《台語荒漠甘泉（全羅版）》

 | | | 轉寄

"Choan-sim tè Iâ-so͘"

作者 陳清俊 翻譯 2008.12.21

listen


Cha̍p-jī ge̍h jī-it (Cha̍p-jī ge̍h jī-cha̍p-it ji̍t)

"Góa beh ēng i só͘ ta̍h tio̍h ê tōe siúⁿ-sù i, ... in-ūi i choan-sim tè Iâ-hô-hoa." (Sin-bēng-kì 1:36)

Jîn-seng lō͘-tô͘ tiong, ū chin chōe tāi-chì chin khùn-lân, ài ēng chin tōa ê khùi-la̍t khì chòe, koh tio̍h siū chin tōa ê khó͘-thàng, ū-sî ài tōa ê cheng-chiàn, chin oh koat-tēng, khùn-lân têng-têng kàu bô-ài khì chòe. Chit chióng ê tāi-chì khiok ōe tòa hō͘ lí tōa ê hok-hūn. Put-koán lí hù-chhut ê tāi-kè jōa tōa, nā bô chòe, chiū sit-khì chit ê hok-hūn.

Tī múi chi̍t tōaⁿ oh-kiâⁿ ê lō͘, lí ōe khòaⁿ tio̍h Chú ê kha-ìn, I kiò lí iân chit tiâu lō͘ kiâⁿ, che sī siū chiok-hok ê lō͘. Nā bô kiâⁿ chit ê kiā-kiā koh móa-móa chhì-phè ê lō͘, chit chióng hok-khì sī tit bōe-tio̍h.

Tī chiàn-cheng, kap te̍k-jîn sio-thâi, ài chiong kiàm pu̍ih chhut-lâi, chiah ū thâi iâⁿ ê khó-lêng. Chit ê sèng-lī ōe chòe lí it-seng hong-hù ê chiok-hok. Múi chi̍t pái lí giâ khí-lâi tāng-tàⁿ, lāi-bīn lóng chhàng-teh ōe tit-tio̍h kî-biāu le̍k-liōng ê pì-koat. --- J.R. Miller

Góa bōe ōe ka-kī tam-tng,
Hái-éng kín koh koâiⁿ koh hn̄g,
Bông-bū tà sì-chiu-ûi kú-tn̂g,
Tán lóng bōe thiⁿ-kng,
Put-kò, góa chai goán nn̄g ê, ōe sèng-lī chhiùⁿ-koa,
Iâ-so͘ kap góa.

Kiaⁿ-hiâⁿ, sái-sèng-tē, bōe-ióng,
Siū thiⁿ-khì kái-piàn éng-hióng,
Kin-ji̍t jia̍t-chhiat, khai-lóng, ū-liōng,
Bêng-ji̍t bōe tín-tāng, bô sìn-gióng,
Put-kò, I bô hòng-khì, goán nn̄g ê ōe tek-sèng chhiùⁿ-koa,
Iâ-so͘ kap góa.

Góa ê chûn tī tōa-hái,
M̄-chai án-chóaⁿ sái,
Chóng-sī ū chi̍t-ūi kap góa tông-chāi,
Chòe-hé kò, sái, siám hong-thai,
Góa chai goán nn̄g-ê, beh pêng-an kàu káng-hōaⁿ,
Iâ-so͘ kap góa.


附註:《荒漠甘泉》漢羅版kap "Hong-bô͘ Kam-chôaⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:book@pctpress.com