《台語荒漠甘泉（全羅版）》

 | | | 轉寄

"Thun-lún thèng-hāu"

作者 陳清俊 翻譯 2009.08.16

listen

Poeh ge̍h cha̍p-la̍k (Poeh ge̍h cha̍p-la̍k ji̍t)

"Góa bat thun-lún thèng-hāu Iâ-hô-hoa." (Si-phian 40:1)

Thèng-hāu pí kiâⁿ-lō͘ khah oh, in-ūi thèng-hāu su-iàu nāi-sim, thun-lún. Jím-nāi sī lân-tit ū ê bí-tek. Siōng-tè ûi lî-pa lâi pó-hō͘ I ê chú-bîn, tùi pó-hō͘ ê kak-tō͘ khòaⁿ sī hó. Chóng-sī nā-sī lî-pa ná khí ná koâiⁿ, kàu lî-pa gōa lóng khòaⁿ bōe-tio̍h, lán chiū beh hoâi-gî, lán ê it-seng sī-m̄-sī lóng hān-chè tī chit ê khoân-kéng, kiám iáu ū ki-hōe lī-khui chit ê sió hoān-ûi kap ho̍k-bū. Ū-sî lán bōe thang liáu-kái, ūi-sím-mi̍h bô khah tōa ê hoān-ûi lâi ho̍k-bū, sū-hōng, ūi-sím-mi̍h bōe thang lī-khui chit ê chin oh oa̍h-tāng khí-lâi ê só͘-chāi. Put-kò, Siōng-tè ê iân-chhiân ū I ê ì-sù, “Gī-lâng ê kha-pō͘ sī Iâ-hô-hoa só͘ an-tì.” (Si-phian 37:23).

George Mueller tī chit ê keng-bûn piⁿ-á ū chù-kái siá, “m̄-nā sī kiâⁿ ê kha-pō͘, iā pau-hâm thêng ê kha-pō͘”. Ū lâng siūⁿ beh chhiong-phòa Siōng-tè ê lî-pa, che sī tōa-tōa ê chhò-gō͘. Chú hō͘ ki-tok-tô͘ siōng tōa ê chún-chîn, chiū-sī bô lī-khui Siōng-tè só͘ kā i an-tùn ê só͘-chāi, ti̍t-kàu “hûn-thiāu” (Chhut-ai-ki̍p-kì 13:21) khai-sí hiòng-chêng khí-kiâⁿ. --- tùi “Chú-ji̍t-o̍h sî-pò”

Lán nā it-tān o̍h ōe-hiáu it-chhè tāi-chì lóng thèng-hāu Chú ê ín-chhōa, lán beh chai, lán ê lêng-le̍k beh tī pêng-hêng kiâⁿ-chòe tiong ta̍t-kàu chòe ko-tiám. Lán ê tiong-kan chin chōe lâng lóng khiàm-kheh siūⁿ ài ū ê le̍k-liōng, chóng-sī Siōng-tè tiàu lán khì chòe múi chi̍t hāng ê kang-chok, lóng beh sù hō͘ lán ū kàu-gia̍h oân-choân ê le̍k-liōng. Pó-chhî sìn-sim thèng-hāu I ê ín-chhōa chiū-sī tit le̍k-liōng ê pì-koat. Hoân-nā bô chiàu I ê tō-lō͘ kiâⁿ ê, lóng sī lōng-hùi sî-kan kap cheng-sîn. Liû-sim thèng-hāu I ê ín-chhōa. --- Samuel Dickey Gorden

Ká-sú chi̍t ê lâng siū-pek chēng-chēng bô chhái-chhú jīm-hô ê hêng-tōng, chí khiā tī hōaⁿ-téng khòaⁿ sìⁿ-miā ê tōa-éng chhiâng-chhiâng kún, i ê sìⁿ-miā kiám kóng sī sit-pāi ê mah? Choa̍t-tùi m̄-sī, in-ūi sèng-lī sī ài khò khiā-chāi, an-chēng thèng-hāu khì tek-sèng. Án-ni chòe, khó-lêng pí lí í-chêng bô-êng chhih-chhih, phah-piàⁿ seng-oa̍h khah oh kúi chheng pē. Khiā-chāi, thèng-hāu, bô hoe-sim, bô sit-bōng, sūn-thàn Siōng-tè chí-ì, chiong kang-chok ê ki-hōe kap êng-iāu lâu hō͘ pa̍t-lâng, tī chèng-lâng bô-êng khoài-lo̍k chìn-hêng ê sî, lí pún-sin ōe-thang pó-chhî an-chēng, ū chū-sìn koh khoài-lo̍k, sī hô-téng ê hó ah.

Siōng úi-tāi ê jîn-seng chiū-sī “Kàu lín í-keng chòe-chiâⁿ lóng-chóng ê sū, iā iû-goân khiā-chāi.” (Í-hut-só͘ 6:13) --- J.R.Miller

附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com