《台語荒漠甘泉（全羅版）》

 | | | 轉寄

"Chi̍t ki chháu, Chi̍t tiám lō͘"

作者 陳清俊 翻譯 2011.01.30

listen


Chiaⁿ ge̍h saⁿ-cha̍p. (It ge̍h saⁿ-cha̍p ji̍t)

“Góa beh tī Í-sek-lia̍t chhin-chhiūⁿ lō͘-chúi;” (Hô-se-a 14:5)

Lō͘-chúi sī tiau-khì, sin-sian, hoa̍t-phoat. Siōng-tè kàng lō͘-chúi sī hō͘ tōa tē keng-sin, lūn-te̍k hoe-chháu, ū sìⁿ-miā. Sèng-keng tiong iā ēng lō͘-chúi piáu-ta̍t sio̍k-lêng ê ōaⁿ-sin. (Thê-to 3:5) kóng, “Sèng-lêng ê ōaⁿ-sin” chiū-sī Sèng-lêng ná lō͘-chúi koàn-ak tī lâng ê lêng-sèng ê seng-oa̍h, sim-lêng hok-tò tit khùi-la̍t.

Chin-chōe Ki-tok-tô͘ kang-chok-chiá bô jīm-sek, koh hut-lio̍k tùi thiⁿ lâi ê kam-lō͘ sī tùi in ê sìⁿ-miā ū siong-tong ê tiōng-iàu-sèng. Soah sit-khì lêng-miā ê keng-sin kap le̍k-liōng, chòe-kang bô la̍t, beh sí beh sí.

Chhin-ài ê hiaⁿ-tī ah, lí kiám bat khòaⁿ-tio̍h chi̍t-ê lô-tōng-chiá kui-ji̍t choh-sit bô-thêng, lóng bô chia̍h pn̄g. Lí kiám bōe kám-kak chit-chióng lâng chin-gōng mah? Án-ni, Siōng-tè ê kang-lâng bo̍k-iúⁿ iûⁿ-kûn, khiok bô chia̍h tùi thiⁿ lâi ê má-ná, bí-niû. Lí siūⁿ in kiám ū khùi-la̍t lâi chòe chin-hó ê kang mah? Lêng-sèng ê bí-niû m̄-sī kú-kú chia̍h chi̍t piàn chiū ū kàu, sī ài ji̍t-ji̍t tit “kam-lō͘” lêng-sèng ê keng-sin.

Sìⁿ-miā chhiong-móa sio̍k-thiⁿ ê lêng-le̍k, ji̍t-ji̍t keng-sin, oa̍t-phoa̍t ū la̍t; pí-khí ji̍t-ji̍t lêng-miā ko͘-ta, bô la̍t ê seng-oa̍h; sī thiⁿ chham tē ê cheng-chha. Ài-tit kam-lō͘, tī mî-sî it-chhè lóng an-chēng ê sî, chiah ū kam-lō͘ ê chhut-hiān. Chháu, chhiū-hio̍h tī mî-sî, i ê mn̂g-kńg khui, chiap-siū keng-sin ê lō͘-chúi ê koàn-ak, tiông-sin tit le̍k-liōng. Siâng-khoán, an-chēng thèng-hāu Chú, lêng-sèng ê kam-lō͘ chiah ōe lâi-lîm. Eng-kai an-hioh tī I bīn-chêng. Nā-sī seng-oa̍h lô-lo̍k bô êng, kam-lō͘ sī tit bōe tio̍h. Thèng-hāu Siōng-tè, hō͘ I ê tông-chāi lâi lūn-te̍k lí, án-ni lí ōe tòa Ki-tok keng-sin kap khùi-la̍t, kè-sio̍k chīn lí ê pún-hūn kap chit-chek.

Tī ū jia̍t-khì, hong thàu ê sî, kam-lō͘ bōe chhut-hiān. Khì-un ài tāi-seng kàng, khong-khì ài léng koh chēng-chēng ê sî, hit-ê khòaⁿ-bōe-tio̍h ê chúi-khì chiah ōe kiat-chòe lō͘-chúi, lâi lūn-tek chhiū-bo̍k. Lán ê lêng iā tio̍h tī I ê bīn-chêng oân-choân an-chēng lo̍h-lâi, chiah ōe tit Siōng-tè ê un-tián só͘ tòa-lâi ê an-hioh kap keng-sin.

Sù Lí chheng-chēng ê lō͘-chúi
Ti̍t-kàu seng-oa̍h cheng-chat soah-khùi,
Sim-lêng ê tāng-tàⁿ ap-le̍k lóng lī-khui,
Oa̍h teh sūn-sū bô lōng-hùi,
Kiàn-chèng Lí bí-hó, pêng-an kap chun-kùi.

Tī góa ê chhoán-khùi,
Phīⁿ-tio̍h Lí ê chheng-liâng kap an-ùi,
Hō͘ kám-siū bâ-pì, sim-tiāⁿ thêng-khùi,
Keng-kè tōa-hong, iām-hé, tē li̍h--khui,
Thiaⁿ tio̍h sòe-sòe ê siaⁿ tùi Lí ê chhùi.


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.org