《台語荒漠甘泉（全羅版）》

 | | | 轉寄

''Ki-tok ê pêng-an''

作者 陳清俊 翻譯 2010.06.13

listen

La̍k ge̍h cha̍p-saⁿ (La̍k ge̍h cha̍p-saⁿ ji̍t)

"Góa chiong góa ê pêng-an siúⁿ-sù lín." (Iok-hān 14:27)

Ū nn̄g ê bí-su̍t-ka, ōe-tô͘-ka beh ōe in só͘ siūⁿ an-hioh, pêng-an ê tô͘. Chi̍t ê sī ōe chhim-soaⁿ lāi pêng-chēng ê ô͘, lēng-gōa chi̍t ê ōe tōa chúi-chhiâng, chúi-chiâng ē ū chi̍t châng lám-lám ê chhiū, sûi tī phùn khí-lâi chúi-pho ê téng-bīn, chhiū-ki hō͘ chúi-pho phùn tâm-tâm, an-jiân siⁿ tī hia.

Tē it pak tô͘ sī piáu-hiān chhut pêng-pêng chēng-chēng bô oa̍h-khì ê an-hioh. Tē jī pak tô͘ khiok biô-siá chhut ū oa̍h-khì chin-chiàⁿ ê an-hioh, pêng-an.

Piáu-bīn khòaⁿ, Ki-tok só͘ siū ê, sī to-chai to-lān ê it-seng. Hong-po̍k, khùn-lân, chi̍t-pho koh chi̍t-pho sòa-chiap lâi, ti̍t kàu I ià-siān ê sin-thé hông khǹg tī hûn-bōng lāi. Chóng-sī I lāi-sim ê seng-oa̍h khiok sī pêng-chēng ná kiàⁿ chi̍t iūⁿ, sī hui-siông pêng-chēng.

Jīm-hô lâng jīm-hô sî-chūn, lâi kàu I bīn-chêng, lóng beh tit-tio̍h pêng-an. Liân jîn-kan ê eng-khián (cháu-káu) tī Iâ-lō͘-sat-léng ê koe-lō͘ teh tng-tán, teh chhē beh lia̍h I ê sî, I iáu tùi I ê ha̍k-seng kóng, sù in "góa ê pêng-an."

Pêng-an m̄-sī tī lé-pài-tn̂g lāi hit-chióng sîn-sèng chong-giâm ê kám-kak, sī tùi lāi-sim khiā-chāi tī Siōng-tè hit-chióng ê tiām-chēng ê sim-kéng. --- Henry Drummond

Góa sù pêng-an, tng lí pi-siong hoân-ló,
Hō͘ lí pêng-chēng, an-ùi kap sìn-khò.

Góa sù pêng-an, tng kî-tó ná chhin-chhiūⁿ bô thiaⁿ-kìⁿ,
Chai góa ê èng-ún, góa ê ōe, it-tēng ōe si̍t-si.

Góa sù pêng-an, tng lí ko͘-to̍k,
Iā-eng àm-mî ê koa-siaⁿ siōng súi siōng khoài-lo̍k..

Góa sù pêng-an, tng sí-sit keng-kè,
Ùi kng-bêng ê lō͘ thàng kàu si̍p-jī-kè.

Góa sù pêng-an, tī tùi-te̍k kong-kek, ki-chhì,
Thong-kè bû-chêng bú-jio̍k, kap Chú kau-pôe ná kam-tiⁿ.

Góa sù pêng-an, tng sin-khó͘ kang-chok lâu-kōaⁿ,
In-ūi góa ê thâu-hia̍h iā ū huih-chúi teh chōaⁿ.

Góa sù pêng-an, tī hó-pêng-iú chhut-bōe,
Pêng-an, thiàⁿ-thàng, teh ūi in kî-tó, sià-chōe.

Góa sù pêng-an, tng chí-ū sí-lō͘ chi̍t tiâu,
Si̍p-jī-kè lō͘ thong-kàu Góa chia liáu.


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277 begin_of_the_skype_highlighting              06-235-6277      end_of_the_skype_highlighting分機(122~124) ， e-mail:book@pctpress.org