《賴永祥講書》

| | | 轉寄

《教會史話》(1_041 )紅毛親戚

時間是1863年11月,有二位英國人,必麒麟(W.A. Pickering)kap馬雅各(James L. Maxwell,D.D.)訪問了台灣府(台南)周圍幾ê平埔部落;荷蘭人已經退出台灣有2世紀--a,m̄-koh古早以前相傳荷人教化ê緣故?社民對tī「紅毛親戚」表示非常歡迎kap款待。必麒麟tī台灣府海關食頭路,tī 1865年hō͘;人派去負責安平分關,1867年轉任tī McPhail公司後改為Elles公司—就是1868年樟腦糾紛ê重要角色。馬雅各醫生是英國長老教會首任駐台宣教師,1865年6月tī府城外看西街設教會,無lōa久toh被迫侷促tī打狗。

必麒麟著有Pioneering in Formosa(倫敦1898年刊,有吳明遠譯「,老台灣」台灣銀行刊台灣研究叢刊第60種,民國48年),就是作者tī台灣ê體驗記錄;總共有10章是向kap馬雅各訪問平埔社ê記事,現在節錄一kóa記述tī下腳:

1865年ê秋天,我tī海關食頭路,去訪問台灣府(台南)10來哩外新港(今新市),tī hia發現有17世紀荷籣時期所留落--來ê平埔社遺跡。新港以前是殖民者ê傳教基站,現今ê鄉民有一kóa是hiah-ê番民ê後代。不過chiah-ê平埔番ê穿chhah kap漢人lóng仝款,mā己經lóng bē紀in原本ê語言--a,鄉長是一ê平埔族人,是一ê小官員,因為伊bat平定太平軍soah來有軍階。Tī講話ê中間,鄉長答應kā我紹介hō͘ tòa tī各地ê族人,伊講in一定會對紅毛親戚chiok歡迎--e。我計劃訪問,而馬雅各亦表示願意同齊去。Toh án-ne tī 11月某一日阮帶使佣人kap 3名苦力離開府城。阮先tī新港過暝,鄉長提供hō͘阮一名導遊,第一站是崗á林,離新差不多15哩。到崗á林ê時受tio̍h頭目ê歡迎。Chit位頭目是tī清政府負責社務--e,是族裏siōng kài優秀ê代表人物,坦白淳樸,並無新港鄉長ê hit種世故ê觀念。社民自稱做番,長老iáu bat一kóa祖先所講ê語言,in真尊敬早時ê荷蘭殖民者,所以對所有ê白種人lóng有好感。曰:lín是阮ê親戚,不屬於tī hiah惡質ê剃頭人(指漢人),lín到底是toh chit種人?分開chiah chē年--a,到現在當阮目花tio̍h beh死ê時chiah看tio̍h「紅毛親戚」真喜。聽in 所講ê話,尤其是老阿婆所講--e,實在是使人感動。...tī芎蕉脚,tòa做伙ê老頭目講,chhōa來一ê「紅毛親戚」,所以阮mā受tio̍h真熱情ê歡迎,社民殺猪家禽款待….到荖濃,導遊真臭屁喊講:喂,喂!大家緊出來看「紅毛親戚」,是咱真久以前ê親戚,是真久以前ê親戚,祖先bat講過ê hiah-ê人!所以頭目社民lóng出來熱情歡迎….。

崗林教會tī 1967年第2次改建完竣,慶祝創立百週年。Tī創建ê時,會堂kap地皮是李順義所捐獻--e。根據必文會凍知馬雅各kap崗林ê初次接觸是ti71865年11月。
《台灣教會公報》 1916期 主後1988年11月20日