《台語荒漠甘泉（全羅版）》

 | | | 轉寄

"Chó͘-gāi"

作者 陳清俊 翻譯 2007.02.04

listen












Jī ge̍h sì ji̍t

"Iâ-hô-hoa beh hō͘ lí chiūⁿ kàu tōe-chiūⁿ koâiⁿ ê só͘-chāi;" (Í-sài-a 58:14)

Khì-thé tōng-le̍k-ha̍k, ū chi̍t ê ki-pún tēng-lu̍t, bu̍t-thé nā-sī chìⁿ hong pe, ōe kín-kín hiòng siōng pe koân. Hui-ki nn̄g ê si̍t nā chìⁿ hong, chiū cheng-ka hui-hêng ê koân-tō͘. Tùi tó-ūi tit chit ê pó-kùi ê keng-giām ah? Khòaⁿ chiáu-á teh pe lâi o̍h. Chiáu nā chū-iû chū-chāi teh pe, sī sūn-tio̍h hong-sè, nā tú-tio̍h gûi-hiám ê sî, chiū tńg-se̍h chìⁿ-hong pe, chiū pe koân khí-khì.

Jîn-seng ê ge̍k-kéng sī Thiⁿ-pē só͘ chún-pī ê hong. Ū sî tùi bīn chhe lâi, kiông kah tòng bôe tiâu. Chit ê hong-thai sī I só͘ chún-pī, ài lán thê-seng lán ê chân-chhù, ǹg I ê thian-kok hia chìn.

Lí ōe kì-tit joa̍h-thiⁿ koh joa̍h, koh hip, hip kah khùi lóng chhoán bōe hó-sè. Nā ū chi̍t phìⁿ o͘-hûn lâi, khí tōa hong, lo̍h chi̍t chūn tōa hō͘, lûi-kong tân bô thêng, sih-ná sih-sih-kiò. Hong-hō͘ āu khong-khì piàn chheng-sóng, ū sin ê oa̍h-khì, chit ê sè-kài thu̍t-jiân kái-piàn chòe sin ê iūⁿ.

Jîn-seng ê cho-gū piàn-hòa iā sī án-ni. Sìⁿ-miā tiong chhut-hiān po̍k-hong-ú, khoân-kéng sán-seng kái-piàn, tit-tio̍h kiat-chēng, chhiong-móa choán-ki, ná chhin-chhiūⁿ thian-tông kàng-lîm tī tē-chiūⁿ.

Tú-tio̍h chó͘-gāi, hō͘ lán ōe chhiùⁿ-koa hoaⁿ-hí. Hong chhe kè khòng-khoah ê hái téng, pēng bōe hoat-chhut siaⁿ-im; nā chhe kè chhiū-ki, chhe kè khîm ê si-hiân ê sî, chiū hoat-chhut siaⁿ, sī bí-lē ū la̍t ê siaⁿ. Tng lí chū-iû ê lêng-hûn sàu-kè jîn-seng ê chó͘-gāi, chêng-bīn ū chhiū-nâ hiah chōe ê khó͘-thàng, á-sī sòe-sòe ê iu-lū kap hoân-ló, tùi-hia kè lóng beh ū siaⁿ lâi o-ló, lâi gîm-si.

Chhin-chhiūⁿ chiáu-á teh pe teh kiò,
Tī sòe-sòe ê chhiū-ki hio̍h,
I iáu teh chhiùⁿ, sui-bóng chhiū-ki tōa iô
In-ūi i khò nn̄g-ki si̍t pó-sioh.

附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com.tw