhin-ài ê sìn-tô͘, “Siáⁿ-sū iu-būn lâi kiaⁿ ah?” Lí kiám chai lí ūi-sím-mi̍h siông-siông iu-būn, ai-siong, bô khoài-lo̍k ê goân-in mah? Lí ūi-sím-mi̍h sim lāi siông-siông hoân-ló neh? Sáⁿ-mi̍h lâng kóng o͘-àm sī kè bōe oân ê? Sím-mih lâng kóng tang-thiⁿ sī liân-liân sòa-sòa put-chīn ê peng-seh, sīm-chì sī ná lâi ná tōa, ná kiông-lia̍t ah?

Lí kiám m̄-chai o͘-àm mî kè liáu chiū-sī lê-bêng, khòng-hān liáu chiū ū hō͘-chúi, tang-thiⁿ kè liáu sī chhun-thiⁿ mah? Só͘-í, ài ū hi-bōng! Éng-oán ê hi-bōng, Siōng-tè éng-éng bōe hō͘ lí sit-bōng. --- Charles H. Spurgeon

Pí góa só͘ hi-bōng khah hó ê jîn-seng,
Pí góa só͘ kèng-ùi khah hó ê lêng;
Phòa-chhùi ê kang I siu-chéng,
Ba̍k-sái piàn chhái-khēng.
Hái-iûⁿ tiong, chhiong-móa kiông-hong tōa éng,
Góa ê Chú an-jiân pêng-chēng;
Tī hong-iá kan-khó͘ lō͘ chìn-chêng,
Tiàm-tī I ê thiàⁿ, góa thang tit an-lêng.

Tû-khì sè-chiūⁿ ê pó-khì,
Hián-chhut sē-iok thiàⁿ-thang kong-gī;
Thàng-thiàⁿ ê sim siū siong beh sí,
I ê phang-ko bô m̄ i-tī.
Koán-kàu ēng un-jû chin-lí,
Ēng tì-hūi, khó-giām kap kà-sī,
Ti̍t kàu hiah ê sio̍k I ê lêng-hûn kui ǹg I,
Bô koh khò sè-siōng ê jīm-hô mi̍h.

Chhōa góa tī khòaⁿ bōe-tio̍h ê lō͘,
Só͘ m̄-bat ê chiân-tô͘,
Oan-khiau, chhòng ti̍t; khi-khu, siu pîⁿ,
Ū Chú tī sin piⁿ,
O-ló I sù chang-chhiū ê khì-bī,
Hong-bō͘ ū kam-chôaⁿ tī lō͘ nih.
Ū hé-thiāu tī àm-mî,
Ū hûn-thiāu tī ji̍t-sî.

Tī siōng ut-chut ê ji̍t-chí,
Thiàⁿ ê èng-ún sù hoaⁿ-hí;
Hôe-thâu khòaⁿ kè-khì,
Chai chiong-lâi súi bô pí,
Chhin-chhiūⁿ Kim-àng lāi ū má-ná,
Ia̍h ū khui hoe ê koái-á,
Chú ê lu̍t-hoat hē iok-kūi,
Siōng-tè li̍p-iok chòe pó-hūi.


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.org