《賴永祥講書》

 | | | 轉寄

《教會史話》(1-001) 歷史年譜

作者 賴永祥 2007.04.01

「黃武東回憶錄」（台灣出版社，美國，1986），有一節講伊1951~53年間「留英」進修，結識教會人士、探訪退休宣教師kap搜集台灣教會史料ê經過（詳見該書209~215頁）。以下摘錄其中一小段：「英國總會事務所因tī戰爭中炸毀，我tī英國ê時，母會事務所已經搬徒到tī George St. ê一間長老教會辦公；而且kā部份bô炸毀ê文件搬運到chit間臨時事務所ê地下室暫存，但iáu未清理。我bat用真chē時間，tī chiah-ê舊紙堆裡chhōe物件，清理出bē少史料，如英國長老教會ê機關刊物 “The Presbyterian Messenger”月刊，每期ê尾段就是「海外宣道」專欄，記載其宣教區ê宣教消息，其中有真chē記載、圖片等臺灣所無ê資料，我選擇自1862年起ê月刊一一整理，帶tńg來臺灣，裝訂成冊，有缺頁ê部份亦詳細登錄，充實教會資料室。1961年徐謙信教授kap我合編「臺灣基督教會歷史年譜」第一、二部ê真chē史料，lóng是由chit部刊物kap甘為霖牧師ê令媛hō͘我ê “Missionary Handbook”取材。」

「歷史年譜」ê全名是「臺灣基督長老教會歷史年譜」。所講ê“Missionary Handbook”就是甘為霖牧師所編「台南教士會議事錄」，其正名是 “Handbook Of the English Presbyterian Mission in South Formosa, ed, by Rev. Wiliam Campbell. London, l910”）；kan-ta印一百部，十分珍貴。所講ê英國母會，就是英國長老教會，萬榮華牧師（Rev. Edward Band)有著「英國長老教會海外傳教百年史」，書ê正名是 “Working His Purpose O͘t : The History of the English Presbyterian Mission, 1847-1947”。全部五卷，第一卷第五章kap第二卷全部lóng是有關臺灣傳道（合訂本ê第五章到第十章）。徐謙信牧師，bat tī 1955年，出刊「北部臺灣基督長老教會年譜」。

「歷史年譜」第一部（滿清時代篇）刊tī 1959年，第二部（日治時代篇）刊tī 1961年；如照原計劃，有第三部（現代篇），將附帶各時代ê各種統計kap索引，可惜未見第三部之刊出。編者tī其序言云：「阮盡量根據歷史編輯ê第一手史料，to̍h是所謂ê根本史料」，可見其態度嚴謹，實在是一部台灣教會史研究者必需ê工具書，值得重視。

徐謙信牧師tī第一部序言裡，加了一段云：「Teh beh開始編第一部ê時，因為編者中另外一位賴永祥委員留美，soah致使bē-tàng參加本計劃...... 非常遺憾。」無m̄-tio̍h,當時我tī國立臺灣大學圖書館服務，1958年8月到1959年9月之間，我受派留美進修圖書館學並考察，tńg來台灣國內以後也無閒館務kap籌設圖書館學系，始終bē-tàng參與，實在是一件遺憾ê tāi-chì。
(原華語：台灣教會公報1871期 主後1988年1月10日)