《台語荒漠甘泉（全羅版）》

 | | | 轉寄

"Thèng-hau"

作者 陳清俊 翻譯 2011.07.10

listen


Chhit ge̍h chhoe cha̍p (Chhit ge̍h cha̍p ji̍t)

"Góa kiò i, i iā bô ìn." (Ngá-ko 5:6)

Siōng-tè sù lán ū tōa ê sìn-sim, chóng-sī, I siông-siông ēng tn̂g sî-kan ê iân-tî lâi chhì-giām lán. Hō͘ I ê lô͘-po̍k ê siaⁿ sàng hôe-kàu in ê hīⁿ-khang, ná chhin-chhiūⁿ siaⁿ kàu khong-tiong koh siū tôaⁿ tò-tńg, lóng bô hôe-tap. Iā sìn-tô͘ kàu tī thian-tông ê mn̂g, phah mn̂g bô hôe-èng, ná chhin-chhiūⁿ mn̂g-chhòaⁿ siⁿ sian khui bōe khui chi̍t-iūⁿ. Iâ-lī-bí bat án-ni ai-kiò kóng, "Góa ê kî-tó hō͘ ba̍t-ba̍t ê hûn chia-tio̍h, lóng bô ta̍t kàu Lí hia." (Ai-ko 3:44)

Siōng-tè chin-si̍t ê sèng-tô͘ ōe tn̂g-tn̂g thèng-hāu bô tit-tio̍h hôe-tap, m̄-sī in-ūi in ê kî-tó bô pek-chhiat, iā m̄-sī in-ūi Siōng-tè bô tap-èng in ê kî-tó. In ê thèng-hāu sī chāi Siōng-tè teh chiáng-koân, I chiàu "I hó ê sim-ì" (Hui-li̍p-pí 2:13) lâi kiâⁿ tāi-chì. Nā-sī lán ū jím-nāi thèng-hāu ōe hō͘ I hoaⁿ-hí. I kiám-bōe chiàu I tiāⁿ-tio̍h ê ì-sù lâi chòe tāi-chì mah?

Kî-tó bô chi̍t kù ōe bô khì, bô chi̍t kù kî-tó sī pe̍h-pe̍h kóng ê. Siōng-tè pēng bōe bô hôe-tap á-sī bô chù-ì tio̍h lán ê kî-tó. Tāi-chì bô hoat-seng, m̄-sī in-ūi siū kū-choa̍t, siū hó͘-koat, chí sī iân-chhiân nā-tiāⁿ. --- Horatius Bonar

Chú Ki-tok ê iân-chhiân sī chhì-giām lán ê sìn-sim, sī ài ka-kiông lán ê kî-tó. Lán sái chûn tī pho-lōng teh tōa iô ê sî, I kè-sio̍k teh khùn, chóng-sī tng chûn teh-beh tîm lo̍h-khì ê sî, I it-tēng ōe chhíⁿ khí-lâi. I bōe khùn kè-thâu, in-ūi I chòe sū m̄-bat siuⁿ-bān. --- Alexander Maclaren

Iu-siong ê lêng ah! Chēng-chēng, bo̍h koh âu-kiò,
Tián-khui lí lāi-sim teh-beh ko͘-ta ê hio̍h,
Hō͘ I khòaⁿ-tio̍h lâi kng-chiò;
Tán-thāi, o͘-àm ê kiaⁿ, choa̍t-bāng ê sim teh tiô,
I ê chû-ài kap thiàⁿ-sioh hō͘ lí khàu pìⁿ chhiò,
Chhiong-móa kng-bêng, oa̍h-khì, khoài-lo̍k, an-hioh.


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.org