《台灣布袋戲e5歷史》

 | | | 轉寄

台灣布袋ê歷史kap發展

作者 陳龍廷 2005.11.13

第一章 tùi起源論到文化生態論

二、三百年前，布袋戲源自中國ê泉州、漳州、潮州等地。早期ê演出形態，沿襲中國原有ê模式，m̄-koh，kap其他源自於中國傳到台灣ê傳統戲曲仝款，受tio̍h台灣移民族群，kap政治、社會形態ê變化影響，tī經過一段時間ê發展了後，台灣ê戲劇文化自然to̍h會產生變化。Tùi起源論而言，台灣文化是中國文化ê另一個延伸kap發展，但是tī文化生態論ê觀點來看，布袋戲ê表演形式kap創作，展現出來ê是台灣獨有ê,特殊ê文化形態，有咱台灣本土特色ê藝術形象kap觀賞趣味。

Tùi中國帶到台灣ê chiah-ê 物件，應該會改變，kap中國無仝。台灣人kā中國文化「台灣化」ê過程，確實hō͘布袋戲ê發展kap內涵變kahlong2無仝。三百年來，布袋戲表演藝術，tī台灣歷史潮流kap眾人興趣不斷改變當中，m̄-nā創造出台灣布袋戲ê獨有特殊風格，真chē藝人也創造出個人ê表演藝術風格，成作布袋戲流派ê開山祖師。致使到taⁿ ê台灣，無論演藝水準ê有chiâu 無，若以遍佈台灣全國各地布袋戲團ê數量，大約成千團來看，就是一項驚人ê奇蹟。李天祿ê 後生李傳燦tī 1980年代尾bat去過泉州考察，伊表示講：中國現存ê布袋戲表演技巧，早to̍h比bē-tio̍h百年來咱台灣布袋戲發展ê技巧。這有可能是因為「文革」等政治因素，hō͘中國ê布袋戲遠離了民眾ê緣故。

Tùi 另外一ê角度來看，布袋戲是 kap民眾站作伙ê文化，若無觀眾ê熱情支持，mā無法度有咱台灣hiah-nih chē布袋戲流派。布袋戲ê起源ê講法，可能只是一個歷史ê觀點而已，m̄是呈現一個完整ê線、面。因此，咱有必要tùi文化生態論ê角度來看待，也就是tùi社會土壤、時代ê精神氣候、表演kap觀眾支持ê互動微妙關係，有可能chiah ē-tàng看tio̍h咱台灣民間生活ê真正面容。

認識台灣布袋戲，ē-tàng tùi無仝ê層次來看，咱瞭解布袋戲tùi唐山過台灣ê原始型態，liâu-liâu-á chiah成作台灣化ê表演藝術。Tùi戲曲音樂來看，布袋戲ê發展脈絡由最早ê南管、潮調，發展到北管布袋戲。Ah若tùi演出ê劇本來看，布袋戲tùi最早ê清代師傅所傳落來ê,以才子佳人ê文戲取勝ê籠底戲，到吸收民間曲館ê表演劇目，發展到以武戲尪á架表演ê正本戲等。由此，咱ē-tàng清楚地看出布袋戲台灣化ê文化kap歷史發展ê過程。