《台語荒漠甘泉（全羅版）》

 | | | 轉寄

"Êng-êng chē"

作者 陳清俊 翻譯 2010.12.26

listen


Cha̍p-jī ge̍h jī-la̍k (Cha̍p-jī ge̍h jī-cha̍p-la̍k ji̍t)


"Lín chiah-ê chē chia, thèng-hāu góa khì hia kî-tó." (Má-thài 26:36)

Tī ûi-ki̍p ê sî, pàng lâng êng-êng bô tāi-chì sī chin khùn-lân ê sū. Tī Khek-se-má-nî hn̂g ê kî-tó, Iâ-so͘ pún-sin khì thâu chêng kî-tó, Pí-tek, Ngá-kok kap Iok-hān tè I teh kéng-séng, I chiong poeh ê ha̍k-seng pàng tī piⁿ-á, êng-êng bô tāi-chì. Góa siūⁿ chiah ê ha̍k-seng it-tēng teh bâi-oàn. In iā sī tī hn̂g-nih, chóng-sī bô hūn tī chham-ka hn̂g-lāi hoe-phûn ê chai-pôe, pôe-ióng ê kang-chok. Che sī ûi-ki ê sî, sī ke̍k kín-tiuⁿ ê sî, kèng-jiân bô hō͘ in chham-ú.

Lí góa it-tēng iā ū chit lūi ê keng-giām, kám-kak chin sit-bāng. Khòaⁿ tio̍h chi̍t ê ho̍k-sāi Ki-tok ê hó ki-hōe, ū lâng má-siōng siū-phài khì kang-chok, iā ū lâng siū hùn-liān chún-pī siū chhe-khián, chóng-sī pún-sin sī pī-pek êng-êng teh tán, bô chòe sím-mi̍h. Khó-lêng sī tng-teh phòa-pīⁿ, khó-lêng sī sàn-chhiah bô la̍t thang chòe, iā khó-lêng sī siū khó-phàⁿ ê bú-jio̍k. Put-koán án-chóaⁿ, lí bô hūn tī che kang-tiâⁿ, lí bōe bêng-pe̍k ūi-sím-mi̍h siū pâi-thek tī chit pō͘-hūn ê ki-tok-tô͘ seng-oa̍h ê gōa-bīn. Kì-jiân lí sī chìn-ji̍p tī hn̂g lāi, ūi-hô bô kang thang chòe, sī chin bô kong-pîⁿ.

Chhin-ài ê pêng-iú, sim an chi̍t ē, tāi-chì m̄-sī lí só͘ khòaⁿ ê hit-khoán! Lí pēng bô siū pâi-thek tī jīm-hô ki-tok-tô͘ seng-oa̍h. Lí siūⁿ Siōng-tè ê hn̂g nih chí-ū kiâⁿ kap khiā ê lâng mah? M̄-sī, hn̂g lāi iáu ū só͘-chāi hō͘ lâng thang chē. Chhin-chhiūⁿ Eng-bûn tiong ê tōng-sû, ū saⁿ chióng, --- chú-tōng, pī-tōng, koh ū put-tōng, chiū-sī tiong-sèng ê. Chú-tōng ê lâng sī tī chiàn-tiûⁿ chiàn-tàu kàu ji̍t-lo̍h, pī-tōng ê lâng teh koan-khòaⁿ, teh pò-kò chiàn-tàu ê chìn-tián ê, put-tōng ê lâng sī chē teh, hioh-khùn, iā teh thèng-hāu, bô chòe sím-mi̍h.

Chit ê chêng-hêng, lí m̄-thang siūⁿ kóng lí hōng sak tī chi̍t kak. Kî-si̍t, sī Ki-tok chhin-sin tùi lí kóng, "chē tī chia." Lí tī hn̂g-lāi ê ūi sī Siōng-tè te̍k-pia̍t lâu ê, m̄-nā-sī teh tng-tán beh án-chóaⁿ sú-iōng ê só͘-chāi. Siōng-tè tòa sè-kan lâng, chōe-chōe lâng bô chòe úi-tāi ê kang-tiâⁿ, bô hū chin tōa ê chek-jīm. In ê kang-chok chiū-sī "chûn-chāi", sī put-tōng, sī tiong-sèng ê. In bô tit-tio̍h tōa sèng-lī, iā bô chhin-chhiūⁿ Pí-tek, Ngá-kok, kap Iok-hān siū chù-ba̍k, chí sī chēng-chēng chē tī iân-sia̍h tiong.

Chóng-sī Iâ-so͘ sī ū chù-ì tio̍h in. Tùi in só͘ hoat-chhut ê phang-bī, in ê bí-lē, I chiū chin hoaⁿ-hí khoài-lo̍k. In seng-oa̍h chhin-chhiūⁿ kok tiong ê sió-hoe, tī chûn-chāi, khó-ài ê kian-chhî, chiū móa Chú ê sim-ì, hô-pit ke-thiⁿ bâi-oàn, hoah put-pêng.


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.org