《賴永祥講書》

 | | | 轉寄

《教會史話》(1_071)斗六都司吳志高

作者 賴永祥 2008.11.23

或者有人要問，使弄眾人去燒白水溪禮拜堂，險仔殺死甘為霖牧師ê吳志高是啥人？

吳志高字玉屏，乳名墻（阿墻），道光6年（1826）12月初6生tī畚箕湖ê潭底，chit má ê白河鎮河東里。厝內真好額，生來toh真有正義感，所以真甲意交朋友，考試考真chē擺攏無tiâu，m̄ koh後來官做到武義都尉，任斗六都司。

光緒6年（1880）2月2日過身，享年58，埋tī大排竹ê下庄仔。早年店仔口（白河）吳振坤，是志高旁親，財勢兩俱，橫行鄉里，里人攏真怨恨伊，志高hō͘里民捧起來對抗伊，最後打敗振坤，koh奪走伊ê財產。其後安營築壘，大養羅漢，號令一方。為著收攬眾心，開埤圳，如白水溪圳、頭前溪圳、馬稠後後圳，附近53莊，著奉伊為總理。

同治元年（1862）3月，戴萬生亂起，20日陷彰化，伊ê軍隊入去紮店仔口，以阻郡中援師北上，志高chit時投入林向榮部。6月8日入嘉義城。未幾向榮奉檄進軍，9月至斗六，13日被圍，全軍攏死a，向榮自殺。志高偷走tńg店仔口，約束遠近ê庄民，堅壁自守。翌年正月水師提督吳鴻源，援師進紮塩水港，koh令志高做嚮導，大軍入嘉義，解開重圍。若憑鄉間ê傳說真多（見於林春水撰「吳志高與其事業」），「志高chit擺ê出兵，是tī半暝，ùi客庄內ê大營出發；而且出門ê時，尚備兩色旗幟，一是附官軍之義民旗，一是紅旗...不料兵馬未到，攻城ê陳弄嚴著已經先走a，志高急beh將義民旗tàn入城內，僥倖竟白奪救山首功」云。同治4年3月戴萬生舊部嚴辦復作亂，台澎兵備道丁日健等去平定戰事，志高mā tòe去。事平，詔授志高斗六都司。

吳志高未履任而回鄉里，tī巷仔口林厝，新起一間都司府，並修復店仔口文祠，創立玉山書院。對寺廟捐真chē錢，仙草堆大仙寺（同治8年）、店仔口福安宮、域隍廟、觀音亭（以上光緒2年）、枕頭山碧雲寺（光緒6年）之修復，攏是伊創ê。

吳志高ê事略，見吳德功寫ê「戴案紀略」等；「台南縣志」人物志mā有吳志高傳，列伊為豪強之一。吳志高是會曉看勢面？iá是地方ê惡霸？所知ê就是伊龐大ê業產，現在已經攏無去a，hit時chūn起kah真水ê斗六都司府，亦已經倒去a。

《台灣教會公報》 1951期 主後1989年7月23日