《賴永祥講書》

 | | | 轉寄

《教會史話》(1_023) 馬偕「中西字典」

作者 賴永祥 2007.09.30

偕叡理編「中西字典」，是台語音漢字典之siōng早ê，刊tī 1893年，共二百二十六頁。英文冊名是 “Chinese Romanized Dictionary of the Formosan Vernacular”。冊背面án-ne寫：耶穌降世1874年英屬加拿大國偕叡理作 中西字典 大清光緒十七年台北耶穌聖教會寄印 上海美華書館復版。 Chit本冊所收字數有9,451；每字以羅馬字註台灣ê讀音並解釋伊會意義。編纂ê經過，thang tùi偕牧師tī 1891年7月3日所寫序文知影伊ê情形。偕牧師得tio̍h上海美華書館（American Presbyterian Mission Press）ê字表，是依部首kap字劃編排ê，共有6,664字。伊kā chiah-ê字抄寫tī筆記簿，漸漸完成其注音kap釋義，1874年初稿完成。本來是為tio̍h伊家己用，後來伊ê門徒mā每日抄寫一百字來方便背唸。1844年中法之役，淡水被炮擊，稿燒掉一部分。眾門徒要求刊行，tùi án-ne派門徒連和kap劉澄清編列漢字，汪式金抄寫，嚴彰以羅馬字寫讀音kap解義。 Teh計劃出版ê時，將原字表刪去台灣m̄-bat見過使用ê一kóa字，另外增加tùi聖經、中國經典kap衛三畏編「漢英韻府」( “Syllabic dictionary of the Chinese language”, by Samuel Wells Williams, 1874)等選出ê字。1849年4月10日由陳榮輝、連和、葉順kap洪胡校正完畢。

馬偕博士日記1891年4月11日條，根據陳宏文譯文記載：「蔡生、嚴清華tùi上海tńg來，這是我託in帶字典到上海去付印ê。」不過，嚴清華之弟嚴彰講，是嚴彰kap蔡生受派往上海辦理印刷事務，並監督印刷；á兩人約三個月後，坐「密士號」tńg去淡水（マツカイ博士の業績132~133頁，嚴彰文）。嚴彰（1869~1939），tòe in阿兄信道，為偕牧師早期門徒之一，一度從商，但1909年in阿兄嚴清華牧師別世以後，tńg來為教土會工作。蔡生，蔡長義牧師ê阿公，亦是偕牧師早期ê門徒之一，1842年當淡水牛津學堂創校ê時，擔任漢文教師，後來擔任錫口（松山）等教會傳道師。

Chit本冊流傳kah-ná無真闊。楊雲萍教授bat tī台灣大學教「臺灣史」課多年；伊珍藏「中西字典」一冊，我tī 1951年10月間借閱一pái，略作筆記，但bē赴抄錄。國立中央圖書館台灣分館、台灣教會史料館各藏一本。臺人khah愛用同類後來出版ê《甘字典》—甘為霖編《廈門音新字典》。甘字典初版刊tī 1913年，收有單字一萬五千。
(華語原載：《台灣教會公報》第1897期 主後1988年7月10日)