《台語荒漠甘泉（全羅版）》

 | | | 轉寄

"M̄-thang sim-lāi put-pêng"

作者 陳清俊 翻譯 2010.10.10

listen

Cha̍p ge̍h chhoe-cha̍p (Cha̍p ge̍h cha̍p ji̍t)

"m̄-thang ... sim-lāi put-pêng." (Si-phian 37:1)

Góa jīm-ûi chit-kù keng-bûn kap "m̄-thang thau-the̍h" (Chhut-ai-ki̍p-kì 20:15) siâng-khoán, lóng sī Siōng-tè ê bēng-lēng. Sim put-pêng sī sím-mi̍h ì-sù neh? Ū lâng kā i hē tēng-gī kóng "i ōe hō͘ lâng piàn chho͘-ló͘, chho͘-chho͘, chiong ka-kī kap pa̍t-lâng tiong-kan ê mô͘-chhat kàu sún-hāi ê tē-pō͘." Kiám m̄-sī mah? chi̍t-ê ài siū-khì, bô lí-khì koh ài phoe-phêng ê lâng, m̄-nā hō͘ pún-sin siau-mô͘ khùi-la̍t tī khì-phut-phut ê chōng-thāi, iā ōe hō͘ pa̍t-lâng chin thó-ià bû nāi? Tng lâng iu-lū, put-pêng ê sî, ōe hō͘ pa̍t-lâng hoân-ló, bô ài chhap. Si-phian m̄-nā sī kóng "M̄-thang in-ūi chòe pháiⁿ ê lâng sim-lāi put-pêng." Iā bô hō͘ lâng sim chûn put-pêng ê û-tē. Sim hoâi put-pêng sī tōa ū pháiⁿ-chhù, Siōng-tè bô ài lán siong-hāi ka-kī á-sī pa̍t-lâng.

I-seng ōe tùi lí kóng, Hoat chi̍t-pái ê phî-khì pí hoat-sio tùi sin-thé ê sún-hāi khah tōa. Keng-siông sim hoâi put-pêng tùi sin-thé ê kiān-khong choa̍t-tùi bô hó. Tùi sim hoâi put-pêng hoat-tián lo̍h-khì, chiū siông-siông hoat phî-khì, chiū-sī siū-khì. Goān lán ōe toàn-jiân chiong i pàng-lī, kán-tan chun-siú "m̄-thang sim-lāi put-pêng" ê bēng-lēng. --- Margaret Bottome

Kó-hn̂g ê Sim-siaⁿ

Chhiⁿ-tî-á tùi chhek-chiáu-á kóng,
"Góa ài chai chiah ê jîn-lūi ūi-sím-mi̍h teh chhiong-kông
Hoân-ló, bô-êng, loān-loān chông."

Chhek-chiáu-á tùi chhiⁿ-tî-á hôe sò͘,
"Pêng-iú, góa siūⁿ it-tēng ko͘-ko͘
Sī in-ūi in bô chhin-chhiūⁿ lán ū Thiⁿ-pē ê chiàu-kò͘." --- Elizabeth Cheney


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.org