《台語荒漠甘泉（全羅版）》

 | | | 轉寄

"Sìn chiū tit-tio̍h"

作者 陳清俊 翻譯 2007.02.18

listen







Jī ge̍h cha̍p-poeh ji̍t

"Kìⁿ-nā lín só͘ kî-tó lâi kiû ê, tio̍h sìn sī í-keng tit-tio̍h, chiū beh kā lín chiâⁿ." (Má-khó 11:24)

Tng góa ê sòe-hàn kiáⁿ beh cha̍p-hè ê sî, i ê a-má tap-èng i tī Sèng-tàn-chiat ê sî, beh sàng i chi̍t pún chi̍p-iû-phō͘ chòe lé-mi̍h. Chóng-sī sèng-tàn-chiat kè-liáu, chi̍p-iû-phō͘ iáu bōe kàu, iā bô tùi a-má hia lâi ê siau-sit. Liáu-āu iā bô lâng thê-khí chit ê sū. Ū chi̍t ji̍t, i ê sió-pêng-iú lâi chhù-lāi beh khòaⁿ i tī SSeng3-tàn-chiat ū tit-tio̍h sím-mi̍h lé-mi̍h ê sî, i chi̍t-kiāⁿ chi̍t-kiāⁿ lia̍t chhut-lâi, siōng-bé koh ka chi̍t kù ōe, "iáu ū a-má sàng góa ê chi̍p-iû-phō͘". Góa thiaⁿ-liáu tio̍h chi̍t kiaⁿ.

Í-āu, chit ê gín-ná iā án-ni kóng kúi-nā pái. Góa jím-bōe-tiâu chiū kiò i lâi mn̄g, "Jio-jí (George), lí bô siu-tio̍h a-má ê chi̍p-iû-phō͘, ūi-hô lí kóng ū chi̍p-iû-phō͘ ah?"

I khòaⁿ góa ê bīn chi̍t-ē, kám-kak góa só͘ mn̄g ê sī ke-ê, chiū hôe-tap kóng, "Lí ài-chai ūi-sím-mih? A-má só͘ kóng ê ōe lóng sī sǹg-siàu." I ê sìn-sim bô in-ūi góa mn̄g lâi iô-tōng.

Koh kè chi̍t kò goe̍h, bô koh thê-khí chi̍p-iû-phō͘ ê sū. Ū chi̍t-kang, chi̍t-bīn sī beh chai i ê sìn-sim jōa-tōa, chi̍t-bīn sī beh chai chi̍p-iû-phō͘ sī-m̄-sī í-keng siu-tio̍h, góa kóng, "Jio-jí, a-má bô-tiāⁿ-tio̍h bōe-kì-tit i tap-èng lí ê sū."

I chin kian-tēng hôe-tap kóng, "Oh, bōe lah, ma-ma, a-má it-tēng bô bōe-kì-tit."

Góa khòaⁿ i khó-ài ê bīn, chi̍t-tiám-á to bô giâu-gî, chin jīn-chin ê piáu-chêng. I iā siūⁿ góa só͘ kóng ê ōe iā sī ū chi̍t-tiám-á tō-lí. Bô-kú, i chin hoaⁿ-hí lâi tùi góa kóng, "Lí khòaⁿ, góa siá phoe hō͘ a-má, hó-m̄-hó, to-siā i ê chi̍p-iû-phō͘?"

Góa kóng, "Lí thang chhì khòaⁿ-māi." Chit-sî, góa khai-sí o̍h tio̍h ke̍k hong-hù lêng-sèng ê kong-khò.

Bô kúi hun-cheng, phoe siá hó, Jio-jí chi̍t-bīn kho͘ su̍h-á, tùi a-má chiok ū sìn-sim ê khoán, chi̍t-bīn kiâⁿ khì iû-kio̍k kià phoe. Bô-kú, a-má ê hôe-phoe lâi lah. Lāi-bīn kóng:

Chhin-ài ê sun-á:
Góa bô bōe-kì-tit tap-èng lí ê chi̍p-iû-phō͘. Tī goán chit só͘-chāi, góa chhē bô lí só͘ ài ê hit-khoán, só͘-í khì Niú-iok (New York) tēng. Bô phah-sǹg Sèng-tàn-chiat kè-liáu chiah kià kàu. Phah-khui chi̍t ē khòaⁿ, pēng bô lí-sióng. Góa chiū koh khì tēng lēng-gōa chi̍t pún. Kàu taⁿ iáu bōe siu tio̍h. Góa koat-tēng kià saⁿ-cha̍p kho͘ hō͘ lí, lí thang tī lín hia bóe só͘ kah-ì ê chi̍t-pún.
Thiàⁿ lí ê a-má.

Jio-jí tha̍k tio̍h chit tiuⁿ phoe, hit-ê hoaⁿ-hí, ná chhin-chhiūⁿ sio-chiàn phah-iâⁿ ê khoán-sit. Tùi bô chi̍t-tiám-á giâu-gî ê sim-lêng só͘ kóng-chhut ê ōe, "Ma-ma, Góa m̄-sī kā lí kóng, a-má kóng ê ōe lóng sǹg-siàu." Jio-jí "tī bô thang ǹg-bāng ê tiong-kan, tùi ǹg-bāng lâi sìn," (Lô-má 4:18). I chhim-sìn chi̍p-iû-phō͘ it-tēng ōe lâi, chāi i put-toān siong-sìn ê sî, a-má iā teh chòe, sî chi̍t ē kàu, sìn-sim chiū piàn chiâⁿ sī ba̍k-chiu chêng só͘ khòaⁿ tio̍h ê sū-si̍t, chin-si̍t.

Lâng ê jio̍k-tiám sī m̄-káⁿ koh m̄ sìn-khò Siōng-tè ê èng-ún lâi ta̍h chhut thâu chi̍t pō͘. Chú Iâ-so͘ tùi To-má kap i í-āu chōe-chōe ê hoâi-gî-chiá kóng, "hiah ê bô khòaⁿ-kìⁿ lâi sìn ê lâng, ū hok-khì." (Iok-hān hok-im 20:29) --- Lông-chū (Rounds) hu-jîn

附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com.tw